Pensiya va nafaqalar boʻyicha muammolar boʻlmaydi

Mamlakatimizda faxriylarga, keksalarga, pensionerlarga, nogironligi boʻlgan, boquvchisini yoʻqotgan fuqarolarga jiddiy eʼtibor qaratilmoqda. Bu borada davlat pensiyalarini tayinlash, moliyalashtirish, ularning toʻlanishini hisobga olish, toʻlovlarni nazorat qilish hamda tizim faoliyatini yanada takomillashtirish boʻyicha Prezidentimiz tomonidan bir necha farmon va qarorlar qabul qilindi. Moliya Vazirligi huzuridagi Byudjetdan tashqari Pensiya jamgʻarmasi Amudaryo tuman boʻlimida ham 2019-yil «Faol investitsiyalar va ijtimoiy rivojlanish yili» Davlat dasturi asosida bir qancha ishlar amalga oshirilmoqda. Tumanda 2019-yil 1-yanvar holatiga jami pensiya, ijtimoiy nafaqa oluvchilardan yoshga doir pensiya oluvchilar 15615 nafarni, nogironlik boʻyicha pensiya oluvchilar 2360 nafarni, boquvchisini yoʻqotganlik pensiyasi oluvchilar 970 nafarni, pensiya tayinlash uchun zarur ish stajiga ega boʻlmagan qariyalar va boquvchisini yoʻqotganlar uchun ijtimoiy nafaqa toʻlanadiganlar 2025 nafarni tashkil etadi. Fuqarolarga pensiya va ijtimoiy nafaqalar tayinlash masalalari jarayonida asosiy eʼtibor pensiyalarning qonun talablari asosida toʻgʻri tayinlanishi uchun korxona va tashkilotlar, arxiv idorasi tomonidan ish staji va ish haqi toʻgʻrisidagi maʼlumotlar toʻgʻri belgilanganligi joylarga chiqib tekshirilib, keyin toʻlovga oʻtkazilishiga qaratildi va bu oʻzining ijobiy natijalarini berdi.

2018-yil davrida mutaxassislar pensionerlar bilan uchrashib, mablagʻlarning maqsadli yetkazib berilishi yuzasidan monitoring ishlarini olib borishdi. Natijada tuman boʻyicha oʻtgan 12 oy davomida 9 ta qonunbuzilish holatlari aniqlandi. Bu holatlar yuzasidan Xalq banki tuman filialiga tegishli tartibda chora koʻrish uchun maʼlumotlar taqdim etildi.

Oʻzbekiston Pespublikasi Prezidentining 2017-yil 13-martdagi «Pensiya va nafaqalar toʻlash mexanizmini yanada takomillashtirish chora-tadbirlari toʻgʻrisida»gi qarori asosida Xalq banki orqali pensiya toʻlovlari amalga oshirilmoqda.

Tuman boʻyicha 13645 nafar pensiya va nafaqa oluvchilarning MFYlar kesimida toʻlov roʻyxatlari shakllantirilib, oyiga oʻrtacha 8 mlrd. soʻmlik toʻlov vedomostlari har oyning uchinchi sanasiga qadar toʻliq Xalq banki filiallariga yetkazilmoqda. Bundan tashqari tuman hokimligi tomonidan OFY va MFYlar kesimida toʻlov kuni boʻyicha reja tasdiqlanib, pensionerlarning tashkil etilgan kassalarga navbat bilan kelishlari yoʻlga qoʻyildi. Shuningdek, tuman boʻyicha 5839 nafar yotib qolgan, yolgʻiz, kam taʼminlangan, 1-, 2-guruh nogironligi boʻlgan shaxslar roʻyxatlari alohida shakllantirilib, oyning oʻninchi sanasiga qadar ushbu toifa fuqarolarga pensiya pullari uylariga yetkazib berilmoqda.

Oʻtgan 2018-yil davomida ommaviy axborot vositalari orqali fuqarolarga pensiya tizimida amalga oshirilayotgan islohotlar, pensiya taʼminotini tashkil qilish sohasidagi yangiliklar va qonunchilik boʻyicha, Moliya Vazirligi huzuridagi byudjetdan tashqari Pensiya jamgʻarmasi Ijro etuvchi apparat tomonidan tasdiqlangan grafik boʻyicha mahalla fuqarolar yigʻinlarida 67-marta sayyor qabullar oʻtkazildi, pensiya tayinlash va toʻlash masalalari boʻyicha tushuntirishlar berildi.

2018-yil mobaynida boʻlimimizga 14 nafar fuqarolardan murojaatlar kelib tushdi va ularga tushuntirish berildi.

Prezidentimizning 2018-yil 12-dekabrda imzolagan Farmoniga muvofiq 2019-yil 1-yanvardan boshlab barcha toifadagi ishlovchi pensionerlarga pensiya toʻliq toʻlanmoqda.

Bu esa, keksa yoshdagi fuqarolarning pensiyaga chiqqandan keyin ham mamlakatimizning ijtimoiy-iqtisodiy hayotida teng ishtirokini taʼminlashga, yoshlarga oʻzlarining kasbiy mahorati, boy tajribalarini singdirishiga imkoniyat yaratadi.

Bundan tashqari, yuqori ish haqi hisobidan pensiyaga chiqqan fuqarolarimizga munosib pensiya miqdorini belgilash orqali ijtimoiy adolat printsipini qaror toptirish maqsadida ushbu Farmonda pensiyani hisob-kitob qilish uchun ish haqining maksimal miqdori eng kam oylik ish haqining 8 barobaridan 10 barobarigacha oshirildi.

Muxtasar qilib aytganda, boʻlimimiz xodimlari bundan keyin ham aholiga pensiya xizmati koʻrsatish, pensiya va nafaqalarni qonunchilikda belgilangan tartiblar asosida tayinlash, toʻlash va ularning monitoringini olib borish ishlarini yanada samarali tashkil etadi.

Oybek Jumanov, Byudjetdan tashqari

Pensiya jamgʻarmasi tuman boʻlimi boshligʻi.