KITOBXON YoShLAR TANLOVI: OʻZ IQTIDORINGNI, SALOHIYaTINGNI NAMOYoN QIL!

Mamlakatimizda jamiyat hayotida ezgu qadriyat va anʼanalarni chuqur qaror toptirishga, xususan, xalqimiz, ayniqsa, yosh avlodning maʼnaviy intellektual salohiyati, ong va tafakkuri, dunyoqarashini yuksaltirish, ularning qalbida ona Vatanimizga va xalqimizga muhabbat va sadoqat tuygʻusini kuchaytirish, barkamol shaxsni tarbiyalashda beqiyos ahamiyatga ega boʻlgan kitobxonlik madaniyatini oshirishga alohida eʼtibor qaratilmoqda.

Ulugʻ ajdodlarimizning aql-zakovati va badiiy iqtidori tufayli yaratilgan adabiyotlar, hozirgi oʻzbek va jahon adabiyotining durdona asarlari bilan yoshlarni yaqinroq tanishtirish maqsadida oʻtkazilgan “Yosh kitobxon” tanlovida 250 ming nafarga yaqin yoshlar ishtirok etib, oʻz iqtidorlarini namoyon etishdi. Mazkur tanlov yoshlar orasida kitobxonlik madaniyati oshishiga sezilarli taʼsir oʻtkazdi.

Shu boradagi saʼy-harakatlarni yangi bosqichga koʻtarish maqsadida shu yilning 12-mayida Oʻzbekiston Respublikasi Prezidenti “Buyuk allomalar, adib va mutafakkirlarimiz ijodiy merosini keng oʻrganish va targʻib qilish maqsadida yoshlar oʻrtasida kitobxonlik tanlovlarini tashkil etish toʻgʻrisida” qaror qabul qildi.

“Yosh kitobxon tanlovini oʻtkazish tartibi toʻgʻrisida” qabul qilingan Nizomga muvofiq tanlov uchta yosh toifasi boʻyicha alohida-alohida tartibda yaʼni 10 yoshdan 14 yoshgacha boʻlgan, 15 yoshdan 19 yoshgacha boʻlgan, 20 yoshdan 30 yoshgacha boʻlgan yoshlar orasida oʻtkaziladi.

Tanlov toʻrt bosqichda oʻtkaziladi. Birinchi bosqich tanlovning arizalar qabul qilish va saralash bosqichi boʻlib, unda tanlovda ishtirok etish istagini bildirgan yoshlardan arizalar qabul qilinadi va ular test sinovi asosida saralab olinadi. 86 va undan yuqori ball toʻplagan ishtirokchilar keyingi ikkinchi bosqichda qatnashish  huquqini qoʻlga kiritishadi.

Tanlovning ikkinchi bosqichi har yili iyul oyida tuman, shahar miqyosida 2 ta shart boʻyicha oʻtkaziladi. Bunda ishtirokchilarning iqtidori “Oʻzbek adabiyoti bilimdoni”, “Jahon adabiyoti bilimdoni” shartlari boʻyicha, tanlovning uchinchi-hududiy bosqichi “Buyuk mutaffakkir va adib”, “Badiiy asarlar bilimdoni” va nihoyat yakuniy Respublika bosqichida esa  “Oʻzbek adabiyoti bilimdoni”, “Jahon adabiyoti bilimdoni” “Buyuk mutaffakkir va adib”, “Sheʼriyat” kabi 4 ta shart boʻyicha aniqlanadi.
Tanlovning mahalliy, hududiy bosqichlari gʻoliblari ham munosib taqdirlanadi. Respublika bosqichining uch toifasi gʻoliblari ham “Prezident sovgʻasi” – yengil avtomobil, diplom, “Yosh kitobxon” statuetkasi bilan taqdirlanadi. Ikkinchi, uchinchi oʻrinni egallaganlarni ham munosib sovgʻalar kutmoqda.

Aziz tumanimiz yoshlari!

Siz kitobxonmisiz? Bu borada oʻz iqtidoringizni “Yosh kitobxon” tanlovining 12-14-iyul kunlarida boʻlib oʻtadigan tuman bosqichida sinab koʻring va gʻolib boʻlishga intiling!

Gʻoliblik mukofotlardan tashqari oʻz-oʻzingizga ishonchingiz ortishiga, hayotda oʻz oʻrningizni topishingizga maʼnaviy ragʻbat boʻlishi shubhasiz.

Tanlovning yakuniy bosqichi gʻoliblari safida amudaryolik yoshlar ham boʻlishini tilab qolamiz.

OYGUL RAJABOVA.