HUQUQIY MADANIYaTNI YuKSALTIRISh JAMIYaT TARAQQIYoTINI TAʼMINLAYDI
Soʻnggi yillarda milliy huquq tizimini tubdan isloh qilish, jamiyatda huquqiy madaniyatni shakllantirish hamda malakali yuridik kadrlarni tayyorlash borasida sezilarli ishlar amalga oshirildi. Bu borada bugungi kunga qadar bir qator normativ-huquqiy hujjatlar qabul qilindi.
Fuqarolarning ijtimoiy-siyosiy oʻzgarishlar bilan uygʻun ravishda huquqiy bilimlarini oshirib borishning zamonaviy usullarini joriy etish, shuningdek, aholini va asosan yoshlarni zararli axborotlardan himoya qilish boʻyicha mustahkam huquqiy immunitetni shakllantirish maqsadida Prezidentimiz tomonidan shu yil 9-yanvarda qabul qilingan “Jamiyatda huquqiy ong va huquqiy madaniyatni yuksaltirish tizimini tubdan takomillashtirish toʻgʻrisida”gi Farmon ham ana shu hujjatlarning uzviy davomi boʻldi.
Mazkur Farmon talablariga asosan “Jamiyatda huquqiy madaniyatni yuksaltirish kontseptsiyasi” va “Jamiyatda huquqiy madaniyatni yuksaltirish kontseptsiyasini 2019-yilda samarali amalga oshirish boʻyicha “Yoʻl xaritasi” tasdiqlandi. Farmonga asosan jamiyatda huquqiy ong va huquqiy madaniyatni yuksaltirishning asosiy vazifalari belgilandi. Unga koʻra aholiga mamlakatimizda amalga oshirilayotgan ijtimoiy-iqtisodiy islohotlar, qabul qilinayotgan qonun hujjatlari va davlat dasturlarining mazmuni va mohiyatini izchil yetkazish tizimi shakllantiriladi. Maktabgacha taʼlim tizimidan boshlab, aholining barcha qatlamlariga huquqiy ong va huquqiy madaniyat chuqur singdirib boriladi.
Bolalar uchun maxsus huquqiy portal yaratilib, unda Konstitutsiyani oʻrgatishga doir ilk tushunchalar, kundalik hayotda qoʻllashga moʻljallangan boshlangʻich huquqiy bilimlar, huquqni targʻib qiluvchi turli xil oʻyinlar, mashgʻulotlar va dasturlar boʻyicha uslubiy qoʻllanmalar, boshqa zarur maʼlumotlar muntazam berib boriladi.
Mahallalarda malakali mutaxassislar, advokatlar, notariuslar, yuridik xizmatlar xodimlari va boshqalar tomonidan aholiga huquqiy tushuntirishlar berilishi taʼminlanadi. Yoshlarga oʻz huquqlarini himoya qilishning amaliy mexanizmlarini oʻrgatishga qaratilgan loyihalar keng joriy qilinadi. Shuningdek, advokatlik tuzilmalari va advokatlar tomonidan aholining ijtimoiy himoyaga muhtoj qatlamiga bepul ixtiyoriy yuridik yordam koʻrsatish tizimi rivojlantiriladi. Ozodlikdan mahrum etilgan shaxslarning kelgusida ijtimoiy hayotga moslashuvi uchun koʻmak berish maqsadida jazoni ijro etish muassasalarida masofadan turib taʼlim olish tizimini yoʻlga qoʻyish ham koʻzda tutilmoqda.
Turli hayotiy holatlar boʻyicha huquqiy yechim taklif etiladigan va davlat xizmatlari koʻrsatish elektron tizimi bilan bogʻlanadigan Advice.uz huquqiy axborot tizimi ham yaratiladi.
Farmon bilan Oʻzbekiston Respublikasi Adliya vazirligi jamiyatda huquqiy ong va huquqiy madaniyatni yuksaltirish sohasida muvofiqlashtiruvchi davlat organi etib belgilandi hamda bu bilan masʼuliyat yanada oshirildi.
Xulosa oʻrnida aytish mumkinki, huquqiy taʼlim va tarbiya ishlarini jadallashtirish, aholi orasida huquqiy bilimlarni keng targʻib va tashviq qilish, qabul qilinayotgan farmonlar, hukumat qarorlari, qonunlarni odamlarga yetkazish, xalqimizning islohotlar mohiyatini teran tushunib-anglashiga erishish biz qurayotgan huquqiy demokratik davlat poydevori hisoblanadi. Oʻta dolzarb boʻlgan mazkur Farmon bu borada muhim asos boʻlib xizmat qilishi shubhasizdir.
I.Aldabergenov, Qoraqalpogʻiston Respublikasi
Adliya vazirligi bosh maslahatchisi,
2-darajali yurist.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
