YoSh OILALAR HAMIShA DAVLATIMIZ EʼTIBORIDA

Yoshlar – kelajagimiz, mamlakat taraqqiyotining yetakchi kuchi.

Bugungi kunda mamlakatimizda yoshlarga eʼtibor masalasi davlat siyosatining  ustuvor yoʻnalishiga aylandi. Ularning ijtimoiy-siyosiy faolligini oshirish, hayotda, faoliyatda, ilm-fanda yuqori natijalarga erishayotgan yoshlarni doimiy ragʻbatlantirib, qoʻllab-quvvatlash tizimli amalga oshirilmoqda. Ayniqsa, yosh oilalarga koʻrsatilayotgan eʼtibor yoshlar hayotiga avvalo xotirjamlik, koʻngillariga quvonch bagʻishladi. Joriy yilning 11-sentyabr sanasida qabul qilingan Oʻzbekiston Respublikasi Vazirlar Mahkamasining “Mamlakat ijtimoiy hayotida faol ishtirok etayotgan yosh oilalarni uy-joy bilan taʼminlashni takomillashtirish toʻgʻrisida”gi 760-sonli Qarori ham mamlakatimizda istiqomat qilayotgan ibratli yosh oilalarni qoʻllab-quvvatlashga qaratilgani bilan ahamiyatlidir. Qarorga koʻra, 2019-yilda mamlakat ijtimoiy hayotida faol ishtirok etib, alohida namuna koʻrsatayotgan yosh oilalarga 2116 ta arzon uy-joylar imtiyozli ipoteka kreditlari asosida berilishi nazarda tutilgan.

Tumanimizda esa oʻtgan 2018-yilda 3 ta ana shunday ibratli yosh oilalar mavjud imtiyozlardan foydalangan holda arzon uy-joylar bilan taʼminlangan edi. 2019-yilda esa ijtimoiy hayotda faol ishtirok etayotgan, oʻzlari faoliyat yuritayotgan sohalarda katta yutuqlarni qoʻlga kiritgan 8 ta yosh oilaning  tanlov asosida roʻyxati shakllantirilib, qurilishi tugallanish arafasida turgan “Yoshlar uyi”dan kvartira bilan taʼminlanishlari uchun hujjatlari taxt qilib qoʻyildi.

Xoʻsh, “Yoshlar uyi”dan kvartira sohibi boʻlgan yosh oilalar uchun qanday imtiyozlar mavjud?

Avvalo shuni aytish kerakki, Qarorda aytilishicha, 2019-yilda qurilayotgan uy-joy qiymati dastlabki badalining 65 foizigacha boʻlgan qismi OʻzYoI mablagʻlari hisobiga  7-yil muddatga Oʻzbekiston Respublikasi Markaziy bankining qayta moliyalashtirish stavkasining 50 foiziga teng boʻlgan foizli stavkada ssuda tariqasida ajratiladi.

Shuningdek, Qarorla qayd etilishicha, mamlakat ijtimoiy hayotida faol ishtirok etib, alohida namuna koʻrsatayotgan yosh oilalarga uzoq muddatli ipoteka kreditlari berishda bir qator imtiyozlar belgilangan. Yaʼni, ipoteka krediti boʻyicha birinchi besh yil nihoyasiga yetgandan keyingi butun muddat uchun hisoblanadigan Oʻzbekiston Respublikasi Markaziy bankining qayta moliyalashtirish stavkasiga teng miqdordagi foizlarning 25 foizi OʻzYoI mablagʻlari hisobiga toʻlanadi.

Bu kabi imtiyozlar mamlakat ijtimoiy hayotida faol ishtirok etib, oʻzlari ishlayoyotgan sohalar rivojiga munosib hissa qoʻshayotgan, sportda, sanʼat va madaniyatda, iqtisodiyotda hamda boshqa sohalarda katta yutuqlarni qoʻlga kiritayotgan namunali yosh oilalar uchun nafaqat imtiyoz, balki ham maʼnaviy ragʻbat, ham yuksak eʼtibordir.

Mahmud ShERMETOV, OʻzYoI tuman Kengashi raisi.