Oq oltin ovulidagi 1 mlrd. 418 mln. soʻm mablagʻ evaziga taʼmirlangan MTM qanday faoliyat yuritmoqda?
Mamlakatimizda uzluzsiz taʼlim yagona tizimining muhim boʻgʻini sifatida maktabgacha taʼlim tizimiga alohida eʼtibor qaratilmoqda. Faoliyat olib borayotgan maktabgacha taʼlim muassasalarining moddiy texnika bazasini mustahkamlash, bolajonlarning yayrab-quvnab ulgʻayishlari uchun munosib sharoitlarni yaratish, maktabgacha taʼlim muassasalarida mehnat qilayotgan pedagog xodimlarning nufuzini oshirish, ular mehnatiga munosib haq toʻlashini yoʻlga qoʻyish borasidagi saʼy-harakatlar oʻzining quvonarli samaralarini berayotir. Maktabgacha taʼlim muassasalari faoliyati takomillashtirilib, bolajonlarni har tomonlama intellektual, maʼnaviy-estetik va jismoniy rivojlantiruvchi zamonaviy taʼlim dasturlari va texnologiyalari taʼlim-tarbiya jarayoniga joriy etilmoqda.
Sohaga joriy etilayotgan islohotlar Oq oltin ovulida faoliyat koʻrsatayotgan 9-sonli maktabgacha taʼlim muassasasida ham oʻz aksini topmoqda. Ayni kunda ushbu maskanda ovul aholisining 75 nafar bolalari taʼlim-tarbiya olishayapti.
Muassasa binosida 2018-yil Investitsiya dasturiga muvofiq 1 mlrd. 418 mln. soʻmlik qurilish-taʼmirlash ishlari amalga oshirildi. Bino zamonaviy jihozlar bilan taʼminlanganligi tufayli bu yerda 3 ta guruh tarbiyalanuvchilari uchun alohida oʻquv, dam olish, ovqatlanish kundalik mashgʻulotlarni olib borish uchun munosib sharoitlar yaratildi.
Bolajonlarga “Ilk qadam” davlat oʻquv dasturi asosida taʼlim berilmoqda. 5 nafar tarbiyachilarning 4 nafari oliy maʼlumotli mutaxassislar boʻlib, oʻz sohasi boʻyicha muntazam malaka va bilimlarini oshirib kelishmoqda. Mavjud oʻyin maydonchasi tarbiyalanuvchilarning jismoniy va aqliy jihatdan chiniqishiga xizmat qiluvchi oʻyinlar oʻynab, vaqtini koʻngilli oʻtkazishlariga xizmat qiladi. Qurib bitkazilgan yozgi basseyn yaqinda ishga tushirilishi rejalashtirilmoqda.
Bolalar tasavvurini boyitishga xizmat qiladigan har bir xonadagi jihozlar, bezaklar, albatta ularning eʼtiboridan chetda qolmaydi. Muassasada tashkil etilgan “Zumradoylar davrasi”, shuningdek, shaxmat-shashka toʻgaraklari mashgʻulotlari bolajonlar uchun ayniqsa qiziqarli kechadi. Soha mutaxassisi boʻlgan Nurbika Pahimova mashgʻulotlarni kichkintoylar oson oʻzlashtirishlari uchun qiziqarli tarzda olib boradi. Shuningdek, Adolat Tulyashovaning musiqa mashgʻulotlarida ham kichkintoylarning vaqti zavqli oʻtadi. Ular yoshlariga mos yengil raqslar, qoʻshiqlar va hatto pianino chalishni ham oʻrganishyapti.
- Bizning asosiy maqsadimiz bolalarni sogʻlom ovqatlantirib, aqliy rivojlantirib, maktab taʼlimiga sifatli tayyorlab, kelgusida barcha fanlarni yaxshi oʻzlashtirib ketishlari uchun zamin yaratishdir, - deydi muassasa mudirasi Sevara Oʻrozboyeva.
O.Pajabova.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
