OʻQITUVChILIK – ENG ULUGʻ KASB

Agar dunyo ichida eng ulugʻ maskan maktab boʻlsa, kasblar ichida eng ulugʻi – oʻqituvchilik kasbidir. Bobokalonimiz Alisher Navoiy taʼbiri bilan aytganda:

Haq yoʻlida kim sanga bir harf oʻrgatmish ranj ila,

Aylamak boʻlmas ado uning haqin yuz ganj ila.

Ilk bor qoʻlimizga qalam tutqazib, bizga yozishni, oʻqishni oʻrgatgan, taʼlim bergan ustozlarimizga qancha rahmat aytsak, qancha taʼzim aylasak ham oz. Ular bizga taʼlim berish bilan birga tarbiya ham berib boradilar. Kelajak haqidagi orzu-istaklarimizni amalga oshirishda ularning oʻrni beqiyos. Ustozlarimiz bizga toʻgʻri yoʻlni koʻrsatguvchi chiroq kabidir.

Oʻqituvchilik kasbi ulkan masʼuliyatni talab qiladi. Sababi yosh avlodga taʼlim-tarbiya berish, ularni har tomonlama yetuk shaxs qilib tarbiyalash aynan ularning zimmasiga yuklatilgan. Bugungi kunda yuksak marralarni zabt etayotgan yoshlarimizni koʻrib, ustozlarimiz oʻz vazifalarini naqadar aʼlo darajada uddalayotganiga yana bir karra amin boʻlamiz.

Har kim maktab ostonasiga qadam qoʻyar ekan, butun vujudini katta hayajon bilan quvonch, faxr-iftixor tuygʻulari chulgʻab oladi. U yerda bizni birinchi ustozimiz kutib oladi. Qoʻlimizga qalam tutqazib, qalbimizda maktabga va kitoblarga mehr uygʻotadi.

Men ham maktabda oʻqib yurgan chogʻlarimdan ustozlarimga havas bilan qarardim. Ularning oʻzlaridagi bilimni mehr bilan oʻquvchilarga berishi, samimiy munosabatlari mening oʻqituvchilik kasbini tanlashimga sabab boʻldi.

Men bu yil Nukus Davlat Pedagogika institutining biologiya fakultetini tugatib, tumandagi 12-sonli umumtaʼlim maktabida biologiya fani oʻqituvchisi boʻlib ish faoliyatimni boshladim.

Maktabda, oliy oʻquv yurtida taʼlim bergan ustozlarim va oilamizda ham shu kasbda faoliyat koʻrsatayotgan akalarim va opam kabi oʻquvchilarning hurmatini qozonib, ularning sevimli ustoziga aylanishga harakat qilmoqdaman. Ayniqsa, maktabda biologiya fanini ilk bor oʻrgatgan ustozim Bahodir aka Doʻsimbetovdan olgan bilimlarim, uning pand-nasihatlari ilk dars jarayonlaridanoq menga juda qoʻl kelmoqda. Ustozimning ish tajribalaridan kelib chiqib, oʻquvchilarga oʻrgatgan nazariy bilimlarni amalda koʻrsatib, mustahkamlash maqsadida ularni tabiat qoʻyniga sayohatga olib chiqib, hayvonot va oʻsimlik dunyosi bilan tanishtirishni rejalashtirdim. Oʻquvchilar ishtirokida turli tadbir va tanlovlar ham oʻtkazib, ularning qiziqishini yanada orttirishni ham koʻzda tutmoqdaman. Shuningdek, maktabimizning 6-11-sinf oʻquvchilari oʻrtasida fan boʻyicha toʻgarak faoliyatini yoʻlga qoʻydik. Bu yilgi oʻquv yilida oʻtkaziladigan Fanlar olimpiadasiga ham oʻquvchilar bilan birgalikda tayyorgarlik koʻrishni boshlab yubordik va faxrli oʻrinlarni qoʻlga kiritishni maqsad qilmoqdamiz.

Men ish faoliyatim davomida oʻqituvchilik kasbining sharafli boʻlishi bilan birga maʼsuliyatli ekanligini ham his qilmoqdaman. Kelgusida oʻz bilimimni va mehrimni ish faoliyatimni boshlagan 12-sonli umumtaʼlim maktabida yosh avlodga taʼlim-tarbiya berishdek sharafli vazifani ado etishga bagʻishlayman. Shu bilan birga doimiy izlanishni, pedagoglik mahoratimni rivojlantirib borishni maqsad qilib qoʻydim va shunga harakat qilaman.

Qalbi daryo aziz ustozlar va hamkasblar! Sizlarni 1-oktyabr – Oʻqituvchi va murabbiylar kuni – umumxalq bayrami bilan chin yurakdan muborakbod etaman. Oʻqituvchilikdek sharafli kasbingizdan kamol topib, elimiz ardogʻida yurishingizni tilayman.

Sohiba Kenjaboyeva, 12-sonli maktabning

biologiya fani oʻqituvchisi.