MAZMUN-MOHIYaTI BILAN XALQ KOʻNGLIDAGI DASTUR

Mamlakatimizda “Faol investitsiyalar va ijtimoiy rivojlanish yili” – yangi 2019  yil xalqimiz hayotida chinikam taraqqiyot, buyuk oʻzgarishlar, yangilanishlar yili boʻlishi shubhasiz. Chunki Oʻzbekiston Respublikasi Prezidentining 2018-yil 28-dekabr kuni Oliy Majlisga taqdim etgan Murojaatnomasida belgilab berilgan asosiy gʻoya va takliflarini oʻzida mujassam etgan, 253 banddan iborat 2019-yil Davlat Dasturi loyihasi jamiyat hayotining barcha jabhalarini qamrab olgani bilan muhim ahamiyatga ega.

2017-2021-yillarda Oʻzbekiston Respublikasini rivojlantirishning beshta ustuvor yoʻnalishi boʻyicha harakatlar strategiyasini  “Faol investitsiyalar va ijtimoiy rivojlanish yili”da amalga oshirishga oid davlat Dasturi loyihasi jamoatchilik tomonidan keng muhokama etilib, taklif va fikrlar bildirayotganining oʻzi xalqning davlat va jamiyat boshqaruvida faol ishtirokini taʼminlash imkonini beradi.

Dastur loyihasida jamoatchilik boshqaruvi tizimini takomillashtirishga alohida urgʻu berilgan. “Mening fikrim” veb portali orqali elektron-jamoaviy murojaatlarini Oliy Majlis palatalari, xalq deputatlari tuman va shahar Kengashlari bilan bir qatorda Vazirlar Mahkamasi tomonidan ham koʻrib chiqish nazarda tutilmoqda.

Shuningdek, yoshlarga oid davlat siyosatini takomillashtirishga alohida eʼtibor qaratiladi. Yil davomida “Yoshlar kelajagimiz” davlat dasturi doirasida yoshlar tadbirkorligini rivojlantirish va bandligini taʼminlash, uy-joyga muhtoj boʻlgan yosh oilalar uchun uy-joylar qurish boʻyicha tadbirlarni amalga oshirish yuzasidan amaliy chora-tadbirlar rejasini ishlab chiqish, Oʻzbekiston yoshlar ittifoqi, Adliya vazirligi, Tashqi ishlar vazirligi hamda Moliya vazirliklari hamkorligida 2019-yil 1-martgacha normativ-huquqiy hujjatlar loyihasini ishlab chiqish nazarda tutilgan. Ushbu loyihadan kutiladigan natijalar ham albatta yoshlarning davlat va jamiyat qurilishi faoliyatidagi ishtirokini yanada mustahkamlash imkonini beradi.

Dasturda davlat boshqaruvi tizimini isloh etish borasida zamonaviy davlat boshqaruvini bosqichma-bosqich joriy etishga qaratilgan tadbirlarning belgilanishi ham xalq bilan davlat idoralari oʻrtasidagi byuorokratik toʻsiqlarni bartaraf etishga xizmat qiladi. Bu borada ishlab chiqish kutilayotgan loyihada mehnatga haq toʻlashning zamonaviy tizimini yaratish, bunda oylik ish haqini davlat xizmatchisi tomonidan ishlar, ularning natijadorligi, sifati, murakkabligi, amaliyotda toʻgʻri ishlatilayotganligi kabi mezonlardan kelib chiqib belgilanishi eʼtiborga molik. Chunki mehnatga haq toʻlash masalasida shu paytgacha (ayniqsa, byudjet tashkilotlarida) ishning sifati, murakkabligi, natijadorligi inobatga olinmagan. Mazkur normativ-huquqiy hujjat loyihasida belgilangan ushbu norma soatbay ishlaydigan xodimlar mehnatiga haq toʻlashda tenglik printsipini qoʻllash imkonini beradi.

Korruptsiyaning oldini olish va unga qarshi kurashishning samarasi mexnazmlarini yaratish boʻyicha Oʻzbekiston Respublikasi Qonuni loyihasini ishlab chiqish va amaliyotga tatbiq etish – bugungi kunda eng dolzarb masala ekanligini hisobga olsak, mazkur Qonun loyihasida ilgari surilgan qonunosti hujjatlarini qisqartirib, ularning oʻrniga toʻgʻridan-toʻgʻri ishlaydigan Qonunlarni qabul qilish boʻyicha “yoʻl xaritasi”ni tasdiqlash korruptsiyaga qarshi kurash yuzasidan olib boriladigan ishlar natijadorligini va sifatini yanada oshiradi. Ayniqsa, siyosiy partiyalar bu borada faollik koʻrsatishi talab etiladi. Yaʼni, loyihada belgilanganidek, toʻgʻridan-toʻgʻri amalga oshirish mexanizmlariga ega boʻlmagan qonun loyihalarini parlamentga kiritish qatʼiy taqiqlanishi siyosiy partiyalar fraktsiyalari deputatlarining yanada samaraliroq faoliyat yuritishini talab etadi.

Davlat dasturiga koʻra, fuqarolarning oʻzini-oʻzi boshqarish organlari faolliyatining moliyaviy asoslarini takomillashtirishga alohida eʼtibor beriladi va bu borada 2019-yil 1-fevral sanasiga Vazirlar Mahkamasining Qarori loyihasi tayyorlanishi koʻzda tutilgan. Loyihada mahallalar tomonidan aholi va tashkilotlardan ixtiyoriylik asosida mablagʻlarni jalb etishning samarali mexanizmlarini joriy etish nazarda tutilgan. Bunda ijtimoiy sheriklikning amaldagi “davlat – fuqarolik jamiyati institutlari” shaklidan “davlat – fuqarolik jamiyati institutlari – tadbirkorlik subʼektlari” shakliga oʻzgartirish oʻzini-oʻzi boshqarish organlari faoliyatining moliyaviy asoslarini yanada mustahkamlash, mablagʻlarni natijali rejalashtirish imkonini yaratadi.

Fuqarolarning saylovga oid huquqlarini taʼminlashni takomillashtirish yuzasidan ishlab chiqilishi kutilayotgan chora-tadbirlar rejasiga koʻra, endilikda ozodlikdan mahrum etish joylarida saqlanayotgan shaxslarga sodir etgan jinoyatiga qarab saylash huquqini berish – yaxshi. Lekin mahkumga beriladigan bunday ishonchga munosibligi, uning axloqiy tuzalish jarayoni albatta inobatga olinishi zarur boʻladi.

Milliy madaniy markazlar, doʻstlik jamiyatlari rolini yanada oshirish va ularning aholi hayotidagi ishtirokini kuchaytirish yuzasidan ishlab chiqiladigan chora-tadbirlar dasturiga koʻra, milliy-madaniy markazlar va doʻstlik jamiyatlarining xorijiy davlatlar bilan hamkorligi 2019-yilda yanada faollashishi xorijiy vatandoshlar bilan turli sohalarda, ayniqsa maʼnaviy-maʼrifiy, milliy madaniyat masalalarida hamkorlikni yanada takomillashtirish imkonini beradi. 

Davlat dasturidagi har bir bandning mazmun-mohiyati xalq farovonligi, tinchligi, davlatimiz xavfsizligi, jamiyatda qonunlar ustuvorligini taʼminlash, imkonini yaratishi shubhasiz.

Robiya YOʻLDOShEVA.