FAOLIYaTI HAVASGA LOYIQ YeTAKChI

Har bir odamning umri jamiyatga daxldordir. Chunki har kim oʻzi yashayotgan jamiyat ravnaqi yoʻlida mehnat qiladi, umri davomida ezgu ishlar qilib, solih farzandlar tarbiyalab, el aro yaxshi nom qoldirishga intiladi. Bu yoʻlda unga orzu-umidlari goʻyo qanot bagʻishlaydi.

Oʻzi oʻqituvchi boʻlgani uchunmi, qipchoqlik Fotima Ibodullayeva qizi Qunduzoyning ham oʻqituvchi boʻlishini astoydil istadi, intildi. Har qanday ezgu ishning ibtidosi yaxshi niyatdir. Qunduzoy maktabni tugatib, oʻqituvchi boʻlishga astoydil ahd qilganida ham eng koʻp quvongan bobosi, taʼlim va Ikkinchi jahon urushi faxriysi Jumaboy Xolmurodov, onasi Fotima Ibodullayevalar boʻldi.

2009-yil Nukus Davlat pedagogika institutining filologiya fakultetini tugatib, oʻzi taʼlim olgan 11-sonli maktabga ishga kelganida ota-onasi, yaqinlari, ustozlari ham juda sevingan, unga oq yoʻl tilagan edi.

– Qunduzoy Xolmurodova intiluvchan, izlanuvchan va tashabbuskor muallim sifatida jamoamizga oʻzgacha ruh, sogʻlom raqobat muhitini olib kirdi, –deydi maktab direktori Zulfiya Yusupova. – Natijada boshqa oʻqituvchilarimizning ham oʻz kasbiga masʼuliyati oshdi.

Qunduzoyning yoshlik gʻayrat-shijoati bilan sidqidildan qilgan mehnatlari hademay oʻz samaralarini bera boshladi, oʻquvchilari fan olimpiadasi, bilimlar bellashuvi va boshqa turli koʻrik-tanlovlarda sovrinli oʻrinlarni egallashdi.

Oʻziga xos tashabbuskor, intiluvchanligini inobatga olib, maktab rahbariyati ikki yil muqaddam uni yoshlar yetakchisi lavozimiga tavsiya qildi.

Bu ishonchni oqlashga chin dildan kirishgan Qunduzoy avvalo oʻquvchi-yoshlarga Yoshlar ittifoqi maqsadlarini tushuntirishga, ularni boshlangʻich tashkilot atrofida jipslashtirishga intildi. Oʻquvchilarning iqtidorini aniqlab, ularning koʻnglidagi orzu-niyatlarini tinglab, roʻyobi uchun kurashishga kirishdi, eng qobiliyatli bolalardan sinflarga sardorlar tayinladi.

Qunduzoy Xolmurodovaning intilishlari samarasi oʻquvchilar yutuqlarida aks eta boshladi. Xususan, Yoshlar ittifoqi tuman Kengashi qoshidagi “Kamalak” bolalar tashkiloti tomonidan oʻtkazilgan “Eng namunali maktab sardorlar Kengashi” tanlovida maktab “Zamin yoshlari” guruhi 1-oʻrinni, “Eng namunali maktab sardorlar Kengashi” tanlovida “Amu gʻunchalari” guruhi 2-oʻrinni, “Eng namunali sinf sardorlar Kengashi” tanlovida “Nihol” jamoasi 2-oʻrinni oldi.

“Kamalak bilimdonlari” tanlovida “Nihol” jamoasi tumanda birinchi, Qoraqalpogʻistonda ikkinchi oʻrinni egallab, tashkilotchilar tomonidan kompyuter jamlanmasi bilan taqdirlandi.

Qunduzoyning oʻzi “Eng bilimdon yoshlar yetakchisi” tanlovida 2-oʻrinni egalladi. “Eng bilimdon boshlangʻich tashkilot yetakchisi” degan sharafli nomga sazovor boʻldi.

Maktab oʻquvchilarining qay biri bilan suhbatlashmang, yoshlar yetakchisi rahbarligida erishayotgan yutuqlaridan quvonib soʻzlaydi.

– Oʻquvchilarimizning fanlar olimpiadasi, Bilimlar bellashuvi va boshqa turli koʻrik-tanlovlarda erishayotgan yutuqlarida Qunduzoyning hissasi bor. Hozir yana bir oʻquvchimiz Feruza Shomurodova Toshkent shahrida, respublika umumtaʼlim maktablari oʻquvchilari orasida oʻtkazilayotgan ijodiy ishlar tanlovida ishtirok etayapti. Quyi bosqichlarda yaxshi natijalarga erishgani uchun shunday imkoniyatni qoʻlga kiritdi. Feruzaning bu yutuqlarida Guloyim Begjonova va Qunduzoy Xolmurodovaning oʻrni ulkan, – deydi Zulfiya Yusupova.

Baxt – amalga oshgan orzu-umidlardir. Ha chindan-da, odam yashar ekan, koʻngli doimo orzu-havaslarga limmo-lim boʻladi. Bu niyatlarning roʻyobidan ruhi togʻday yuksaladi, umri fayzli, mazmunli boʻladi.

Shu maʼnoda olib qaraydigan boʻlsak, Qunduzoy Xolmurodovani chinakam baxtiyor ustoz, oila bekasi, mehribon ona, deya olamiz.

U qipchoqlik Omonboy Yerdoshev va Bozorgul Namatullayevalar oilasining orzu-havasli, toʻngʻich kelini, ichki ishlar xodimi Gʻayratjon Yerdoshevning rafiqasi, biri-biridan shirin Mohinur, Jasminalarning gʻamxoʻr onasi. Ular hozir imtiyozli ravishda “Yoshlar uyi”dan olgan xonadonida baxtiyor yashashmoqda.

Ha, Qunduzoy Xolmurodovaning hayoti, mehnat faoliyati havaslarga loyiq.