Fermer xoʻjaliklarining ishchilari, mexanizator va suvchilar ragʻbatlantirilmoqda (+video)

Tuman hokimi va barcha sektorlar rahbarlari fermer xoʻjaliklarining ishchilari, mexanizator va suvchilar bilan uchrashib, ularga yaratilgan sharoitlar, oylik ish haqilarining oʻz vaqtida toʻlanishini oʻrganib, fidoyi ishchilarni ragʻbatlantirish maqsadida hududlarda tadbirlar oʻtkazmoqda.

Yaqinda Qipchoq ovulida ilgʻor fermerlar, ijarachi-dehqonlar, mexanizatorlar va suvchilar bilan uchrashuv oʻtkazildi. Unda 1-sektor rahbari, tuman hokimi Sultonboy Yoʻldoshev ishtirok etdi. Aytish kerakki, barcha fermer xoʻjaliklarida ishchilar uchun zarur sharoitlar yaratilgan. Mexanizatorlar uylari va dala shiyponlarida issiq ovqat tashkil qilinib, ularning ish haqilari “Agrobank”ning tuman boʻlimi xodimlari tomonidan dala boshiga keltirib berilmoqda.

Tumanimizning boshqa hududlarida ham shu kabi yigʻilishlar oʻtkazildi. Unda sektor rahbarlari – tuman prokurori, ichki ishlar boʻlimi boshligʻi va davlat soliq inspektsiyasi rahbari ishtirok etib, ishchilarning mashaqqatli mehnatlariga evaziga har yili tumanimizda moʻl hosil olishga erishilayotgani taʼkidlandi. Bu yil ham shunday natijalarga erishish uchun ularga barcha zarur sharoitlar yaratilishi taʼkidlandi. Aytish kerakki, birgina iyul oyida fermer xoʻjaliklari ishchilari, suvchi va mexanizatorlarga 885 million soʻmdan ortiq oylik ish haqi berilishi rejalashtirilgan. Shu kungacha “Agrobank”ning tuman boʻlimi tomonidan 530 million soʻmdan ortiq naqd pul mablagʻi ish haqi sifatida dala boshida ishchilarga tarqatildi. Bu kabi chora-tadbirlar ishchilarning yanada kuch-gʻayrat bilan ishlashida muhim omil boʻlishi shubhasiz.