UChASTKALAR SAYLOVGA TAYYoR!

Amudaryo tumanidagi barcha saylov uchastkalarida 22-dekabr kuni boʻlib oʻtadigan saylovlarga qonun talablariga muvofiq puxta hozirlik koʻrildi. Uchastka saylov komsissiyalari aʼzolari saylovlarni aholining ijtimoiy faollik oʻsgan, fuqarolarning amaldagi islohotlarga, siyosiy partiyalarga talabchanligi oshgan bir sharoitda qonun talablari asosida oʻtkazishga qizgʻin hozirlik koʻrmoqdalar.

Navoiy nomli mahalla hududidagi 30-sonli maktabda joylashgan 79-saylov uchastkasida 2 ming 831 nafar saylovchi roʻyxatga olingan.

Uchastka saylov komissiyasi joylashgan bino qonunchilikda belgilangan talablar asosida jihozlandi. Shuningdek, zarur texnika vositalari – telefon, faks, nusxa koʻchirish apparati va tegishli adabiyotlar bilan taʼminlandi. Ovoz berish kabinalari, statsionar va koʻchma saylov qutilari tayyorlandi. Saylov qonunchiligiga oid maʼlumotlar, saylovchilar huquq va majburiyatlari toʻgʻrisidagi targʻibot vositalari koʻrinarli joyga osib qoʻyildi.

Uchastka saylov komissiyasi raisi Quvvatboy Niyozov, masʼullari Azimboy Duschanov, Rashid Davletov hamda boshqa aʼzolari saylovlarning ochiq, oshkora va xolislik mezonlari asosida yuqori saviyada, uyushqoqlik bilan oʻtishini taʼminlash maqsadida saylovchilarga qulay shart-sharoit yaratishga harakat qildilar.

Targʻibot-tashviqot tadbirlari tashkil qilinib, hududdagi saylovchilarga yangi Saylov kodeksi, siyosiy partiyalar, fuqarolarning huquq va burchlari, muddatida avval ovoz berish tartibi toʻgʻrisida batafsil tushunchalar berildi.

Saylovchilarning yagona elektron roʻyxati vakolatli davlat organlari tomonidan taqdim etiladigan axborot negizida shakllantirildi va uyma-uy yurish jarayonida unga aniqlik kiritildi.

Tuman Madaniyat boʻlimida joylashgan 80-sonli saylov uchastkasida ham komissiya raisi Shuhrat Yusupov va masʼullar Tursunboy Serikboyev, Oʻktam Yangiboyevlar saylovga tayyorgarlikni saylovchilarning yagona elektron roʻyxati bilan shugʻullanishdan boshlashdi. Komissiya aʼzolari uyma-uy aylanib, saylov huquqiga ega boʻlgan 2 ming 836 nafar fuqaroning maʼlumotlarini “Yagona elektron roʻyxat” bilan solishtirib chiqdilar.

Shuningdek, deputatlikka nomzodlarning saylov kampaniyasida ishtirok etishlari uchun teng sharoitlarni taʼminlash va saylovchilar bilan uchrashuvlarini tashkil etishga koʻmaklashish, ishonchli vakillarini roʻyxatga olish, tegishli guvohnomalar berish ishlariga ham komissiya tomonidan alohida eʼtibor qaratildi.

Amudaryo xizmat koʻrsatish va servis kasb-hunar kolleji binosida joylashgan 83-sonli saylov uchastkasi ham 22-dekabr kuni oʻtkaziladigan saylovlarga tayyor holatga keltirildi.

Uchastka  saylov komissiyalari zaruriy  vositalar, adabiyotlar bilan taʼminlanib, saylovchilar uchun qulay  shart-sharoitlar yaratildi. Saylov komissiyasi aʼzolari adliya organlarining mutaxassislari bilan birgalikda hududdagi mahallalar, korxonalar, taʼlim muassasalarida saylovchilar bilan uchrashuvlar oʻtkazdilar. Undan tashqari, saylovchilarining huquqiy bilimini yanada yuksaltirish va saylov madaniyatini oshirish, Saylov kodeksining mazmun-mohiyatini aholiga yetkazish, aholining oʻz konstitutsiyaviy huquqlaridan toʻgʻri foydalanib, saylovlarda faol ishtirok etishiga va daxldorlik tuygʻusini kuchaytirishga eʼtibor qaratildi.

Bir soʻz bilan aytganda, Amudaryo tumanidagi barcha saylov uchastkalari mamlakatimiz hayotidagi eng muhim ijtimoiy-siyosiy voqea – boʻlajak saylovlarga toʻliq tayyor holatga keltirildi.

O.Xudoyberganova.