HARBIY VATANPARVARLIK OYLIGI UYuShQOQLIK BILAN OʻTKAZILMOQDA

2018-yil 13-dekabr kuni mamlakatimiz Prezidenti tomonidan qabul qilingan “Oʻzbekiston Respublikasi Qurolli kuchlari tashkil etilganligining 27 yilligi hamda Vatan himoyachilari kunini nishonlashga tayyorgarlik koʻrish va oʻtkazish chora-tadbirlari toʻgʻrisida”gi Farmoyishda ushbu sanani umumxalq bayrami sifatida keng nishonlash, aholi, ayniqsa, yoshlar koʻnglida milliy armiyamizga hurmat va ishonch hissini uygʻotish, ona Vatanimiz sarhadlarini ishonchli himoya qilayotgan askarlarimizdan oʻrnak olishga daʼvat etish maqsad qilib qoʻyilgan.

Farmonga muvofiq mamlakatimizda 2018-yilning 15-dekabridan 2019-yil 15-yanvariga qadar vatanparvarlik oyligini, oylik davomida “Vatan – muqaddas, uni himoya qilish sharafli burchdir!” degan gʻoyani ifoda etuvchi koʻplab tadbirlar oʻtkazish belgilangan edi.

Mazkur vazifalarning tumanda ijro etilishini taʼminlash maqsadida tuman hokimining farmoyishi qabul qilindi. Farmoyishga muvofiq tumanimizning barcha hududlarida aholi, ayniqsa, yoshlarni jalb qilgan holda bayram tadbirlari tashkil qilinmoqda.

Taʼlim muassasalarida esa “Mardlik va jasorat” mavzusida darslar oʻtkazilmoqda.

Bu tadbirlarda Vatanimizning tinch-osudaligini taʼminlashdagi Qurolli kuchlarning oʻrni va ahamiyati, harbiy xizmatchilarning oʻz xizmat vazifalarini ado etishdagi jangovar qobiliyati va fidoyiligi keng targʻib qilinmoqda.

“Vatan – muqaddas, uni himoya qilish sharafli burchdir!” degan gʻoyani ifoda etuvchi bayram tadbirlarida tuman Madaniyat boʻlimi xodimlari tomonidan tayyorlangan yurtga sadoqat va fidoyilikni, ona Vatanni, vatanimiz sarhadlarida doimo sergak va hushyor turgan askarlarning harbiy qasamyodiga sodiqligini ifoda etuvchi sahna koʻrinishlari, qoʻshiq va raqslar ijro etilmoqda. Bu tomoshabinlar koʻnglida milliy armiyamizning jangovar qudratiga ishonch hissini mustahkamlamoqda. Bunday tadbirlarda harbiy xizmatchilar oila aʼzolarining ham ishtirok etayotgani, jangovar – xizmat faoliyatida yuqori natijalarni qoʻlga kiritgan harbiy xizmatchilarning mehnati taqdirlangani, shuningdek, tumanda harbiy vatanparvarlik yoʻnalishida eng yaxshi faoliyat koʻrsatgan mahalla, harbiy qismdagi eng yaxshi Yoshlar ittifoqi boshlangʻich tashkiloti, eng yaxshi chaqiruvga qadar boshlangʻich tayyorgarlik fani oʻqituvchisi tanlovlarining gʻoliblari aniqlanib, ragʻbatlantirilgani tadbirlar ahamiyatini yanada oshirdi.

Bir oy davom etgan harbiy vatanparvarlik oyligi tadbirlari xalqimizning milliy armiyamizga, ertangi kuniga ishonchini mustahkamladi, yurtimiz tinch-osoyishtaligini ishonchli qoʻriqlab turgan harbiy oʻgʻlonlarga hurmat-havas tuygʻularini oshirdi va Oʻzbekiston Respublika Qurolli Kuchlari tashkil etilganligining 27 yilligi bayram tantanalariga ulanib ketdi.

Oygul RAJABOVA.