“PISA xalqaro baholash dasturida ham muvaffaqiyatli ishtirok etamiz!”

Maktab — yosh avlodga taʼlim va tarbiya beriladigan qutlugʻ dargohdir. Bu maskanda yoshlar ongiga dastlabki bilim asoslari singdiriladi, tafakkuri boyitiladi. Shu bilan birga dunyoqarashi kengaytirilib, milliy-maʼnaviy qadriyatlar ham shakllantirilib boriladi.

Taʼlim muassasalari orasida yetakchilar qatorida kelayotgan tumandagi 40-sonli umumtaʼlim maktabida ham oʻquvchilarga sifatli taʼlim berilishi uchun yetarli sharoit yaratilgan. Ayni paytda muassasada tahsil olayotgan 1300 nafarga yaqin oʻquvchiga 98 nafar oʻqituvchi taʼlim berib kelmoqda. Oʻqituvchilarning 7 nafari oliy toifali, 17 nafari birinchi toifali, 24 nafari ikkinchi toifali, 50 nafari esa mutaxassis-pedagoglar hisoblanadi. Ulardan 1 nafari “Qoraqalpogʻiston Respublikasi xalq oʻqituvchisi” faxriy unvoniga, 2 nafari “Oʻzbekiston Xalq taʼlimi aʼlochisi” va 4 nafari “Qoraqalpogʻiston Respublikasi xalq taʼlimi aʼlochisi” koʻkrak nishonlariga ega.

Oʻtgan 2018-2019 oʻquv yili maktab pedagogika jamoasi uchun yutuqlarga boy yil boʻldi – 11 nafar oʻquvchi fanlar olimpiadasining tuman bosqichi gʻolibligini qoʻlga kiritishdi. Ular orasida 9-sinf oʻquvchisi Anora Gʻulomovaning biologiya fanidan Qoraqalpogʻiston Respublikasida faxrli 1-oʻrinni egallaganini alohida eʼtirof etish darkor.

Bilimlar bellashuvining hududiy va tuman bosqichlarida ham 40-sonli maktab oʻquvchilari faol qatnashdilar. Jamoa sharafini himoya qilgan 31 nafar oʻquvchi 2244 ball toʻplab, oʻrtacha samaradorlik boʻyicha tuman maktablari orasida peshqadamlik qildilar.

Ulardan 8-sinf oʻquvchilari Shohruh Yoʻldoshev matematika fanidan, Lobar Yoʻldosheva ona tili va adabiyoti fanidan, Charos Reyimova rus tili fanidan, Goʻzaloy Saburova biologiya fanidan tumanda 1-oʻrinni egallab, Qoraqalpogʻiston Respublikasi bosqichi gʻolibi boʻldilar. Maktabning faol va iqtidorli oʻquvchilari “Yosh kitobxonlar” koʻrik-tanlovining tuman, Qoraqalpogʻiston bosqichi gʻolibi sifatida Oʻzbekiston Respublikasi bosqichida qatnashishdi hamda “Eng ijodkor jamoa” sifatida eʼtirof etildilar. “Huquq bilimdonlari” koʻrik-tanlovida ham oʻquvchilar tumanda birinchi, hududiy bosqichda ikkinchi oʻrinni egalladilar.

Oʻtgan oʻquv yilida maktabning 9-sinfida tahsil olgan Shohruh Yoʻldoshev, 7-sinfida oʻqigan Abror Shukurullayevlar sinovlardan muvaffaqiyatli oʻtib, Qoraqalpogʻistondagi Prezident maktabiga qabul qilindi. Shu qatori maktab jamoasi turli sport musobaqalarida katta yutuqlarni qoʻlga kiritib kelayotgan Aziza Oʻrinboyeva, Amirbek Gʻafforov, Jonibek Gʻafforov, Sevinchoy Safarboyeva, Gulsevar Safarboyeva kabi sportchi, chempion oʻquvchilari bilan ham faxrlanishadi.

– Maktabimiz taʼlim sifati koʻrsatkichlariga koʻra, doim oldingilar safida kelmoqda, – deya iftixor bilan soʻzlaydi maktab direktori, Qoraqalpogʻiston xalq oʻqituvchisi Sanobar Xoʻjamurodova. – Bu yil ham yuqori ball bilan tumanda birinchi oʻrinni egalladik. Taʼlim sifatini nazorat qilish inspektsiyasi tomonidan oʻtkazilgan sinov-larga koʻra, maktabimiz Qoraqalpogʻistonda 77 ta maktab orasidan 5-oʻringa, Oʻzbekistonda esa 956 ta maktab ichida 207-oʻringa oʻtishga muvaffaq boʻldi. Mazkur oʻquv yilida ham katta marralarni koʻzlab, olgʻa qadam tashlashda davom etamiz.

Maktabdagi oʻqituvchilarning barchasi oʻquvchilarning bilimlarini oshirishda, qobiliyatlarini rivojlantirishda bor kuch va mahoratlarini safarbar qilib kelishmoqda.

Oʻqituvchilarning jamiyat oldidagi masʼuliyati ulkan. Muallimlar buni chuqur his qilgan holda oʻz vazifalarini fidoyilik va sharaf bilan ado etishadi. Bu ulugʻ zotlarning mashaqqatli, ammo sharafli mehnati yuksak ehtiromga loyiq. Yosh avlodni komil inson qilib tarbiyalash yoʻlida mehnat qilayotgan ustoz va murabbiylarni har qancha ardoqlasak, qadrlasak arziydi. Zero, har bir inson qalbida oʻzini bilim dunyosi sari boshlagan, tafakkurini boyitib, dunyoqarashini kengaytirgan, oʻzligini tanitib, saodatga yetaklagan ulugʻ insonga ehtirom tuygʻusi bilan yashaydi.

O.Xudoyberganova.