Pochta aloqasi xizmati zamon bilan hamnafas rivojlanmoqda

Tarixdan maʼlumki, choparlikka eng zukko, xotirasi kuchli va sabr-toqatli insonlarni saralab olishgan. Zero, maktub va har qanday joʻnatilgan narsalarni oʻz vaqtida, aniq va bezarar oʻz egasiga yetkazish ularning zimmasiga yuklatilgan.

Bugungi kunga kelib ularning vazifasini pochta tarmoqlari bajarmoqda. Endilikda ularga bildirilgan ishonch va masʼuliyat avvalgiga qaraganda birmuncha mushkul, desak mubolagʻa boʻlmaydi. Sababi hozirda mahalliy hududlardan tortib, xorijiy joʻnatmalar ham son jihatdan ancha koʻpayib bormoqda.

Tumanimizdagi “Oʻzbekiston pochtasi” AJga qarashli Qoraqalpogʻiston filiali Mangʻit pochta aloqa tarmogʻi xodimlari ham aholiga beminnat yordamini berib kelishmoqda. Mazkur boʻlimda 23 nafar xodim markaziy aloqa boʻlimi hamda 9 ta aloqa boʻlimlarida mehnat qilmoqda.

Pochta tarmogʻi butun tuman boʻylab aholiga xat-xabarlar, joʻnatmalar, banderollar, davriy nashrlarga obunalarni oʻz manziliga yetkazish bilan shugʻullanmoqda. Qolaversa, pul oʻtkazmalari, xalqaro joʻnatmalarni ham qabul qilib, egalariga yetkazish ham shular jumlasidandir.

“Tezkor pochta”, “Kurerlik xizmati” kabi xizmatlar orqali joʻnatilgan xat-xabarlar, banderollar 24 soat davomida respublikaning istalgan manziliga ishonchli tarzda yetkazilishi taʼminlanadi. Umuman olganda, bunday masʼuliyatli vazifalarni tumanimiz pochta xodimlarining sidqidildan ado etayotganligi aholi eʼtirofiga sazovor boʻlmoqda.

Oxunjon ABDULLAYeV,

gazetaning jamoatchi muxbiri.