DEPUTAT MINBARI

Soliq sohasidagi oʻzgarishlar iqtisodiyot rivojiga va xalq manfaatlariga xizmat qiladi

Madamin KAZAKOV,

xalq deputatlari tuman Kengashi deputati.

Prezidentimizning yaqinda qabul qilgan “Oʻzbekiston Respublikasining soliq siyosatini takomillashtirish kontseptsiyasi toʻgʻrisida”gi Farmonida soliq sohasidagi iqtisodiy oʻsish, tadbirkorlik borasidagi faollikning oshishi va toʻlovlar yigʻiluvchanligini taʼminlash kabilarga toʻsqinlik qilayotgan muammolarni bartaraf etish, shuningdek, bu borada Harakatlar strategiyasida belgilangan vazifalarni amalga oshirish maqsadi koʻzlangan.

Oʻzbekiston Respublikasining soliq siyosatini takomillashtirish kontseptsiyasi doirasida 2019-yil 1-yanvardan boshlab mehnatga haq toʻlash fondiga soliq yuki kamaytiriladi. Barcha fuqarolar uchun jismoniy shaxslardan olinadigan daromad soligʻining yagona stavkasi 12 foiz miqdorida joriy etiladi. Shundan 0,1 foizi shaxsiy jamgʻarib boriladigan pensiya hisobvaraqlariga yoʻnaltiriladi va ayrim toifadagi fuqarolarning eng kam oylik ish haqining 4 barobari miqdoridagi daromadlarini soliq solishdan ozod qilishning amaldagi tartibi saqlab qolinadi.

Soliq solishning soddalashtirilgan tartibiga oʻtish mezonlari esa davlat maqsadli jamgʻarmalariga yuridik shaxslarning tushumidan undiriladigan majburiy ajratmalarni bekor qilish, foyda soligʻi stavkasini 14 foizdan 12 foizgacha, tijorat banklari uchun – 22 foizdan 20 foizgacha, dividentlar va foizlar koʻrinishidagi daromadlar boʻyicha toʻlov manbaidan ushlab qolinadigan foyda soligʻi stavkasini 10 foizdan 5 foizgacha pasaytirish hamda tadbirkorlik subʼektlari uchun baʼzi soliq turlarini joriy etish kabilar orqali takomillashtiriladi.

Shuningdek, Farmonga koʻra, ilgʻor xorijiy tajribani hisobga olgan holda, yuridik shaxslar koʻchmas mulkining bozor qiymatini aniqlash mexanizmini joriy qilish yuzasidan chora-tadbirlar kiritiladi. Farmonda koʻrsatilgan soliq tizimini isloh qilish boʻyicha belgilangan chora-tadbirlarni inobatga olgan holda 1-avgustga qadar Oʻzbekiston Respublikasini rivojlantirishning 2019-2021-yillarga moʻljallangan asosiy makroiqtisodiy koʻrsatkichlari prognozi ham ishlab chiqiladi.

Mamlakatimizda soliq yukining izchillik bilan kamaytirilishi hamda mazkur Farmonda koʻrsatilganidek, soliq toʻlashni oʻzgartirish, tadbirkorlik subʼektlariga nisbatan belgilangan soliqlar farqini bartaraf etish, foyda soligʻi stavkasini pasaytirish kabilarning amalga oshishi natijasida aholi daromadlari yanada ortadi. Bu oʻz navbatida iqtisodiy rivojlanishga ham samarali taʼsir koʻrsatadi.

***

HAQIQIY YeR EGASI UChUN HAM MODDIY, HAM MAʼNAVIY RAGʻBAT

Ulugʻbek OʻROZBOYeV, xalq deputatlari tuman

Kengashi deputati, fermer.

Muhtaram Prezidentimiz Shavkat Mirziyoyevning 2017-yil 9-oktyabrdagi “Fermer, dehqon xoʻjaliklari va tomorqa yer egalarining huquqlari va qonuniy manfaatlarini himoya qilish, qishloq xoʻjaligi ekin maydonlaridan samarali foydalanish tizimini tubdan takomillashtirish chora-tadbirlari toʻgʻrisida”gi Farmoni va 2017-yil 10-oktyabrdagi “Fermer, dehqon xoʻjaliklari va tomorqa yer egalari faoliyatini yanada rivojlantirish boʻyicha tashkiliy chora-tadbirlar toʻgʻrisida”gi Qarori mamlakatimiz qishloq xoʻjaligi sohasining rivojida yangi bosqichni boshlab berdi. Ushbu Farmon va Qaror tufayli fermer, dehqon xoʻjaliklari egalari va tomorqachi dehqonlar uchun keng imkoniyatlar eshigi ochildi. Jumladan, ushbu hujjatlarda qishloq xoʻjaligi ishlab chiqaruvchilarini yanada qoʻllab-quvvatlash, fermer, dehqon xoʻjaliklari va tomorqachilarga tegishli boʻlgan ekin maydonlaridan foydalanish samaradorligini taʼminlash, pirovard natijada yer egalarining daromadlarini koʻpaytirishga qaratilgan ustuvor vazifalar belgilab berildi.

