Deputatlikka nomzodlar saylovchilar bilan uchrashdi

Ayni kunlarda yurtimizda muhim siyosiy jarayon – saylovlarga qizgʻin tayyorgarlik koʻrilmoqda. Butunlay yangicha muhitda, yangicha huquqiy sharoitda oʻtishi kutilayotgan joriy  yilgi saylovlarga barcha partiyalar tomonidan qizgʻin hozirlik koʻrilmoqda. Ochiq  va oshkora oʻtkazilayotgan saylovoldi targʻibot tadbirlarida partiyalarning saylovoldi dasturida ilgari surilgan maqsadlar aholining keng qatlamiga yetkazilib, unda belgilangan asosiy gʻoya va vazifalar xususida batafsil maʼlumotlar berilmoqda.

2-noyabr kuni Toshyop ovulidagi 5-sonli maktabda 10-Toshyop saylov okrugidan Xalq deputatlari tuman Kengashiga deputatlikka koʻrsatilgan nomzodlarning saylovchilar bilan uchrashuvi oʻtkazildi. Unda barcha partiyalarning tuman Kengashi rahbarlari, masʼullari, faollar hamda ushbu saylov okrugiga Oʻzbekiston Xalq demokratik partiyasi tomonidan nomzodi koʻrsatilgan Fazilat Esamurodova, tadbirkorlar va ishbilarmonlar harakati – Oʻzbekiston liberal-demokratik partiyasi tomonidan nomzodi koʻrsatilgan Sanjar Nazarov, Oʻzbekiston “Adolat” sotsial-demokratik partiyasi tomonidan nomzodi koʻrsatilgan Ilhom Polvonov, Ekologik partiya tomonidan nomzodi koʻrsatilgan Ruslan Saidjonov, “Milliy tiklanish” demokratik partiyasi tomonidan nomzodi koʻrsatilgan Mahmud Saparboyevlar oʻz ishonchli vakillari bilan qatnashdilar.

Uchrashuvda 10-Toshyop okrug saylov komissiyasi raisi Baxtiyor Sherboyev soʻzga chiqib, joriy yilgi saylovlarda hududda 2 ming nafardan ziyod saylovchi ishtirok etishi kutilayotganini, saylov uchastkasida ushbu muhim siyosiy jarayonni qonun talablari asosida yuksak saviyada oʻtkazish uchun puxta tayyorgarlik koʻrilganligi, saylovlar uchun ajratilgan xonalar belgilangan talablar asosida jihozlanib, zarur texnika vositalari va tegishli adabiyotlar bilan taʼminlangani haqida gapirdi.

Shuningdek, targʻibot uchrashuvlari Oʻzbekiston Respublikasi Saylov kodeksida belgilangan tartiblar hamda belgilangan jadval asosida tashkil etilayotgani, nomzodlarga saylovchilarni oʻz dasturlari bilan tanishtirishlari uchun teng vaqt, imkoniyat yaratib berilayotgani taʼkidlandi.

Shundan soʻng, tadbirkorlar va ishbilarmonlar harakati – Oʻzbekiston liberal-demokratik partiyasi tuman Kengashi apparat rahbari Muqaddas Beknazarova saylovlarning mamlakatimiz siyosati, xalqimiz hayotidagi ahamiyati, saylov qonunchiligidagi yangiliklar va oʻzgarishlar, saylov kodeksining mazmun-mohiyati haqida atroflicha tushuncha berdi. Xalqimizning siyosiy ongi, madaniyati jamiyatda kechayotgan yangilanish va oʻzgarishlarga monand oʻsib borayotgani, jamiyatda ochiqlik taʼminlanayotganini alohida taʼkidladi.

Uchrashuv davomida ishonchli vakillar deputatlikka nomzodlarning tarjimai holi va ish faoliyati bilan tanishtirdilar. Shundan soʻng, nomzodlar  yigʻilganlarga partiyalar va oʻzining saylovoldi dasturida belgilangan vazifalar, ularni amalga oshirish yoʻllari haqida batafsil maʼlumot berishdi.

Partiyalar va nomzodlarning dasturlarida ilgari surilgan gʻoyalar, yoshlar hayotiga doir muhim masalalar, ayniqsa, bandlikni taʼminlash, xalq uchun munosib turmush sharoitini yaratish kabi yoʻnalishlar oʻz ifodasini topganligi saylovchilarga juda manzur boʻldi. Saylovchilarni qiziqtirgan barcha savollarga deputatlikka nomzodlar tomonidan batafsil javoblar qaytarildi. 

Ozoda Xudoyberganova.