IShChI GURUH TUMANIMIZ MAKTABLARIDAGI OʻQUV-TARBIYa AHVOLI BILAN TANIShMOQDA, METODIK YoRDAM BERMOQDA

Muhtaram Yurtboshimiz Sh.Mirziyoyev shu yil 23-avgustda xalq taʼlimi sohasini rivojlantirish, oʻqituvchi mavqeini va jamiyatdagi nufuzini oshirish yuzasidan oʻtkazgan  videoselektor yigʻilishida taʼlim tizimidagi islohotlar samaradorligini oshirish qilish boʻyicha Xalq taʼlimi vazirligiga  bir qancha vazifalar topshirgan edi.

Ushbu vazifalarning ijrosini taʼminlash maqsadida respublika ishchi guruhi tuzilib, ular maktablardagi taʼlim-tarbiya ahvoli, oʻquv qoʻllanmalari bilan taʼminlanishi, pedagoglarning  kasbiy mahorati va bilimi, oʻquv muassasalarining qurilib foydalanishga topshirilishi, taʼlim jarayonlarida hokimlar va sektorlar rahbarlarining masʼuliyati kabi taʼlim jarayoniga taʼsir koʻrsatuvchi bir qancha faktorlar boʻyicha oʻrganishlar oʻtkazmoqdalar.

Ishchi guruh tarkibida Oʻzbekiston, Qoraqalpogʻiston Respublikalari Xalq taʼlimi vazirliklari masʼul xodimlari, oliy taʼlim muassasalari rektorlari, professor oʻqituvchilari bor. Ular respublikamizning shahar va tumanlaridagi  maktablarda  18-noyabrdan 30-noyabrgacha “Butun kuchni  xalq ichidan olaylik, quchoq ochib maktablarga boraylik” shiori ostida oʻtkazayotgan oʻrganishlari jarayonida  Oliy taʼlim muassasalari professor-oʻqituvchilarining “Mahorat darslari”, shuningdek “Hokim soati”, “Vazir soati” va boshqa sohalar vakillari bilan uchrashuvlar ham tashkil etiladi, pedagog kasbi nufuzini oshirish boʻyicha oʻqituvchilarni moddiy-maʼnaviy ragʻbatlantirish va 5 tashabbus boʻyicha amalga oshirilayotgan ishlar koʻrib chiqiladi va maktablardagi oʻquv-tarbiya jarayonlari sifatini oshirish maqsadida metodik yordam koʻrsatiladi.

Ishchi guruh aʼzolari - Respublika maʼnaviyat va maʼrifat markazi raisi oʻrinbosari A.Yusupov, Oʻzbekiston Respublikasi davlat jismoniy tarbiya va sport universiteti Nukus filiali direktori M.Mambetov, Xalq taʼlimi vazirligi metodisti X.Xalqnazarovlar tuman Xalq taʼlimi boʻlimi mudiri O.Yoʻldoshev hamrohligida 56-sonli va 31-sonli maktablarda boʻlishib, taʼlim sifatini oshirish, oʻqituvchining kasb mahoratini oshirishdagi asosiy vazifalari borasida muassasalar pedagogika jamoalariga metodik yordam berdilar. 76-sonli maktabda esa oʻqituvchilar nufuzini oshirish boʻyicha jamoada olib borilayotgan ijobiy ishlarni tahlil qilish, taʼlim sifatini oshirish boʻyicha oʻqituvchilarning takliflarini oʻrganishga bagʻishlangan davra suhbati oʻtkazildi.

Shuningdek, 12-sonli maktabda maʼnaviya-maʼrifiy tadbir oʻtkazildi va koʻchma kitob savdosi tashkil etilib, maktabga kitoblar toʻplami sovgʻa qilindi. Tadbirda faxriy oʻqituvchilar ham ishtirok etdilar.

Ishchi guruh aʼzolari 85-sonli maktab oʻqituvchilar jamoasiga dars jarayonida multimediya vositalaridan samarali foydalanish, oʻquvchilarning kitobxonlik madaniyatini oshirish, oʻqituvchi mahoratini yuksaltirishdagi muhim vositalar xususida metodik yordam berdilar.

Shuningdek, Oʻzbekiston Respublikasi davlat jismoniy tarbiya va sport universiteti Nukus filiali oʻqituvchilari R.Reymova, R.Yernazarova va Xalq taʼlimi vazirligi metodisti F.Xalqnazarovlar 31-sonli maktab 11-sinf oʻquvchilari uchun biologiya fanidan “Mahorat darsi” oʻtishib, 16-sonli maktab oʻqituvchilariga dars jarayonida turli metodlardan foydalanib, oʻquvchilar bilimini baholash borasida metodik yordam berdilar. 40-sonli maktabda oʻtkazilgan “Sogʻlom turmush tarzini shakllantirishda shaxsiy gigiyena” mavzusidagi davra suhbati jonli muloqot tarzida qiziqarli oʻtdi. 76-sonli maktab jamoasiga biologiya fanini oʻqitish boʻyicha metodik yordam berildi.

Ishchi guruhning taʼlim muassasalari faoliyatini oʻrganish jarayonidagi koʻrsatayotgan metodik yordamlari, tavsiyalari taʼlimdagi islohotlar samaradorligini oshirishga xizmat qiladi.

Oygul Rajabova.