Adliya boʻlimi tomonidan fuqarolarning 84 mln. 182 mingdan ziyod pul mablagʻlari undirib berildi

Inson huquqlarini himoya qilish, aholining huquqiy savodxonligini oshirish, qabul qilinayotgan qonunlar va boshqa normativ-huquqiy hujjatlarning mazmun-mohiyati va ahamiyatini ijrochilarga yetkazish borasida Adliya boʻlimi tomonidan qator chora-tadbirlar amalga oshirilmoqda. Shuningdek, mahalliy hokimiyat organlari qarorlarini huquqiy ekspertizadan oʻtkazish, tashkilotlarning yuridik xizmatlari faoliyatini muvofiqlashtirish, nazorat qilish va metodik taʼminlash kabi muhim vazifalarni ham bajarib kelmoqda.

Oʻtgan 6 oy davomida boʻlimga 131 ta ariza va shikoyat kelib tushdi. Murojaatlarning 118 tasi hal qilindi. Ulardan 72 tasi qanoatlantirildi, 9 tasi rad etildi, 53 tasiga huquqiy tushuntirish berlib, 13 tasi taalluqliligi boʻyicha tegishli tashkilotlarga joʻnatildi.

Shu paytga qadar 150 nafar fuqaro shaxsiy qabulga kirgan boʻlsa, uning 50 tasini sayyor qabullar davomidagi murojaatlar tashkil qiladi. Murojaatlarning 134 tasi hal qilingan boʻlib, shundan 72 tasi qanoatlantirildi. Taalluqliligi boʻyicha  13 tasi tegishli tashkilotlarga yuborildi, 53 nafar murojaatchiga huquqiy tushuntirish berilgan boʻlsa, 3 ta murojaat koʻrilmasdan qoldirildi.

Oʻtgan davr mobaynida boʻlim tomonidan tuman Maʼmuriy va Fuqarolik sudlariga fuqarolarning manfaati boʻyicha 32 ta daʼvo arizasi kiritildi. Mazkur arizalarning barchasi qanoatlantirilgan boʻlib, natijada 4 nafar fuqaroning pensiya tayinlanishdagi, 25 nafar fuqaroning farzandlariga tugʻilganlik haqidagi guvohnomalarni olish, 3 nafar fuqaroning ish haqi masalasidagi muammolariga chek qoʻyildi. Ayni paytda 1 ta fuqarolik va 1 ta maʼmuriy ish koʻrib chiqilish jarayonida.

Undan tashqari, inson huquqlarini himoya qilish, yuridik xizmat faoliyatini tashkil etish borasida, ijtimoiy-iqtisodiy sohalarda huquqni qoʻllash amaliyoti boʻyicha 38 ta idora-tashkilotlarda 14 ta oʻrganishlar oʻtkazildi. Oʻrganishlar davomida aniqlangan qonunbuzilish holatlar boʻyicha idora-tashkilotlarga taqdimnomalar kiritildi. Taqdimnomalar asosida 21 nafar shaxs intizomiy javobgarlikka tortildi va fuqarolarning 84 mln. 182 mingdan ziyod pul mablagʻlari undirib berildi.

Boʻlim tomonidan norma ijodkorligi sohasida qonunchilikni takomillashtirish yuzasidan 7 ta taklif berilib,  tuman hokimining 3 ta qarori huquqiy ekspertizadan oʻtkazildi. Shuningdek, 43 ta davlat organlari va tashkilotlariga 537 ta qonun va qonun osti aktlari yetkazildi. Shu qatorda 4 ta idora-tashkilotga qonun va boshqa normativ hujjatlar ijrosini tashkil etish boʻyicha uslubiy rahbarlik qilindi.

Yurtimizda kechayotgan ulkan oʻzgarishlar va yangilanishlar davrida avvalo inson huquqlarini himoya qilish va ragʻbatlantirish birlamchi vazifalardan sanaladi. Aholining inson huquqlari boʻyicha bilimini, madaniyatini oshirish, himoya qilish va uni taʼminlash har bir davlat organi qatorida Adliya boʻlimining ham asosiy vazifasi hisoblanadi.

O. Xudoyberganova.