“Oila va mahallalarda maʼnaviy-maʼrifiy tadbirlarni tizimli tashkil etishda jamoat va davlat tashkilotlari hamkorligi” mavzusida oʻquv-seminari tashkil etildi

Bugungi kunda yoshlarimizning erishayotgan yutuq va marralarini koʻrib, birdek quvonamiz. Ayniqsa, sport va ilm-fan bobidagi muvaffaqiyatlari har qancha tahsinga loyiq. Ammo shunga qaramay, yosh avlod tarbiyasi bilan bogʻliq muammolar ham koʻzga tashlanayotir. Xususan, oilaviy ajrashishlar, jinoyat va huquqbuzarliklar koʻpayishi, milliy urf-odat va qadriyatlarga boʻlgan hurmatsizlikning kuchayishi, aldamchi gʻoyalar ketidan ergashib ketish holatlari ortgani barchani hushyorlikka chogʻlamoqda. Ana shu hayotiy zarurat hamkorlik dasturi ishlab chiqildiki, ular mahallalar va oilalarda ijtimoiy-maʼnaviy muhitni sogʻlomlashtirish orqali yoshlarni Vatanga sadoqatli insonlar qilib kamolga yetkazishda muhim ahamiyat kasb etadi. Shu maqsadni amalga oshirish yuzasidan joylarda targʻibot-tashviqot tadbirlari oʻtkazilmoqda.

Xususan, 2019-yil 7-noyabr kuni Amudaryo tuman hokimligi majlislar zalida “Oila va mahallalarda maʼnaviy-maʼrifiy tadbirlarni tizimli tashkil etishda jamoat va davlat tashkilotlari hamkorligi” mavzusida oʻquv-seminari boʻlib oʻtdi.

Oʻquv-seminarda Fuqarolarning oʻzini-oʻzi boshqarish organlari faoliyatini muvofiqlashtirish boʻyicha Qoraqalpogʻiston Pespublikasi va Amudaryo tumani kengashlari maʼullari, hamkor tashkilotlar, yaʼni tuman hokimligi, Pespublika Maʼnaviyat va maʼrifat markazi tuman boʻlinmasi, “Nuroniy” jamgʻarmasi tuman boʻlimi, Yoshlar ittifoqi, tuman ichki ishlar boʻlimi, “Oila” ilmiy-amaliy markazi tuman boʻlimi masʼullari ishtirok etib, kun tartibidagi masala boʻyicha maʼruzalar qildi.

Oʻquv-seminari ovul va mahalla fuqarolar yigʻinlari raisi hamda masʼul kotiblari, nuroniylar, xotin-qizlar va uyushmagan yoshlar vakillari ishtirok etib, Oilalarda mehr-oqibatni mustahkamlash va ajrimlarning oldini olish, toʻy va marosimlar oʻtkazilishini tartibga solish kabi bugungi kunning dolzarb masalalarini tahlil qilishdi hamda hayotiy misollar bilan keng tushunchalar berdilar.

Oʻquv-seminarda oilalar va mahallalarda maʼnaviy-maʼrifiy tadbirlarni tizimli tashkil etish, jamoat va davlat tashkilotlari oʻrtasida bir-birini toʻldiradigan, samarali hamkorlikni joriy etish, ushbu yoʻnalishda jamoat tashkilotlari oʻrtasida imzolangan hamkorlik dasturida belgilangan vazifalar keng muhokama etildi.

Oʻz navbatida, dasturda aholining maʼnaviy tushunchalarini boyitish, milliy-axloqiy va huquqiy tarbiyasini, boy adabiy merosimizga boʻlgan mehrini shakllantirishda mahalla institutining rolini yanada oshirish, xususan, toʻy va boshqa oilaviy marosimlarni ixcham va kamxarj oʻtkazish masalasiga jiddiy eʼtibor qaratildi. Bu borada Oliy Majlis Qonunchilik palatasi va Senati Kengashlarining “Toʻylar, oilaviy tantanalar, maʼraka va marosimlar oʻtkazilishini tartibga solish tizimini yanada takomillashtirish toʻgʻrisida”gi qoʻshma qarori dasturilamal boʻlib xizmat qiladi.

Tan olish kerak, bugun ayrim yigit-qizlarimiz mustaqil hayotga tayyor boʻlmasdan turmush qurish holatlari koʻp kuzatilmoqda. Buning oqibatini tobora oshib borayotgan ajralishlarning soni ham koʻrsatib turibdi. Afsuski, bugun toʻy-hasham, marosimlarimizda ham orzu-havaslarga berilib, ota-bobolarimiz amal qilgan urf-odatlarga amal qilmasdan, ortiqcha rasm-rusumlar, dabdababozlik, begona “urf-odatlar”ga koʻr-koʻrona ergashish holatlari ham koʻp uchramoqda.

Bunday illatlarga barham berish har birimizning fuqarolik burchimizdir. Zero, hayotimizda uchrayotgan ayrim kamchilik va muammolarni birgalikda hal qilsak, salbiy holatlarning oldini olishga qaratilgan imkoniyat va harakatlarimizni birlashtirsak, mahallamiz va yurtimiz tinch, turmushimiz esa yanada farovon boʻladi.

Charos Arslonova,

Tuman hokimligi axborot xizmati rahbari.