OʻzXDPning eng faol ayoli» koʻrik-tanlovida faol ayollar saralandi

Amudaryo akademik litseyida 2018-yil 28-noyabr kuni «Oʻzbekiston XDPning eng faol ayoli» koʻrik-tanlovi boʻlib oʻtdi.

Uzbekiston XDP Qoraqalpogʻiston Respublika Kengashi raisi Xalilla Yeshimbetov, rais oʻrinbosari Nokisbay Gʻaniyev hamda UzXDP tuman Kengashi raisi Maxsud Saʼdullayev, kengashning masʼul xodimlari, akademik litsey oʻqituvchi va oʻkuvchi-yoshlari, partiya faollari qatnashdilar.

Koʻrik-tanlovni Uzbekiston XDP Qoraqalpogʻiston Respublika Kengashi raisi Xalilla Yeshimbetov ochdi va ishtirokchilarni yaqinlashib kelayotgan Oʻzbekiston Respublikasi Konstitutsiyasining 26 yilligi bilan tabrikladi hamda oʻtkazilayotgan koʻrik-tanlovning maqsadi Oʻzbekiston Respublikasi Prezidenti Sh.M.Mirziyoyevning “Xotin-qizlarni qoʻllab-quvvatlash va oila institutini mustahkamlash sohasidagi faoliyatni tubdan takomillashtirish chora-tadbirlari toʻgʻrisida”gi PF-5325-sonli Farmonida hamda Oʻzbekiston XDP saylovoldi dasturida belgilangan vazifalarni amaliyotga tatbiq etishda partiya safidagi xotin-qizlar salohiyatidan samarali foydalanish, yuksak siyosiy bilim va tashkilotchilik qobiliyatiga ega boʻlgan xotin-qizlarni aniqlash, isteʼdod va qobiliyatlarini roʻyobga chiqarish, ragʻbatlantirish, ularni partiya tizimiga jalb etish, davlat organlari va hokimliklar tizimida turli lavozimlarga asosiy zahiraga kiritish, shuningdek, ijtimoiy himoyaga ehtiyojmand xotin-qizlar muammolarini bartaraf etishning eng samarali usullarini aniqlab, ommalashtirishdan iborat ekanligi haqida qisqacha toʻxtalib oʻtdi.

Koʻrik-tanlov ishtirokchilari asosiy uch shart – xotin-qizlar muammosini hal etishning eng samarali yoʻli, siyosiy hozirjavoblik va erkin mavzular boʻyicha bellashdilar.

№15-sonli maktabning ona tili va adabiyoti fani oʻqituvchisi Feruza Iskandarova, №31- sonli maktabning ona tili va adabiyoti fani oʻqituvchisi Dilora Azadova, №30-sonli maktab ona tili va adabiyoti fani oʻqituvchisi Xurshida Reyimova, №27-sonli maktabining ximiya fani oʻqituvchisi Dilnoza Urozimbetovalar oʻzlarining har tomonlama chuqur bilim va mahoratlarini namoyish etdilar.

Barcha shartlarni yuksak odob-axloq meʼyorlari asosida oʻta madaniyatlilik bilan bajargan №15-sonli maktabning ona tili va adabiyoti fani oʻqituvchisi Feruza Iskandarova birinchi oʻrinni, №31-sonli maktabning ona tili va adabiyoti fani oʻqituvchisi Dilora Azadova ikkinchi oʻrinni, №30-sonli maktabining ona tili va adabiyoti fani oʻqituvchisi Xurshida Reyimova uchinchi oʻrinni egalladilar. Koʻrik-tanlov yakunida ishtirokchi qizlarning barchasi qimmatbaho sovgʻalar bilan taqdirlandilar.

M.Saʼdullayev, Uzbekiston XDP tuman Kengashi raisi.