Har tomonlama yetuk Vatan himoyachilarini hech qanday kuch yenga olmaydi

Mustaqillik yillarida bizning milliy armiyamiz professional darajadagi qudratli Qurolli Kuchlarga aylandi. Bilimdon va malakali harbiy kadrlar, eng soʻnggi zam onaviy harbiy-texnik vositalar va texnologiyalar bilan qayta jihozlandi. Harbiy-taktik harakatlar mexanizmi yangilandi. Davlatimiz tomonidan qator qonun hujjatlari qabul qilinib, Qurolli Kuchlarimizning qudratli va professional armiyaga aylantirilishiga alohida eʼtibor qaratildi. Shuningdek, Prezidentimizning oʻtgan yilgi “Oʻzbekiston Respublikasi Qurolli Kuchlari harbiy xizmatchilarining maʼnaviy-maʼrifiy saviyasini oshirish tizimini tubdan takomillashtirish toʻgʻrisida”gi Qarori asosida milliy armiyamiz safida xizmat qilayotgan harbiylarning maʼnaviyatini yuksaltirishga ham ahamiyat berilib, harbiy xizmatchilar oʻrtasida burchga sadoqat, vatanparvarlik, maʼnaviy-maʼrifiy ishlar samaradorligini oshirishga qaratilgan keng koʻlamli ishlar olib borildi.

Darhaqiqat, harbiy xizmatchilarning harbiy-jismoniy mahorati bilan birga maʼnaviy-axloqiy va harbiy-vatanparvarlik tuygʻulari mustahkamlanib, maʼnaviyati, professional va siyosiy bilimi yuksaltirilsa, ular hech qanday kuch yenga olmaydigan qudratli qurolga ega boʻladi. Xalq esa mana shunday posbonlar himoyasi ostida tinch va xotirjam yashab, erkin mehnat qiladi. Vatan ravnaqiga hissa qoʻshish uchun katta-katta bunyodkorlik ishlarini amalga oshiradi.

Qurolli Kuchlarning safida xizmat qilayotgan minglab askarlar va zobitlar qatorida Amudaryo tumani yoshlarining ham faol qatnashayotganligini faxr-iftixor bilan tilga olib oʻtish joiz, albatta. Tuman Mudofaa ishlari boʻlimining Chaqiruv punktida malakali shifokorlar zamonaviy tibbiy asbob-uskunalar yordamida chaqiriluvchilarni tibbiy koʻrikdan oʻtkazib, armiya safini sogʻlom yigitlar bilan taʼminlash uchun shaffoflik bilan tekshiruv ishlarini olib borishmoqda. Undan tashqari har biri bilan alohida suhbatlashilib, bilim va tafakkuri ham sinovdan oʻtkazilmoqda. Joriy 2019-yilda ham muddatli harbiy xizmat uchun chaqiriluvchi yoshlarni saralash ishlari amalga oshirilmoqda.

Prezidentimizning “Qoraqalpogʻiston Respublikasida jamoat tartibini saqlash va huquqbuzarliklar profilaktikasi tizimi samaradorligini oshirish boʻyicha chora-tadbirlar toʻgʻrisida”gi Farmoyishi boʻyicha ham huquqbuzarliklar profilaktikasi, Qurolli Kuchlar harbiy xizmatchilari bilan hamkorlikda tumandagi oʻquvchi-yoshlar oʻrtasida jinoyatchilikning barvaqt oldini olish va ularning maʼnaviy-maʼrifiy, madaniy bilimini oshirishga qaratilgan turli tadbirlari oʻtkazib kelinmoqda. Undan tashqari, harbiy-maʼmuriy sektorni rivojlantirish boʻyicha ishlab chiqilgan “Yoʻl xaritasi” ga muvofiq yosh avlodning huquqiy savodxonligini va ijtimoiy faolligini oshirish, shuningdek, yoshlar oʻrtasida nazoratsizlik, huquqbuzarliklarning oldini olishga yoʻnaltirilgan tadbirlar tashkil etilishiga alohida eʼtibor qaratilmoqda.

Siyosiy va maʼnaviy-maʼrifiy mazmundagi bunday tadbirlar, sport musobaqalari harbiy xizmatchilar va yoshlarning siyosiy bilimi, maʼnaviyatini boyitishga, qolaversa, boʻsh vaqti mazmunli oʻtishiga yordam bermoqda.

P.AKIMNIYaZOV,

Nukus shahar harbiy prokurori yordamchisi,

adliya kapitani.