Tabiiy fanlar boʻyicha professor-olimlar bilan uchrashuv boʻlib oʻtdi

Barchamizga maʼlumki, davlatimiz rahbarining yoshlar bilan uchrashuvida aniq belgilab qoʻyilgan vazifalar ijrosini taʼminlash maqsadida mutasaddi rahbarlardan iborat ishchi guruh tumanimizga tashrif buyurgan edi. Tashrif chogʻida ishchi guruh aʼzolari yoshlarimizning barcha jabhalarda olib borayotgan faoliyatlari bilan tanishdilar. Shu bilan bir qatorda yoshlarning sohalar yuzasidan takliflari, murojaatlari tinglandi.

Ushbu taklif hamda murojaatlardan kelib chiqib, qolaversa, bilimga chanqoq, intiluvchan, ijodkor yoshlarimizning ilm-fanga qiziqishlarini inobatga olgan holda bir guruh professor-olimlar, ilm-fan fidoyilarining tumandagi taʼlim muassasalarida yoshlar bilan uchrashuvlari tashkil etilmoqda. Uchrashuvlar davomida taʼlim sohasida faoliyat yuritayotgan oʻqituvchi hamda murabbiylar bilan oʻzaro tajriba almashish uchun umumtaʼlim maktablarida mahorat darslari oʻtkazilmoqda.

22-yanvar kuni 55-sonli umumtaʼlim maktabida shunday uchrashuvlardan biri oʻtkazildi. Uchrashuvda  Oʻzbekiston Milliy Universiteti  professorlari Joʻraqul Sattorov hamda Shavkat Ahmedovlar ishtirok etdi.

Tumanimiz aholisining 60 foizini yoshlar tashkil qiladi. Oʻquvchi-yoshlar 86 ta umumtaʼlim maktablarida taʼlim olishmoqda. Shu oʻrinda taʼkidlash kerakki, bugungi kunda tumanimiz yoshlari barcha jabhalarda faol ishtirok qilishmoqda. Oʻquvchi yoshlarning taʼlimga, ilm-fanga, bilim olishga boʻlgan qiziqishlari yuqori darajada. Bugungi kunda koʻplab amudaryolik yoshlar oliy taʼlim muassasalarida taʼlim olishmoqda hamda ilm-fan boʻyicha koʻplab yutuqlarni qoʻlga kiritishmoqda.

Qolaversa, oʻtgan yili Prezidentimiz tashabbusi bilan yetuk salohiyatli barkamol avlodni tarbiyalash maqsadida Nukus shahrida tashkil qilingan zamonaviy taʼlim maskanlaridan biri boʻlgan Prezident maktabida tumanimiz oʻquvchi-yoshlaridan 13 nafari taʼlim olish baxtiga muyassar boʻldilar. Bu esa Pespublika miqyosida jami imtihonlardan muvaffaqiyatli oʻtgan oʻquvchilarning 10 foizini tashkil qiladi. Ushbu koʻrsatkich ham tumanimiz yoshlarining bilim olishga boʻlgan qiziqishlarining yuqori darajada ekanligining yaqqol isbotidir.

Professor-olimlar bilan boʻlgan uchrashuvda tabiiy fanlar boʻyicha taʼlim beradigan 30 nafar oʻqituvchi hamda murabbiylarga mahorat darsi tashkil qilindi. Mahorat darsida taʼlim jarayonlarini tashkil qilishda anʼanaviylikdan voz kechish, oʻquvchilarga zamonaviy innovatsion pedagogik texnologiyalar asosida taʼlim berish bugungi kunning talabi ekanligi taʼkidlandi. Qolaversa, har bir mavzuni hayotiy misollar bilan tushuntirish oʻquvchilarning sifatli bilim olishlarini kafolatlashi alohida eʼtirof etildi.

 Mahorat darsi davomida oʻqituvchilar professorlarga oʻzlarini qiziqtirgan savollar bilan murojaat qildilar. Qolaversa, oliy oʻquv yurtlariga kirish koʻrsatkichlarini yuqori darajaga yetkazish uchun oʻquvchilarga qay yoʻsinda bilim berish kerakligi, taʼlim jarayonidagi samaradorlikni oshirish kabilar yuzasidan yetarli maʼlumotlarga, tushunchalarga ega boʻldilar.

Professor-olimlar bu borada maktabning yuqori sinf oʻquvchilari bilan ham suhbat oʻtkazdilar. Ochiq muloqot tarzida olib borilgan suhbat chogʻida oʻquvchilar oʻzlarini qiziqtirgan barcha savollarga toʻliq javoblarni oldilar.  

Ch.Arslonova.