Yoshlar oʻrtasida huquqbuzarlik va jinoyatchilikning oldini olish boʻyicha yigʻilish oʻtkazildi

  Tuman hokimligining kichik majlislar zalida Respublika ishchi guruhining ommaviy uchrashuvlari doirasida Oʻzbekiston Ichki ishlar vaziri oʻrinbosari, polkovnik Rustam Hotamov yoshlar ishtirokida yigʻilish oʻtkazdi. Unda  Qoraqalpogʻiston Respublikasi Ichki ishlar vaziri Aytbay Temirxanov, Qoraqalpogʻiston Respublikasi Ichki ishlar vaziri oʻrinbosari Islom Ahmedov, tuman Ichki ishlar boʻlimi boshligʻi Ulugʻbek Xudoyberganov hamda tumanning faol yoshlari, Probatsiya boʻlimi nazoratidagi, uyushmagan, ish bilan band boʻlmagan yoshlar  qatnashishdi.

Vazir oʻrinbosari Rustam Hotamov dastlab, soʻnggi yillarda Prezidentimiz tomonidan yoshlarga qaratilayotgan eʼtibor, yaratilayotgan shart-sharoitlar haqida soʻz yuritdi. Koʻpchilik yoshlar asosan bekorchiligi, huquqiy savodxonligining pastligi, oʻzi sodir qilgan ijtimoiy xavfli qilmishini toʻgʻri baholay olmaganliklari, ushbu harakat jinoyat yoki huquqbuzarlik ekanligini anglab yetmaganliklari oqibatida shu ishlarga yoʻl qoʻyib, jinoyat sodir etayotganligini aytib oʻtdi. Soʻngra, yosh avlod oʻrtasida huquqiy ong va huquqiy madaniyatni yuksaltirish, ularga har bir jinoyat yoki huquqbuzarliklarning mazmun-mohiyati nimadan iborat ekanligini tushuntirish, ijtimoiy-siyosiy faolligini oshirish, oʻz vaqtida jinoyatchilikning oldini olishda muhim ahamiyat kasb etishini taʼkidladi.

Tuman Ichki ishlar boʻlimining xotin-qizlar masalalari boʻyicha katta inspektori Dilafroʻz Sharifova ham tegishli tashkilotlar bilan hamkorlikda yoshlar jinoyatchiligini barvaqt profilaktika qilish boʻyicha har oyda targʻibot dekadalari, tushuntirish ishlari, turli loyihalar tizimli ravishda tashkil etilayotganligini, natijada tuman hududida huquqbuzarlik va jinoyatlarni kamaytirishga erishilgani haqida maʼlumot berdi. Shuningdek, tumanda yoshlar bandligini taʼminlash, ularni turli toʻgaraklarga jalb etish hamda tarbiyasi ogʻir, jinoyat sodir etishga moyilligi boʻlgan yoshlarning ham ezgu gʻoyalari, tashabbuslari bilan tanishib, ularni amalga oshirish uchun koʻmak berilayotgani, sharoitlar yaratilayotgani haqida gapirdi.  

Yigʻilishda muqaddam jinoyat sodir etib, tuman Probatsiya boʻlimi nazoratida turgan 10 nafar yoshlar bilan alohida suhbat oʻtkazildi. Hozirgi kunda ularning qanday ishlar bilan bandligi, yashash sharoitlari va duch kelayotgan muammolar bilan qiziqdi. Ularga endilikda foydali mehnat bilan shugʻullanib, oʻz hayotlarini toʻgʻri yoʻlga solishlari, jamiyat ravnaqiga oʻz hissalarini qoʻshishlari kerakligi tushuntirildi.

Uchrashuv doirasidagi yigʻilish soʻngida yoshlar hayotidagi muammolarga doir murojaatlarni tinglandi. Ish bilan band boʻlmagan yoshlardan 6 nafari bandligini taʼminlash boʻyicha murojaat qildi. Xitoy ovulida yashovchi Doniyor Hayitboyev esa hudud yoshlari sport bilan shugʻullanishi uchun futbol maydonchasi qurmoqchi ekanligini aytib, kredit va yer maydoni ajratilishi masalasida koʻmak soʻradi. Yoshlarning murojaatlar shu yerning oʻzida oʻrganilib, bu boʻyicha mutasaddi rahbarlarga topshiriqlar berildi va ijrosi nazoratga olindi.

Barcha uchun qiziqarli oʻtgan tadbir davomida kelajagimiz yoshlar qoʻlida boʻlganligi bois ular tomonidan jinoyat, huquqbuzarlik emas, ezgu va bunyodkorlik tashabbuslari chiqishi kerakligi, bunday ishlar amalga oshirilishini taʼminlash uchun barchamiz birdek harakatda boʻlmogʻimiz kerakligi taʼkidlandi.

O.Xudoyberganova.