“BESh TAShABBUS – BESh IMKONIYaT” DEB NOMLANGAN YoShLAR FESTIVALI BOʻLIB OʻTDI

Muhtaram Prezidentimizning yoshlar maʼnaviyatini yuksaltirish va boʻsh vaqtlarini mazmunli tashkil etish yuzasidan ilgari surgan 5 ta muhim tashabbusi ijrosi ijtimoiy, maʼnaviy- maʼrifiy sohalardagi ishlarni yangi tizim asosida yoʻlga qoʻyish, yoshlarga eʼtiborni kuchaytirish, ularni madaniyat, sanʼat, jismoniy tarbiya va sportga keng jalb qilish, ularda yangi, zamonaviy axborot texnologiyalaridan foydalanish koʻnikmalarini shakllantirish, yoshlar oʻrtasida kitobxonlikni keng targʻib etish, xotin-qizlarning kasb-hunarlarni egallab, hayotda oʻz oʻrinlarini topishlariga xizmat qilishi bilan ahamiyatlidir.

Yoshlarning porloq kelajagi, maʼnaviyatimiz rivoji uchun xizmat qiluvchi 5 ta muhim tashabbusni amaliyotga tatbiq etish borasida mamlakatimizda amalga oshirilayotgan ishlar koʻlami tobora ortmoqda. Qoraqalpogʻiston Respublikasi Vazirlar Kengashi  yoshlarning boʻsh vaqtlarini mazmunli tashkil etish, ularni sanʼat, madaniyat, sport-sogʻlomlashtirish muassasalariga keng jalb qilish, yoshlar orasida har qanday huquqbuzarliklar, jinoyatlar sodir etilishining oldini olish va Prezidentimiz belgilab bergan 5 ta tashabbus ahamiyatini targʻib qilish maqsadida shu yilning sentyabr-oktyabr oylarida Respublikamiz miqyosida “Besh tashbbus – besh imkoniyat” nomli yoshlar festivalini oʻtkazish yuzasidan qaror qabul qilgan edi.

9-oktyabr kuni mazkur qarorga muvofiq tumanimizda ham yoshlar festivali boʻlib oʻtdi.

Festivalda moderator Minaj Mambetov, sanʼatkor, “Nihol” mukofoti sovrindori Shiraz Tursunboyev, “Zulfiya” nomidagi davlat mukofoti sovrindori Ulboʻlsin Oʻrinboyeva, yosh aktrisa Alima Ramatullayeva, TATU 1-kurs magistranti , “Kelajak bunyodkori” medali sohibi David Qonarboyev, “Qaraqalpaqstan jaslari” gazetasi muxbiri Shukurbay Siypatdinov, reportyor Karimjon Abibullayevlardan iborat targʻibot guruhi aʼzolari ishtirok etishdi.

Ular Yoshlar ittifoqi tuman Kengashi masʼul xodimlari bilan birgalikda dastlab  Mangʻit shahridagi 9 -sonli Bolalar musiqa va sanʼat maktabida boʻlishib, oʻquvchilar bilan uchrashdilar. Festival doirasida “Siz sevgan adabiy qahramonlar” mavzusida suhbat oʻtkazilib, maktabning tasviriy sanʼat sinflarida tarbiyalanayotgan bolalar ijodiy koʻrgazmasi namoyish qilindi. Mehmonlar oʻquvchilarning ijodiy ishlariga yuksak baho berishdi.

Festival doirasida “Tamara- Feruza” xususiy korxonasida  yosh ayol-qizlar bilan kasb-hunarning inson hayotidagi oʻrni, mamlakatimizda yoshlar tadbirkorligiga yaratilayotgan imkoniyatlar haqida maroqli suhbat oʻtkazildi. Aytish kerakki, mazkur korxona yosh qizlarni ish bilan taʼminlashda jonbozlik koʻrsatib kelmoqda.

Qilichboy ovulidagi sunʼiy qoplamali mini futbol maydonchasida festival doirasida tumanimiz maktablari oʻquvchilarining futbol musobaqalari,  37-sonli maktabda esa oʻquvchi qizlar oʻrtasida voleybol musobaqalari oʻtkazildi. Gʻoliblar targʻibot guruhi aʼzolari ishtirokida Yoshlar ittifoqi tuman Kengashi va homiylar tomonidan ragʻbatlantirildi.

Tumanimizdagi 40-sonli maktabning 9-sinfi oʻquvchilari uchun David Qonarboyevning kompyuter texnologiyalari va internetdan samarali foydalanish borasidagi mahorat darsi oʻquvchilarning bilimi va tushunchalari yanada kengayishiga xizmat qildi.

Festival doirasidagi yana bir tadbir Qipchoq ovulidagi 21-sonli Bolalar musiqa va sanʼat maktabida  boʻlib oʻtdi. Maktab oʻquvchilaridan tashqari koʻplab ovul yoshlarini jamlagan uchrashuvda targʻibot guruhi aʼzolarining muhtaram Yurtboshimiz ilgari surgan 5 ta tashabbus doirasida mamlakatimizda va Qoraqalpogʻistonda amalga oshirilayotgan ishlar va bundan koʻzlangan ulugʻvor maqsadlar haqidagi qilgan maʼruzalari ishtirokchilarda ulkan taassurotlar qoldirdi.

Maktab oʻquvchilari namoyish etgan kontsert dasturi bugungi kunda mamlakatimizda yoshlarga qaratilayotgan gʻamxoʻrliklar ularning hayotida qanday namoyon boʻlayotganini yaqqol koʻrsatdi.

 “Besh tashabbus – besh imkoniyat” deb nomlangan yoshlar festivali doirasida oʻtkazilgan barcha tadbirlar amudaryolik yoshlarda ulkan taassurotlar qoldirdi.

Oygul RAJABOVA.