UDDABUPON SANOBAP

Insonlar bor – umr boʻyi oʻz “men”i uchun fidoyilik qiladi: neki ezgulik va yaxshilik boʻlsa faqat oʻziga ravo koʻradi. Atrofidagi haqiqiy jamiyat fidoyilarini koʻrmaydi bundaylar.

Insonlar bor – el-yurt koʻzi uchun emas, shu el-yurt, xalq manfaati uchun ishlaydi, oʻzini ayamaydi, oʻz “men”ini juda koʻp vaziyatlarda unutib yashaydi. Atrofdagi insonlarga suyanadi, kezi kelganida ularni suyaydi. Jamiyat, xalq manfaati yoʻlida oromidan kechib yashaydi bundaylar...

Qoraqalpogʻiston xalq oʻqituvchisi, 40-sonli umumtaʼlim maktabi direktori Sanobarxon Xoʻjamurodova ham ana shunday fidoyi insonlardan biri. Sanobar serfarzand oilada tugʻilib-oʻsdi. Alloh rahmat qilsin, otasi Ismoil ota Xoʻjamurodov butun umrini taʼlim-tarbiya sohasiga bagʻishlagan, oʻzidan keyin ortida biri-biridan salohiyatli farzandlar, shogirdlar, “Ismoil muallim” degan eʼtiborli nom qoldirgan ajoyib inson edilar. Kezi kelganida oʻta qattiqqoʻl, odamiylik bobida mehribon va samimiy bu inson tarbiyasini olgan 10 nafar farzandning barchasi oʻqimishli, el-yurtga kamarbasta boʻlib voyaga yetishdi. Aka-opalari, uka-singillaridan farqli oʻlaroq Sanobarga Ismoil muallimga xos koʻplab fazilatlar “yuqqan”. Ayniqsa, har bir ishni zavq bilan bajarish, natijasidan soʻng boshqalarga ham zavq bagʻishlash, mehnatkashlik, atrofidagilarga manfaat yetkazuvchi har qanday maqsad yoʻlida ortga chekinmaslik, intiluvchanlik – Sanobarning hayot tarziga aylandi.

Nizomiy nomidagi Toshkent Davlat pedagogika institutini imtiyozli diplom bilan tugatgan Sanobar Xoʻjamurodova oradan yillar oʻtib oʻzi orzu qilganiday Amudaryo tumanida yosh avlod taʼlim-tarbiyasi sohasining fidoyisiga aylandi.

Oʻziga taʼlim-tarbiya bergan ustozlari Pajab Ahmedov, Tursunboy ustoz, Egambergan Saidov, Nazarimbat Almurodov, Yoʻldosh Matqurbonov, Ibrohim Masharipov, Amin Almurodov, Mirza Gulmonov, Shomurod Davletov, Kenja Ahmedovlar bilan yonma-yon ishlab, tajriba orttirdi. Ana shu tajriba va feʼlidagi ishchanlik, uddaburonlik va qatʼiyatlilik Sanobar Xoʻjamurodovani shaxs sifatida shakllantirdi, elga tanitdi. Uni 2004-yilda 40-sonli umumtaʼlim maktabi direktorligiga tayinlashdi.

– Ishonch – odamni kuchli qilarkan, – maktab rahbarligini qabul qilgan ilk kunlarini xotirlaydi Sanobar. – Tasavvur qiling, tomidan chakka oʻtadigan, sinfxonalarining poli beton qoplamali, deraza va eshiklaridan qish izgʻirinlari izillab kirib turadigan, atrofidagi yerlari kuchli shoʻrlangan maktab. Ishni nimadan boshlashni bilmay, bir-ikki kun oʻylanib yurganman.

