HAP KUNINGIZ NAVPOʻZ BOʻLSIN, AZIZ VATANDOShLAP!

Ona yurtimiz uzra bahor oʻz sepini yoyib, borliqni gulga burkadi. Xalqimizning ming yilliklar bilan boʻylashgan milliy-maʼnaviy qadriyati, hayot bayrami – Navroʻzi olam kirib kelmoqda. Quyoshning hamal burjiga kirishi, kecha va kunduzning tenglashishi, tabiatda jonlanishning boshlanishi bilan bogʻliq bu umumxalq ayyomi katta shodiyona va xursandchilik bilan kutib olinmoqda.

Navroʻz bayramining ildizi juda olis tariximizga borib taqaladi. Oʻrta Osiyo va yaqin Sharq, xususan, bizning diyorimiz xalqlari uchun Navroʻz toʻrt ming yillik buyuk va boqiy anʼanalarni oʻzida mujassam etgan ulugʻ ayyomdir. Xalqimizning yuragidan mangu joy olgan bu ayyom har birimiz uchun aziz va qadrlidir. Shuning uchun ham qadrliki, Navroʻz – asrlar davomida odamlarda ona yerga va tabiatga mehr-muhabbat, unga ehtiyotkorlik bilan munosabatda boʻlish va ardoqlash, mehnat qilish, halol rizq topish tuygʻularini tarbiyalagan. Navroʻz bayrami kunlarida urushlar toʻxtatilgan, gina-kuduratlar unutilgan, odamlar tinch va yaxshi qoʻshnichilik anʼanalariga intilganlar. Bundan ham muhimi, Navroʻz – xalqimiz hayotida bahoriy udumlarni boshlab bergan va inson bilan tabiatning azaliy uygʻunligini oʻzida mujassam etgan qutlugʻ va saodatli, rizq-roʻzga eltuvchi Yangi kun – dehqonchilik ayyomidir.

Xalqlarni, millat va elatlarni birlashtiruvchi urf-odat va anʼanalari, farzandlarimizni yaxshilikka, maʼnaviyat va maʼrifatga, mehnatsevarlik va vatanparvarlikka, ona tabiatga mehr-muhabbatli boʻlishga chorlovchi ezgu shiorlari bilan juda katta maʼnaviy boyligimiz boʻlgan Navroʻz mustaqillik yillarida oʻzgacha jilo va goʻzallik kasb etdi. Navroʻz bilan bogʻliq urf-odat va anʼanalar istiqlol tufayli xalqimizning bebaho maʼnaviy mulkiga aylandi.

Buni biz tumanimizning har bir ovuli va mahallasida bahorning ilk kunlaridanoq boshlanib ketgan sumalak sayllarida, etaklarini toʻldirib koʻk terayotgan qizaloqlarimizning quvonchlarida, dillarida ezgu niyatlari bisyor dehqon-u bogʻbonlarimiz, chorvador-u, sohibkorlarimizning tabiatidagi joʻshqinlikda koʻrishimiz mumkin.

Har bir mahalla, har bir koʻcha, har bitta xonadonda Navroʻziy urf-odat va udumlarni kuzatish, turli millat vakillari ishtirokida oʻtkazilayotgan sumalak sayllari, tinchlik va osoyishtalikning ajib timsoli – bolajonlarimiz uchirayotgan varraklar parvoziga guvoh boʻlish, albatta, har dilga cheksiz quvonchlarni baxsh etadi.

Bugun mustaqil mamlakatimizning har bir qarich yeri Navroʻz nafasidan xush chiroy ochgan. Navroʻzona urf-odat va udumlar, anʼanalar xalqimiz qalbini ziynatlab, chor-atrofga orastalik baxsh etgan. Farzandlarimizning quvonchlari cheksiz, momo va bobolarimizning shukronalari behisob. Tumanimizning barcha hududlarida bahoriy tantanalar, Navroʻzona anʼanalar bilan boqiy qadriyatlar ayyomi avj olayotir!

Qadrli yurtdoshlar!

Navroʻz – boshlanayotgan Yangi kun ona zaminga sochgan har bir urugʻimizga, chorva-yu oʻtlogʻimizga qut-baraka, xonadonlarimizga osoyishtalik, koʻngillarimizga xotirjamlik, oilalarimizga quvonch va baxt-saodat baxsh etsin! Barchangizga Navroʻzi olam muborak boʻlsin!