“Qoradori – 2019” tadbirlari oʻtkazilmoqda

Jahon miqyosida xalqqa, millat kelajagiga xavf tugʻdirayotgan xatarlardan biri bu giyohvandlikdir. Bu ofat insoniyatni zalolat botqogʻiga choʻktirib, tubsiz jarlikka qulatadi. Uning taʼsiridan mamlakatimiz aholisini muhofaza qilish maqsadida giyohvand vositalarning noqonuniy aylanishi, uning yetishtirilishiga qarshi muntazam kurash olib borilmoqda.

Yurtimizda giyohvand moddalar yetishtirilishiga qarshi kurashish boʻyicha turli tadbirlar oʻtkaziladi. Chunki hali ham odamlar orasida tarkibida narkotik moddalar boʻlgan oʻsimliklarni ekish, uning orqasidan moʻmay daromad orttirishni koʻzlayotganlar topiladi.

Oʻzbekiston Respublikasi Ichki ishlar vazirining birinchi oʻrinbosari D.Nazarmuhamedovning tegishli  koʻrsatmasi asosida joriy yilning 1-mayidan 30-iyuniga qadar 1-bosqich respublika miqyosidagi “Qoradori - 2019” keng qamrovli tadbiri oʻtkazilishi belgilangan edi. Mazkur koʻrsatma talablarini bajarish maqsadida tumanda ham IIB profilaktika inspektorlarining Sogʻliqni saqlash idoralari bilan hamkorligi yoʻlga qoʻyildi. Shuningdek, dispanser hisobidagi giyohvandlikka mubtalo boʻlgan va muqaddam giyohvand moddalarga bogʻliq jinoyat sodir etgan shaxslar bilan olib borilayotgan profilaktik-ogohlantiruv tadbirlarining samaradorligini yanada oshirish boʻyicha choralar koʻrildi.

Tadbirlar davomida muqaddam giyohvandlik  moddalarini isteʼmol qilish, olib kirish va tarqatish bilan bogʻliq jinoyat sodir etgan shaxslarning turar joylari, tomorqalari, dala hovlilari, xoʻjalik va boshqa yer uchastkalari toʻliq tekshirilmoqda. Ularning turmush-tarzi va xatti-harakatlari nazoratga olinmoqda. Bundan tashqari, keng jamoatchilik bilan hamkorlikda muqaddam jinoyat sodir etib, hozirgi kunda qidiruvda boʻlgan shaxslarni ushlash choralari koʻrilmoqda.

Jazoni ijro etish muassasalaridan ozod etilgan va majburiy davolashga muhtoj giyohvandlik kasalligiga mubtalo boʻlgan shaxslarni belgilangan tartibda maxsus davolash-profilaktika muassasalariga joylashtirish choralari ham koʻrilmoqda. Shu qatorda egasiz va hech kim yashamaydigan xonadonlarda ishratxona va bangixonalar tashkil etilishining oldini olish, bu joylarda jinoyat sodir etilishiga yoʻl qoʻymaslik, ularning faoliyatiga chek qoʻyish boʻyicha tadbirlar belgilangan boʻlib, shu asosda fuqarolar yigʻinlari masʼullari bilan hamkorlikda ovul va mahallalarda tekshiruvlar oʻtkazilmoqda.

Giyohvandlik, zaharvandlik va alkogolizmning oldini olish borasidagi ishlarning samaradorligini oshirish maqsadida tumandagi barcha korxona va tashkilotlarda, taʼlim muassasalarida, fuqarolar yigʻinlarida profilaktik-ogohlantiruv tadbirlari keng tarzda oʻtkazilib kelinmoqda. Mahalla faollari va profilaktika inspektorlari, ularning jamoat tartibini saqlash boʻyicha yordamchilari bilan hamkorlikda targʻibot va tashviqot ishlari olib borilmoqda. Bu illatning ayanchli oqibatlari toʻgʻrisida turli roliklar, kinofilmlar namoyish etilib, ayniqsa, yoshlarga keng tushuntirilmoqda va undan ogoh boʻlishga daʼvat qilinmoqda.

Hozirgi kunda tumanimizda “Qoradori - 2019” tadbirlari davom etmoqda.

Orifjon Qosimov, tuman IIB HPB katta inspektori.

(Illyustrativ foto)