Milliy Armiyamizning 27 yilligiga

ONA YuRT QALQONI

Vatan, qadding baland bugun dunyoda,

Baxt-u iqboling ham qadring ziyoda.

Yuraklarda ezgu ahding ziyoda –

Tegrangda mustahkam qoʻrgʻon bor uchun!

Tarix sahfasidan joy olgan yillar

Zalvorin yelkalab ulgʻaydi dillar...

Vatan, deb talpingan sohir koʻngillar –

Yuraklarda ERK degan tugʻyon bor uchun!

Har onda ezgulik tomon evrilish,

Har qarich yerda rizq, barokatli ish.

Choʻl-u sahroda ham buyuk oʻzgarish –

Taraqqiyot, ilm va irfon bor uchun!

Sarhadlar daxlsiz, osmon muazzam,

Xalq yakdil – totuvlik elda mujassam.

Bir yuz oʻttiz olti millat jamul-jam

Ulgʻaytgan barkamol davron bor uchun!

Ana, mangu yangrar tinchlikka qasam,

Qon-qarindoshlik – doʻstlikka qasam.

Istiqlolga qasam – hurlikka qasam –

Poyingga tiz choʻkkan oʻgʻlon bor uchun!

Otaning koʻngli toʻq, yashar xotirjam,

Beshiklarin quchgan onalar xurram.

Vatan, har kuningda tantana, bayram –

Qudratli Armiyang – QALQON bor uchun!

Robiya YOʻLDOShEVA.