Partiya tashabbusi bilan bepul oʻquv kurslari tashkil qilinmoqda

Oʻzbekiston “Milliy tiklanish” demokratik partiyasi tashabbusi bilan oʻtkazilayotgan qator loyihalar koʻplab yoshlarni oʻz atrofiga jamlab, iqtidor va qobiliyatlarini namoyon etishlarida, kasb-hunar egallashlarida muhim ahamiyat kasb etmoqda. Jumladan, partiya tomonidan yoshlarning boʻsh vaqtlarini mazmunli oʻtkazishlari, kam taʼminlangan oilalar farzandlarini turli xil fan va hunar toʻgaraklariga jalb qilish maqsadida tashkil etilgan “Xizmat – beminnat” loyihasi amalda oʻz samarasini bermoqda.

Mazkur loyiha Oʻzbekiston “Milliy tiklanish” demokratik partiyasi dasturiy vazifalari hamda Oʻzbekiston Respublikasini yanada rivojlantirish boʻyicha Harakatlar strategiyasida yoshlarga oid belgilangan vazifalarni amalga oshirish, shuningdek, “Ijtimoiy sheriklik toʻgʻrisida”gi va “Yoshlarga oid davlat siyosati toʻgʻrisida”gi qonunlar ijrosini taʼminlash maqsadida amalga oshirilmoqda.  

Partiya tashabbusi bilan oʻtkazilayotgan mazkur loyiha bilim va kasb-hunar oʻrganish istagida boʻlgan yoshlarni oʻz atrofiga birlashtirib, yoshlarning kelajakda yetuk mutaxassis boʻlib yetishishlariga zamin yaratmoqda.

Loyiha doirasida partiyaning tuman kengashi tomonidan oʻtgan yil davomida jami 14 ta bepul oʻquv kurslari tashkil etildi. Mazkur loyiha boʻyicha 120 dan ziyod yoshlar bepul taʼlim va kasb-hunarga jalb qilinib, ularga 14 nafar koʻngilli oʻqituvchi va murabbiylar rahbarlik qilgan boʻlsa, joriy yilda ham ushbu yoʻnalishdagi ishlar izchillik bilan davom ettirilmoqda.

Jumladan, 8-fevral kuni tumandagi 40-sonli va 16-sonli umumtaʼlim maktablarida  Oʻzbekiston “Milliy tiklanish” demokratik partiyasi tuman Kengashi tashabbusi bilan ushbu loyihasi doirasida jami 9 nafar koʻngilli oʻqituvchilar tomonidan jami 36 nafar oʻquvchilar uchun ingliz tili, ona tili, fizika, matematika, kimyo va boshqa fanlar boʻyicha bepul oʻquv kurslari ochildi.

Loyihani tashkil etishdan koʻzlangan maqsad – yoshlarni oʻz kasbining yetuk mutaxassisi sifatida shakllanishiga, intellektual, ijodiy, jismoniy, ahloqiy va boshqa yoʻnalishdagi salohiyatlarini kamol toptirishiga koʻmaklashish, kelajagimiz egalarining ongida sogʻlom turmush tarziga koʻnikmalarini shakllantirish, yoshlarning boʻsh vaqtlarini mazmunli tashkil etish, ularni ahloqiy negizlarni buzishga olib keladigan xatti-harakatlar hamda gʻoyalardan himoya qilishga munosib xissa qoʻshishdir.

Aytish kerakki, “Xizmat – beminnat” loyihasi doirasida tashkil qilingan oʻquv kurslarida yoshlarga ilm-fan va kasb-hunar sirlarini oʻrgatayotgan oʻqituvchilarning aksariyati “Milliy tiklanish” demokratik partiyasining faol aʼzolaridir. Ishtirokchi yoshlar ham oʻquv kurslarida faqatgina tegishli fanga oid bilim hamda koʻnikmalarini shakllantirib qolmasdan, partiyaning maqsad va vazifalari haqida tushunchalarga ham ega boʻlmoqdalar. Bu esa ularning orasidan kelgusida yetuk siyosatchilar ham yetishib chiqishiga zamin hozirlaydi.

Gʻ.Yeshniyozov