Hayot saxovatli insonlar bilan goʻzal
Muhtaram Prezidentimiz Sh.Mirziyoyev tashabbusi bilan 2019-yil 2-24-aprel kunlari oʻtkazilgan “Book challenge” aktsiyasi millionlab yurtdoshlarimiz qalbiga saxovat urugʻini qadadi, desam adashmayman. Alloh roziligi yoʻlida beminnat xayr-ehson qilish xalqimizning eng ulugʻ va azaliy qadriyatlaridan biri. Oʻzgalarga mehr, quvonch, xayr-saxovat ulasha olgan insonlar oʻz qalblarida cheksiz quvonchni, yashash zavqini, hayot qadrini his qila oladilar. Bu his-tuygʻular shunchalar yoqimliki, inson imkoni kelganicha yana va yana mehr-muruvvat, xayr-saxovat ulashgisi kelaveradi. Allohga beadad shukurlar boʻlsinki, yurtimizda ana shunday qalbi daryo, saxovat-pesha insonlar juda koʻp.
Aprel oyida yurtimiz boʻylab oʻtkazilgan “Book challenge” aktsiyasi nafaqat saxovat ulashish, mohiyatan maʼrifat ulashish, ziyoga chorlash aktsiyasi boʻldi. Yillar davomida unutilayozgan kitobxonlik qadriyati qayta tugʻilayotganidan biz oʻqituvchilar juda xursand boʻldik. Oʻquvchilarimiz qoʻlidagi har xil badiiy kitoblar, koʻzlaridagi kitobga mehr tuygʻusi maʼnaviy qadriyatlarimizning naqadar ulugʻvorligidan dalolatdir.
Kitobxonlikka boʻlgan targʻibot va tashviqot bu borada ota-onalarning tushunchasini oʻzgartirdi. Bugungi kun ota-onalari bolasi uchun eng yaxshi sovgʻa kitob ekanligini anglab yetmoqda. Bunga “Kitob ulash” aktsiyasi davomida guvoh boʻldik. Ota-onalar nafaqat oʻz bolalariga kitoblar sotib olib berib xursand qilishdi, balki farzandi taʼlim olayotgan maktab kutubxonasiga ham koʻplab kitoblar sovgʻa qilishdi. Aktsiya muborak Ramazon oyida ham davom etdi. Bolalar quvonchidan quvona bilgan barcha saxovatli ota-onalarga oʻz minnatdorchiligimizni izhor etamiz.
Zamonamiz yoshlari uchun eng yaxshi hadya – kitobdir. Azizlar, bolangizga yoki maktab kutubxonalariga ilmiy yoki badiiy kitoblar sovgʻa qilar ekansiz, jamiyatimiz maʼnaviyatiga, ertangi yorugʻ kunlarimizga hissangizni qoʻshgan boʻlasiz. Zero, kitobni sevgan, qadrlagan bolalar birovga yomonlik qilishmaydi. El-yurtni, oʻzini va oʻzgalarni qadrlashni oʻrganadi. Mehr koʻrgan, saxovat, muruvvat koʻrib oʻsgan bolalar ertaga oʻzlari ham boshqalarga mehr-muruvvat koʻrsata oladigan shafoatli insonlar boʻlib voyaga yetishadi.
Hulkaroy XOʻJANIYoZOVA, 40-maktab oʻqituvchisi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
