Ona tabiat bagʻrida yoshlar bilan boʻlgan uchrashuv qiziqarli oʻtdi

Soʻnggi yillarda oʻsib kelayotgan yosh avlodni ona tabiatga mehr-muhabbat ruhida tarbiyalash, ularda ekologik madaniyatni shakllantirish hamda atrof-muhit muhofazasi, obodonlashtirish va koʻkalamzorlashtirish ishlariga ongli munosabatda boʻlishlarini taʼminlash maqsadida keng qamrovli ishlar amalga oshirilmoqda. Xususan, Oʻzbekiston Respublikasi oʻrmon xoʻjaligi davlat qoʻmitasi ekologiya va tabiatni muhofaza qilish davlat qoʻmitasi tomonidan olib borilayotgan tizimli ishlarning mazmun-mohiyati ham yosh avlodning yashil olam moʻʼjizalari, muammolariga oqilona yondashishini taʼminlashdan iboratdir.

Joriy yilning 17-yanvar sanasida tuman Qipchoq davlat oʻrmon xoʻjaligining Qipchoq boʻlimida tuman Xalq taʼlimi boʻlimiga qarashli 11-,29-,39-,47-,75-sonli umumtaʼlim maktablari oʻquvchilari ishtirokida ochiq tabiat bagʻrida tabiatshunoslik boʻyicha amaliy va nazariy uchrashuv tadbiri oʻtkazildi. Tabiiy oʻrmon hududida, gulxan atrofida oʻtkazilgan ushbu tadbirda yoshlar ona tabiatga munosabat, atrof-muhitni muhofaza qilish, koʻkalamzorlashtirish va obodonlashtirish yuzasidan bilim va koʻnikmalari haqida mutaxassislar bilan jonli muloqotda boʻldilar.

Tadbirda Oʻzbekiston Respublikasi Oʻrmon xoʻjaligi davlat qoʻmitasi raisining oʻrinbosari Alijon Mamatkarimov, Ekologiya va tabiatni muhofaza qilish davlat qoʻmitasi raisi oʻrinbosari Oʻlmas Sobirov, Qoraqalpogʻiston Respublikasi oʻrmon xoʻjaligi qoʻmitasi mutaxassisi Rustam Yusupov hamda tuman hokimi oʻrinbosarlari, tuman Ekologiya qoʻmitasi xodimlari, Qipchoq davlat oʻrmon xoʻjaligi mutaxassislari ishtirok etishib, oʻquvchi-yoshlarga oʻrmonlarni muhofaza qilish, saqlash va yashil hududlarning ahamiyati toʻgʻrisida keng tushunchalar berdilar. Oʻquvchi-yoshlarni qiziqtirgan savollarga Oʻzbekiston Respublikasi oʻrmon xoʻjaligi davlat qoʻmitasi raisining oʻrinbosari Alijon Mamatkarimov, Ekologiya va tabiatni muhofaza qilish davlat qoʻmitasi raisi oʻrinbosari Oʻlmas Sobirov hamda Qoraqalpogʻiston Respublikasi oʻrmon xoʻjaligi davlat qoʻmitasi mutaxassisi Rustam Yusupovlar batafsil javob berdilar.

Tadbir yakunida Qipchoq oʻrmon xoʻjaligi tomonidan 11-,29-,39-,47-,75-sonli maktablarning har biriga 40 tadan, jami 200 tup manzarali daraxt koʻchatlari berildi va ishtirokchilar oʻquvchi-yoshlar bilan birgalikda maktablar hududlariga ushbu daraxt koʻchatlarini oʻtqazdilar.
Ona tabiat bagʻrida boʻlib oʻtgan mazkur uchrashuv tadbiri oʻquvchi-yoshlarda ekologik madaniyatni yuksaltirish, yashil olamga yanada mehrli, ehtiyotkorlik bilan munosabatda boʻlish tuygʻularini yanada mustahkamladi.

Robiya YOʻLDOShEVA.