Tuman hokimligida jinoyatchilik va huquqbuzarlikning oldini olish boʻyicha yigʻilish oʻtkazildi

Yoshlar oʻrtasida huquqbuzarlik va jinoyatchiliklarning oldini olish masalasi bugungi kunda yoshlarga oid davlat siyosatining dolzarb yoʻnalishlaridan biridir. Shu bois huquqni muhofaza qiluvchi organlar, vazirlik va idoralar, nodavlat notijorat tashkilotlari bilan birga jamoatchilik vakillari tomonidan yoshlarning siyosiy faolligini oshirish, huquqiy ongi va madaniyatini rivojlantirish, yoshlar oʻrtasida jinoyatchilikning oldini olish borasida ham keng koʻlamli chora-tadbirlar amalga oshirilmoqda. Tumanimizda ham jinoyatchilik va huququbuzarliklarning oldini olish borasida qator amaliy ishlar qilinmoqda.

Tuman hokimligining majlislar zalida yoshlar oʻrtasida huquqbuzarlik va jinoyatchiliklarning oldini olish masalalariga bagʻishlab oʻtkazilgan yigʻilishni tuman hokimi Sultonboy Yoʻldoshev olib bordi. Unda Qoraqalpogʻiston Respublikasi Ichki ishlar vaziri oʻrinbosari, polkovnik Oʻrozboy Qurbonboyev va Qoraqalpogʻiston Respublikasi Ichki ishlar vazirligi Jinoyat qidiruv boshqarmasi oʻta muhim ishlar boʻyicha tezkor vakili, podpolkovnik Qahramon Kamolov ishtirok etdilar. Shuningdek, hokim oʻrinbosarlari, boʻlimlar, Yoshlar ittifoqi tuman Kengashi masʼullari, fuqarolar yigʻinlari raislari ham qatnashdilar.

Tumani hokimi, 1-sektor rahbari Sultonboy Yoʻldashev oʻz soʻzida aholi oʻrtasida giyohvandlik, odam savdosi, diniy ekstremizm kabi jinoyatlarning oldini olish yuzasidan joylarda tushuntirish, targʻibot-tashviqot ishlarini muntazam olib borish, bunday salbiy holatlar sodir qilinmasligi uchun hududlarda jamoat tartibini saqlash, osoyishtalikni taʼminlash, odob-axloq qoidalariga rioya qilish va mahallalarda tartib-intizomni oʻrnatishni kuchaytirish muhim ahamiyat kasb etishini taʼkidladi. Shuningdek, yoshlarning taqdiriga befarq qaramasdan maʼnaviy-maʼrifiy, axloqiy tarbiyasiga alohida eʼtibor berish lozimligini, shu sababli har bir ota-ona farzandining kelajagiga, kelgusida vatan ravnaqiga hissa qoʻshadigan komil inson qilib tarbiyalashga oʻzini masʼul deb bilishi kerakligini ham aytib oʻtdi.

Shundan soʻng, Qoraqalpogʻiston Respublikasi Ichki ishlar vaziri oʻrinbosari Oʻrozboy Qurbonboyev soʻzga chiqib, har bir hududda sodir etilgan maʼmuriy va jinoiy holatlar aholi oʻrtasida muhokama qilinishi, jinoyat sodir etilishi sabablari oʻrganilishi kerakligi va jinoyat sodir etishga imkon bergan shart-sharoitlarni bartaraf etish choralari koʻrilishi lozimligi haqida soʻz yuritdi. Qolaversa, mast holatda avtotransport vositasini boshqarish va boshqa qoʻpol qoidabuzarliklar mahalla hamda mehnat jamoalarida muhokama etilishi muhimligini, oiladagi notinchlik, kelishmovchilik tufayli sodir etilgan ogʻir va oʻta ogʻir jinoyatlar chuqur tahlil qilinishi kerakligini alohida eʼtirof etdi. Bu turdagi jinoyatlarning oldini olish uchun hokimlik, davlat organlari va jamoatchilik tashkilotlari bilan birgalikda ish olib borish, har bir notinch oilani oʻrganib chiqish hamda ulardagi nizolar, kelishmovchiliklarni bartaraf etish choralarni koʻrish yuzasidan taklif va tavsiyalar berdi.

Yigʻilishda tuman hokimi oʻrinbosarlari Alisher Yoʻldoshev hamda Maryam Ahmedovalar soʻzga chiqib, yosh oilalar va uyushmagan yoshlar, xotin-qizlar oʻrtasida huquqbuzarliklar profilaktikasi va jinoyatchilikka qarshi kurashish boʻyicha bir qancha ishlar amalga oshirilganligi, huquqbuzarlik va jinoyatchilikning oldini olish boʻyicha mahallalarda har payshanba kuni keng targʻibot-tashviqot ishlari olib borilayotganligi xaqida maʼlumot berib oʻtdilar.

Yigʻilishda ishtirok etgan boshqa masʼullar ham bu borada oʻz fikr-mulohazalarini bildirdilar.

Charos Arslonova, tuman hokimligi Axborot xizmati rahbari.