JAMIYaTDA OʻQITUVChI KASBINING NUFUZINI OShIRIShGA QARATILGAN NAVBATDAGI QADAM

Mamlakatimizning koʻplab sohalarida yuz berayotgan oʻzgarishlar qatorida xalq taʼlimi tizimi ham chetda qolmadi.

Oʻzbekiston Respublikasi Prezidentining 2018-yil 5-sentyabrdagi “Xalq taʼlimini boshqarish tizimini takomillashtirish boʻyicha qoʻshimcha chora-tadbirlar toʻgʻrisida”gi PF-5538-son Farmoni qabul qilindi.

Farmonda ushbu sohadagi mavjud muammo va kamchiliklar sanab oʻtilishi bilan birga xalq taʼlimi tizimini isloh qilishning asosiy yoʻnalishlari ham belgilab berildi.

Shuningdek Farmonga muvofiq, umumiy oʻrta taʼlim davlat taʼlim standartlari va maktabdan tashqari taʼlimga qoʻyiladigan davlat talablari umumiy oʻrta taʼlimni moliyalashtirish uchun Oʻzbekiston Respublikasi Davlat byudjeti parametrlarida nazarda tutilgan mablagʻlar hisobga olingan holda Oʻzbekiston Respublikasi xalq taʼlimi vaziri tomonidan tasdiqlanadigan boʻldi.

Endilikda Qoraqalpogʻiston Respublikasi xalq taʼlimi vazirligi, viloyatlar xalq taʼlimi boshqarmalari va Toshkent shahar xalq taʼlimi bosh boshqarmasi rahbarlari, tuman (shahar) xalq taʼlimi boʻlimlari, shuningdek, Vazirlikka idoraviy mansub boshqa tashkilotlar va muassasalar boshliqlarini lavozimga tayinlash va lavozimdan ozod etish mahalliy ijro etuvchi hokimiyat organlari bilan kelishilmasdan Oʻzbekiston Respublikasi xalq taʼlimi vaziri tomonidan amalga oshiriladigan boʻldi.

2019-yil 1-yanvardan boshlab Oʻzbekiston Respublikasi Vazirlar Mahkamasi huzuridagi Taʼlim sifatini nazorat qilish davlat inspektsiyasi tomonidan (keyingi oʻrinlarda — Davlat inspektsiyasi) tumanlar va shaharlar kesimida tanlash asosida umumtaʼlim muassasalari faoliyati samaradorligi boʻyicha reytingi (keyingi oʻrinlarda — reyting) tuziladi. Reyting yakunlari ommaviy axborot vositalarida va Davlat inspektsiyasining veb-saytida keyingi oʻquv yili boshlanishidan kechiktirmay joylashtiriladi.

2019-yil 1-yanvardan boshlab umumtaʼlim muassasalari xodimlari boʻlgan pensionerlarga, ularning ushbu muassasalardagi faoliyati asosiy ish joyi hisoblangan taqdirda, pensiya toʻliq miqdorda toʻlanadi;

2019-yil 1-martdan boshlab davlat umumtaʼlim muassasalariga bolalarni Davlat xizmatlari markazlari yoki Oʻzbekiston Respublikasi Yagona interaktiv davlat xizmatlari portali orqali qabul qilish tartibi bosqichma-bosqich joriy etiladi.

Bundan tashqari, Farmonga muvofiq 2018-yil 1-oktyabrdan boshlab umumtaʼlim muassasalarining vasiylik kengashlarini tugatish belgilanib, ularning oʻrnida tarkibiga muassasa faoliyatiga jiddiy hissa qoʻshishga qodir eng faol ota-onalar, bitiruvchilar, homiylar va boshqa shaxslar kiritiladigan, yuridik shaxs maqomisiz umumtaʼlim muassasalarining kuzatuv kengashlarini tashkil etish nazarda tutilmoqda.

Bir soʻz bilan aytganda muhtaram Prezidentimizning mazkur farmoni jamiyatda oʻqituvchi kasbining nufuzini oshirishga qaratilgan navbatdagi qadamlardan biri deb xisoblaymiz.

Moʻminjon Matyusupov, tuman Adliya boʻlimi boshligʻi.