ShOGIRDLARIM ALBATTA VATAN FIDOYILARI BOʻLIShADI

Men 27-yildan buyon “Numana” mahallasidagi 52-sonli umumtaʼlim maktabida yosh avlodga taʼlim-tarbiya berishdek sharafli ishda faoliyat koʻrsatayapman. Taʼlim jarayonida zamon bilan hamnafas boʻlib, oʻqitishning ilgʻor uslublarini qoʻllagan holda darslarni tashkil qilib, axborot kommunikatsiya texnologiyalaridan unumli va samarali foydalangan holda sifatli taʼlim berishga harakat qilmoqdaman.

Bir necha yillardan buyon maktab direktorining maʼnaviy-maʼrifiy ishlar boʻyicha oʻrinbosari lavozimida faoliyat koʻrsatib, oila, mahalla va taʼlim muassasasi hamkorligi kontseptsiyasi doirasida mahalla faollari bilan hamkorlikda tashkil etilgan “Ota-onalar universiteti”da yetakchi pedagog sifatida yosh ota-onalarga bola tarbiyasi boʻyicha tushunchalar berishga ham vaqt ajratayapman.

Bugungi kunda muhtaram Prezidentimiz Sh.Mirziyoyevning taʼlim tizimiga qaratayotgan eʼtiborlaridan ruhlanib, yurtboshimiz tomonidan ilgari surilgan 5 ta tashabbusni roʻyobga chiqarishda jamoamiz bilan hamjihatlikda ish olib bormoqdamiz.

18-Xitoy saylov okrugidan Xalq deputatlari tuman Kengashi deputati sifatida tumanimizni va mahallamizni rivojlantirish borasidagi ishlarda ham faol ishtirok etishga harakat qilaman.

Har bir deputat faoliyatining asosiy yoʻnalishi bu – saylovchilar bilan yaqin aloqada boʻlishdir. Shu boisdan ham men oʻz okrugimda yigʻilishlar oʻtkazib, saylovchilarim bilan uchrashuvga, ularning muammolarini, talab hamda istaklarini oʻrganishga eʼtibor qarataman.

Bugun oʻqituvchi sifatida yosh avlodga taʼlim-tarbiya berishda faol ishtirok qilayotganimdan ham, deputat sifatida el xizmatiga hamisha kamarbasta boʻlayotganimdan ham nihoyatda baxtiyorman.

Fursatdan foydalanib, barcha hamkasblarimni 1-oktyabr – oʻqituvchi va murabbiylar kuni bayrami bilan tabriklab, ularga yosh avlodga taʼlim-tarbiya berishdek, ezgu ishlarida muvaffaqiyatlar tilayman.

Gulmirza BOBOJONOV,

52-sonli umumtaʼlim maktabi oʻqituvchisi,

Xalq deputatlari tuman Kengashi deputati.