MAKTABDA I.A.KARIMOVNING XOTIRA KEChASI OʻTKAZILDI

Islom Karimov mustaqil Oʻzbekiston davlatining asoschisi, buyuk davlat va siyosat arbobi, oʻzbek xalqining ulugʻ va ardoqli farzandi edi. U mamlakatimizni mustabid tuzum qaramligidan ozod qilib, halokat yoqasiga kelib qolgan yurtimizni qayta tiklagani hamda ogʻir qiyinchiliklar va sinovlarga qaramay, tarixan qisqa davrda yurtimizni jadal rivojlanayotgan zamonaviy demokratik davlatga aylantirdi.

30-yanvar kuni tuman XTBga qarashli 11-sonli umumtaʼlim maktabida ham tarix va huquq fan oyligi doirasida shu buyuk inson, Oʻzbekistonning birinchi Prezidenti I.A.Karimov tavalludining 82 yilligiga bagʻishlab xotira tadbiri oʻtkazildi.

Tadbirda maktab direktorining maʼnaviy-maʼrifiy ishlar boʻyicha oʻrinbosari Munavvar Joldasova oʻquvchi-yoshlarga “Mustaqilligimiz meʼmori – Islom Karimovning  buyuk xizmatlari” mavzusida gapirib, xalqimizni mustaqillik sari ilhomlantirgan hamda kerak paytda jasorat va qahramonlik koʻrsatib, shaxsiy ibrati bilan Istiqlolimizni himoya qilgan I.Karimovning siyosiy faoliyati haqida toʻlqinlanib soʻzladi.

Tarix va huquq fan oʻqituvchilari rahbarligida maktabning 9-, 10-, 11-sinflar oʻquvchilari oʻrtasida oʻtkazilgan “Zakovat” oʻyinlari orqali oʻquvchilar oʻzlarining bilim va zakovatlarini namoyish etishdi. Ayniqsa, mamlakatimizda yashayotgan turli millat vakillari uchun yaratilgan tenglik, dinlararo, konfessiyalararo bagʻrikenglik siyosati, barcha  millat vakillarining mehnat qilish, namunali tibbiy xizmatdan foydalanish, dam olish, kafolatli taʼlim olish huquqlarining  Konstitutsiyamizda mustahkamlab qoʻyilgani haqida oʻz bilimlarini namoyish etishdi va berilgan savollarga aniq, puxta javob berdilar. Shu barobarida mamlakatimizning birinchi Prezidenti I.Karimov rahbarligida amalga  oshirilgan islohotlar, Oʻzbekistonning mustaqillik davri taraqqiyot bosqichlari xususida oʻquvchilar batafsil maʼlumotlar berdilar. Ayniqsa, Prezidentimiz Sh.M.Mirziyoyev boshlab bergan 5 ta muhim tashabbusning  yoshlar hayotida tutgan oʻrni, Yangi Oʻzbekistonda kechayotgan demokratik jarayonlar, yoshlarga koʻrsatilayotgan eʼtibor va gʻamxoʻrlik, yoshlar hayotiga oid Prezident Farmonlari hamda Qarorlari boʻyicha zukkolik bilan  oʻz fikrlarini bildirdilar.

Tadbir davomida oʻquvchilar tomonidan mamlakatimiz hayotiga oid tarixiy jarayonlarni aks ettiruvchi sahna koʻrinishlari, harbiy chiqishlar, milliy Armiyamiz askarlarining jangovarlik holatlari mahorat bilan koʻrsatib berildi. Tarixiy shaxslar haqidagi sheʼrlar oʻqilib, buyuk ajodlarimiz yod etildi.
 Tarix va huquq fan oyligi doirasida boʻlib oʻtgan xotira kechasi oʻquvchilar qalbida buyuk ajdodlarimiz, vatanparvar insonlar xotirasiga hurmat, ona Vatanga cheksiz muhbbat tuygʻularini yanada mustahkamladi.

R.YOʻLDOShEVA.