Mustaqil hayotga yoʻllanma berildi
Ayni kunlarda oʻrta maxsus, kasb-hunar taʼlimi muassasalari oʻquvchilari 2017-2018 oʻquv yilini tugatib, yozgi taʼtilga chiqishdi, bitiruvchilari esa oʻzlarining uch yil davomida muassasada olgan bilim va kasbiy koʻnikmalarini namoyish etib, nazariy va amaliy imtihonlarni muvaffaqiyatli topshirishdi.
Shu yilning 25-iyunida Amudaryo qishloq xoʻjalik kasb-hunar kollejida bitiruvchilarning muassasani tugatganligi haqidagi diplomni topshirishga bagʻishlangan tantanali tadbir boʻlib oʻtdi.
Joriy yilda kollejni 617 nafar oʻquvchilar oʻzlari tanlagan kasb-hunarni egallab, mustaqil hayotga uchirma boʻlishmoqda. Ularning 11 nafari fan asoslarini chuqur egallaganlari tufayli imtiyozli diplom olishga muvaffaq boʻldi.
Oʻquvchilarga diplom topshirish marosimi bayram tusini oldi. Aslida ham har bir yosh hayotda oʻz oʻrnini topishida oʻziga xos davrni oʻz ichiga oluvchi oʻrta maxsus, kasb-hunar taʼlimini tugatib, oʻzi tanlagan kasbning egasi boʻlib, el-yurt ravnaqi yoʻlida faoliyatini boshlash uchun diplom olgan kuni ularning xotirasida bir umr muhrlanib qoladi.
Tantanada kollej direktori M. Yoʻldoshev, Toshkent davlat agrar universiteti Nukus filiali oʻqituvchisi, qishloq xoʻjalik fanlari nomzodi Xudoyor Matyoqubov, kollej direktorining oʻquv ishlari boʻyicha oʻrinbosari Sh.Matirzayev, maʼnaviy-maʼrifiy ishlar boʻyicha oʻrinbosari O.Eshchonovlar oʻquvchilarni kollejni tugatib, mustaqil hayotga uchirma boʻlayotganliklari bilan qizgʻin qutladilar va olgan bilim, egallagan kasb-hunarini hayotda muvaffaqiyatli qoʻllab, yurtimizga fidoyi xizmat qilishlarini tiladilar.
Diplomlar tantanali ravishda topshirilgach, ishtirokchilar uchun maroqli kontsert namoyish etildi. Mustaqil hayotga yoʻllanma boʻlgan diplom ularni hayotda yangi-yangi marralarni zabt etishga chorlaydi.
O.Pajabova.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
