Qurbongʻali Beshboyev – “Ilgʻor fermer” koʻkrak nishoni sohibi

Amudaryo tumanining Doʻrman ovulida faoliyat koʻrsatayotgan “Beshboyev Qurbongali” fermer xoʻjaligi tumandagi koʻp tarmoqli ilgʻor fermer xoʻjaliklaridan sanaladi.

Mamlakatimizda fermerlik harakati boshlangan dastlabki yillardan, yaʼni 2002-yildan buyon faoliyat koʻrsatayotgan ushbu fermer xoʻjaligiga qishloq xoʻjaligi sohasini yaxshi biladigan, yer bilan tillasha oladigan fidoyi dehqon –  Qurbongʻali Beshboyev rahbarlik qilayapti.

Q.Beshboyevning barcha ishlarni toʻgʻri tashkil eta olishi, yerga agrotexnik ishlov berish masalalariga va ekin parvarishiga eʼtiborli boʻlishi natijasida fermer xoʻjaligi paxta va bugʻdoy yetishtirish boʻyicha barcha shartnomaviy rejalarini nafaqat tumanda, balki respublika miqyosida birinchilar qatorida ado etayapti.

Mazkur fermer xoʻjaligida 2016-yilda 50 gektar, 2017-yilda 45 gektar va 2018-yilda 45 gektar maydonda paxta ekilib, har yili gektaridan oʻrtacha 30-35 tsentnerdan hosil oldi.

Shuningdek, fermer xoʻjaligi yerlarining shoʻrlanish darajasi yuqori boʻlishiga qaramasdan soʻnggi 3-yilda bugʻdoy ekilgan 7 gektar maydondan olinadigan hosildorlik 39,1 tsentnerdan 41,4 tsentnerga koʻtarildi.

Fermer xoʻjaligi hududida 1 gektar intensiv bogʻ, 0,2 ga. issiqxona, bugʻdoy va sholi tegirmonlari, zamonaviy deraza va eshik romlari ishlab chiqarish hamda tikuvchilik tsexlari tashkil etilgan. Shuningdek, fermer xoʻjaligida boqilayotgan parrandalar sonini koʻpaytirishga ham alohida eʼtibor berilmoqda.

Ayni kunda fermer xoʻjaligi hisobida boʻlgan 1 ta “Class Dominator”don oʻrish kombayni, 1 ta T-4A zanjirli haydov traktori, 2 ta TT3-80. 11 , 1 ta T 28x4  chopiq traktorlari 2 ta PTS -793 A01 traktor tirkamasi, 1 ta kultivator, 1 ta seyalka, 1 ta plug, 1 ta yer tekislagich, 3 ta mola, 8 ta borona va boshqada zarur texnikalar taʼmirlanib, yangi qishloq xoʻjaligi yili uchun shay qilib qoʻyilmoqda.

Q.Beshboyev rahbarlik qilayotgan fermer xoʻjaligi ovuldagi 20-sonli umumtaʼlim maktabi va 15-sonli maktabgacha taʼlim muassasasi binolarini taʼmirlash ishlariga yaqindan yordam koʻrsatib kelmoqda. Shuningdek ushbu fermer xoʻjaligi tomonidan ovuldagi kam taʼminlangan oilalarga moddiy yordamlar berilayotgani ham aholini xursand qilayapti.

Fermer Qurbongʻali Beshboyev ovulda oʻtkaziladigan barcha tadbirlarda faol ishtirok etib, el hurmatini qozonmoqda.

Fidoyi, tinib-tinchimas fermer Qurbongʻali Beshboyev yaqinda “Ilgʻor fermer” koʻkrak nishoni bilan taqdirlandi. Bu – haqiqiy yer egasi, fermerlikni rivojlantirishga astoydil bel bogʻlagan fidoyi insonning mehnatiga berilgan munosib bahodir.

A.JUMANIYoZOV.