Prezidentimiz Sh.Mirziyoyevning shu yil, 26-iyun kuni qabul qilgan “Ilgʻor fermer”, “Mehnatkash dehqon” va “Namunali tomorqachi” koʻkrak nishonlarini taʼsis etish chora tadbirlari toʻgʻrisida”gi Qarori fermerlarni, dehqon xoʻjaligi egalarini va tomorqachi fuqarolarni yanada ruhlantirib yubordi. Chunki bu qaror yerdan unumli foydalanib, moʻl-koʻl qishloq xoʻjaligi mahsulotlari yetishtirishda fidokorona mehnat qilgan dehqonlarni maʼnaviy jihatdan ragʻbatlantirish maqsadida qabul qilingan muhim hujjatdir.

Shulardan xulosa qilib aytganda, endilikda haqiqiy yer egalarini va haqiqiy mehnat kishilarini moʻl daromad va mukofotlar kutadi.

***

MTM SOHASIDA DAVLAT–XUSUSIY ShERIKLIKNI RIVOJLANTIRIShGA KENG YOʻL OChILDI

Gulmirza BOBOJONOV,

52-maktab oʻqituvchisi, xalq deputatlari tuman Kengashi deputati:

2018-yil 25-iyunda Oʻzbekiston Respublikasi Vazirlar Mahkamasining “Maktabgacha taʼlim sohasida davlat-xususiy sheriklikni rivojlantirish uchun shart-sharoitlar yaratish chora-tadbirlari toʻgʻrisida”gi Qarori qabul qilindi.

Qarorga muvofiq, davlat-xususiy sheriklik asosida nodavlat MTMlar tashkil etish uchun yer uchastkalari ajratiladi va boʻsh turgan davlat mulki obʼektlari tadbirkorlik subʼektlariga bepul asosda beriladi, shuningdek, qurilish ishlarini olib borish uchun foizsiz kreditlar ajratiladi. Bunda davlat-xususiy sheriklik toʻgʻrisidagi bitimlar oʻz vaqtida va samarali amalga oshirilishi qatʼiy nazorat qilib boriladi. Bu chora-tadbirlarni amalga oshirishdan koʻzlangan maqsad – bolajonlarni maktabgacha taʼlim-tarbiya bilan qamrab olish darajasini oshirish, ularning sogʻlom, zukko boʻlib ulgʻayishlariga erishishdir.

Albatta, yoshlikda olingan ilm — toshga oʻyilgan naqsh kabi, degan ibora bejiz aytilmagan. Kichkintoylarimiz maktab taʼlimiga MTMlarda munosib tarbiyalanib, kirib borsalar, bu oʻzining ijobiy samarasini berishi shubhasiz.

Bolajonlarni MTMlarlarga qamrab olishni yaxshilash tumanimizda ham dolzarb vazifalardan biri boʻlib turibdi. Chunki ayni kunda 37 ta maktabgacha taʼlim muassasalari faoliyat yuritmoqda. Bu bogʻcha yoshidagi bolajonlarning 29,7 foizini qamrab olish imkoniyatini berayapti.

Joriy yilda 10 ta nodavlat MTMlarning faoliyat boshlashi rejalashtirilgan edi. Hozirgacha 1 ta ana shunday muassasa ish boshladi. Qolganlarida qurilish ishlari boshlanib ketdi. Endilikda maktabgacha taʼlim tizimining nodavlat sektorini rivojlantirishga va moddiy-texnika bazasini mustahkamlashga eʼtibor kuchaytirilaveradi.

Bu borada faoliyat olib borishni istagan tadbirkorlik subʼektlariga yaratilgan imkoniyatlar MTM sohasida davlat-xususiy sheriklikni rivojlantirishga keng yoʻl ochishi shubhasiz.

Biz deputatlar bu boradagi hukumatimiz qarori hayotga tatbiq etilishiga oʻz hissamizni qoʻshishga intilamiz.