OʻQUVChILARGA HAM, OʻQITUVChILARGA HAM USTOZ

Joriy yilning 10-14-sentyabr kunlarida tumanimizdagi 67-sonli maktab ona tili va adabiyot fani oʻqituvchisi Habiba Qoʻshayeva “Yilning eng yaxshi fan oʻqituvchisi – 2019” koʻrik-tanlovining mamlakat bosqichida ishtirokchilar bilimi, kasb mahoratini baholovchi hakamlar safida ishtirok etdi. Oʻz fani boʻyicha quyi bosqichlarda gʻoliblikka erishib, yakuniy zinaga yetib kelgan hamkasblarining har bir chiqishini zoʻr maroq bilan kuzatdi, zavqlandi, yutuq va kamchiliklariga xolisona yondashib, haqqoniy baholashga intildi . Shu barobarida oʻqituvchilarga, xususan, xalq taʼlimiga qaratilayotgan eʼtibor hamkasblari faoliyatida qanday namoyon boʻlayotganini yaqqol his qildi.

– Tanlovdan olgan taassurotlarim meni bilimlarimni muntazam oshira borib, darslarim samaradorligini yana ham oshirishga undadi, – deydi Habiba Qoʻshayeva.

U aslida ham tajribali muallimlardan. Shuning uchun ham dars bergan oʻquvchilari ona tili va adabiyot darsini puxta oʻzlashtirishadi. Har yili oʻquvchilar bilimlari sinovdan oʻtkaziladigan bellashuvlarda gʻoliblar safida uning ham oʻquvchilari boʻladi. 2017-2018 oʻquv yilida Hulkaroy Xudoyorova fanlar olimpiadasining tuman, Qoraqalpogʻiston bosqichlarida birinchi oʻrinni egallab, yakuniy bosqichda faol qatnashdi. Surayyo Sobirova esa tumanda kuchli oʻntalikka kirdi. 2019-yilda yana bir oʻquvchisi Sveta Xudoyorova “Yosh kitobxon” koʻrik-tanlovining Qoraqalpogʻiston bosqichida 3-oʻrinni egallab, tashkilotchilar tomonidan 40 ta badiiy kitob bilan taqdirlandi.

Habibaning maktabda boʻsh vaqti deyarli boʻlmaydi. Chunki gumanitar fanlar uslubbirlashmasi raisi sifatida oʻqituvchilar bilan ham ishlashib, taʼlim berishdagi yangiliklar bilan tanishtirib boradi, uslubiy koʻmak beradi, barchani bolalarni oʻqitish uchun oʻzlari tinimsiz oʻqib-oʻrganib borishga undaydi, darslar jarayonini nazorat qiladi.

1999-yilda Nukus davlat pedagogika institutini tugatib kelganidan beri 67-sonli maktabda samarali mehnat qilib kelayotgan Habiba Qoʻshayevaning shu boisdan ham jamoasida, shogirdlari orasida mavqei yuksak. Ota kasbini tutgan mahoratli muallimaning rejalari ulugʻ – juda boy va jozibali ona tilimizni oʻquvchilarga chuqur oʻrgatish, ularning koʻnglida ona tilimizga hurmat uygʻotish, sofligini asrashga ruhlantirish. Biz uning ezgu maqsadlar yoʻlidagi mehnatlariga baraka tilab qolamiz.

Oygul RAJABOVA.