Sanobarning boshchiligida markaziy isitish tizimi ota-onalar va oʻqituvchilar homiyligi yordamida qaytadan qurildi. YuNISEF va YuSAID xalqaro tashkilotining “Taʼlim jarayoniga jamoatchilikni jalb qilish” nomli loyihasida ishtirok etib, 12 ming AQSh dollari miqdoridagi grant mablagʻini yutib oldi. Ana shu grant mablagʻi hisobidan 10 ta sinf xonasi pollandi. Oʻsha paytdagi tuman hokimi, Alloh rahmat qilsin, Pajabboy Yoʻldoshevning koʻmagi bilan mahalliy byudjet mablagʻlari hisobiga maktab tomi shiferlandi. Maktabdagi sharoitlar yaxshilangach, taʼlim-tarbiya sohasida jiddiy burilish yasalishiga erishildi.

Sanobar Xoʻjamurodovaning rahbar sifatidagi oʻz tajribasi va qatʼiy tutumi bor. Maktabda direktor boshchiligidagi “Harakat dasturi”ga amal qilinadi. Unga koʻra, taʼlim-tarbiya bilan maʼnaviy tarbiya uzviylikda olib boriladi. Har bir ishda jamoa fikri inobatga olinadi. Natija esa koʻngildagiday. Bugungi kunda 40-sonli umumtaʼlim maktabi taʼlim-tarbiya sohasiga innovatsion pedtexnologiyalarni joriy etish boʻyicha tuman maktablari reytingida peshqadam. Maktab – oila – mahalla hamkorligi esa oʻquvchi-yoshlar qobiliyatining yangi qirralarini kashf etish imkonini bermoqda.

Maktabda obodonlashtirish ishlari ham juda yaxshi yoʻlga qoʻyilgan. Maktabning kuchli shoʻrlangan yeri Sanobar Xoʻjamurodovaning tashabbusi bilan ishlab chiqilgan “Harakat dasturi”ga muvofiq bugun obod goʻshaga aylandi. Maktab hovlisida bugun “Ustozlar bogʻi”, “Bitiruvchilar bogʻi”, “Yoshlar bogʻi” barq urib rivojlanmoqda. Yam-yashil ninabargli daraxtzorlar orasidagi parvozga shaylangan turnalar xuddi maktab bagʻridan uchirma boʻlib, mustaqil hayotga qadam tashlayotgan yoshlarning orzulari ramzi kabi tuygʻularni uygʻotadi dillarda.

– Har sinfning oʻz gulzori bor, – deydi Sanobar. – Oʻquvchilar mehnat darslarida tabiat qoʻynida oʻzlari ekkan gullarni parvarishlaydilar, hatto bundan zavq oladilar. Ularning qalblarida ona tabiatga mehr uygʻonadi bunday darslarda.

Hamisha hayotda oldinga intilib yashashga oʻrgangan bu tinib-tinchimas ayolning erishgan, erishayotgan yutuqlari bisyor. Ularning barchasini bitta maqolaga jo etish mushkul. Sanobar Xoʻjamurodovaning har bir oʻtayotgan ish kunlari haqida men oddiygina qilib Sanobar – ustoz, Sanobar – rahbar, xalq deputati, jamoat faoli, zukko va bilimdon repetitor, tashkilotchi va kuyunchak taʼlim fidoyisi va nihoyat oʻqimishli, tarbiyali farzandlarning mehribon onasi, jonajon buvisi degim keladi. Chunki oʻz mehnati bilan avvalo jamoasida, qolaversa, ustoz sifatida elda eʼzoz topgan bu ayolning jamiki, ezgu ishlarini xalq biladi, xoliq ham!

Kamtarin va samimiy doʻst, dilkash suhbatdosh, shoirqalb, uddaburon inson – Sanobar Xoʻjamurodovaning ezgu ishlarini davlatimiz ham katta hurmat va ehtirom ila “Qoraqalpogʻiston xalq oʻqituvchisi” degan yuksak maqom ila mukofotlaganligining oʻzi Sanobar Xoʻjamurodova shaxsiga berilgan eng katta bahodir.

Pobiya YOʻLDOShEVA.