OʻZGALAR TAShVIShIGA YeLKADOSh INSONLAR

Agar sen oʻzingdagi ogʻriqni sezsang – tiriksan, oʻzgalardagi ogʻriqni sezsang – insonsan.

Ajdodlarimizning asrlar osha sinovidan oʻtib kelgan bu hikmatning magʻzini chaqish har birimizni chor-atrofimizdagi yurtdoshlarimiz hayotiga chuqurroq nazar solishga, yaxshi-yomon kunlarda hamnafas boʻlishga undaydi, biri baxtsiz tasodif tufayli, biri kasallik tufayli iqtisodiy qiyinchiliklarga duch kelayotgan oilalar holidan xabar olib, moddiy-maʼnaviy dalda boʻlishga undaydi.

Oʻzgalar gʻamini chekmasa, odam

Anga noloyiqdir inson degan nom, –

deb yozgan edi Saʼdiy Sheroziy.

Quvonarlisi, halol mehnati tufayli oʻz oilasining farovonligini taʼminlabgina qolmay, kam taʼminlangan, moddiy qoʻllab-quvvatlashga muhtoj oilalardan muruvvatini ayamay kelayotgan saxovatli insonlar oramizda koʻp.

Bizning Jumurtov shaharchamizda ham bunday saxiyqalb insonlar talaygina.

Yaqinda keksalik nafaqasidagi Jumaboy hoji Avazmatov kam taʼminlangan 3 ta oilaga 200 ming soʻmdan, 1 ta oilaga 400 ming soʻmdan pul xayriya qilib, muhtojlarning duosini oldi.

Shuningdek, Ulugʻbek Qalimbetov kam taʼminlangan yetti oilaga bir qopdan un, 7 kilogramdan yogʻ, Baxtiyor Nurjonov esa beshta oilaga 130 ming soʻmlik oziq-ovqat mahsulotlari xayriya qildilar. Qurilish tashkiloti rahbari Rustam Yusupov ham har yili kam taʼminlangan oilalar farzandlariga hayit, bayramlarda sovgʻa ulashib, koʻpchilikning olqishini olayotir.

Bir koʻngil – ming Kaʼba – deydi xalqimiz.

Xalqning koʻnglini olib, tashvishiga yelkadosh boʻlayotgan shaharchamizning bunday fuqarolari bilan biz haqli ravishda faxrlanamiz.

Aminboy XOʻJAMURODOV,

Jumurtov shaharcha fuqarolar yigʻini raisi.