TOʻLQIN OVULIDA SAYYoP QABUL BOʻLIB OʻTDI

19-may kuni tumanimizning “Toʻlqin” ovuli hududida istiqomat qiluvchi fuqarolarning turmushi sifatini oshirish, muammolarini oʻrganish va ijobiy hal qilish choralarini koʻrish maqsadida sektor rahbari, tuman hokimi S.Yoʻldashev mazkur ovulda sayyor qabul oʻtkazdi.
Sayyor qabulda boshqa sektorlar rahbarlari, aʼzolari, tuman hokimi oʻrinbosarlari, masʼul xodimlari, korxona, tashkilotlar rahbarlari, tijorat banklarining tumanimizda faoliyat yuritayotgan filiallari rahbarlari, ommaviy axborot vositalari xodimlari ishtirok etdilar.

Uchrashuvda ovul aholisi turmushini yanada yaxshilashga xizmat qiluvchi ijtimoiy-iqtisodiy muammolarni hal qilish yuzasidan, shuningdek oilaviy muammolarining hal qilinishi yuzasidan sayyor qabulga yozilgan fuqarolar qabul qilindi va murojaatlari tinglandi.
Sayyor qabulda fuqaro B.Ortiqov hududdagi 33-sonli maktab va “Vays ovul”ni bogʻlaydigan ulkan asfalt yoʻl chetiga oʻquvchilarga qulaylik yaratish maqsadida piyodalar yoʻlakchasi qurib berilishini, U.Boltaboyev “Qoʻlbergan bobo” qabristoniga oʻtiladigan Qipchoq arna koʻprigini taʼmirlash, sobiq “Madaniyat” QVP binosida maktabgacha taʼlim muassasasi tashkil etish, G.Yoʻldoshev “Toʻlqin” ovulidan oʻtadigan ulkan aylanma yoʻlning  ovul hududidagi qismi yaroqsiz holga kelib qolganligidan rekonstruktsiya qilinishiga amaliy yordam berish, qishloq xoʻjaligi ekinlarini oziqlantirishda foydalaniladigan mineral oʻgʻitlar narxini pasaytirish, Z.Sobirovning “Bogʻonoli” aholi punktida futbol maydonchasi, savdo doʻkoni qurishga yer uchastkasi ajratish, A.Matyoqubov bemor onasiga fuqarolik pasportini olishga yordam berish, S.Boymurodov “Mikrokreditbank”dan ovul fuqarolariga ajratilayotgan kreditlarni oʻz muddatida berilishini taʼminlash, G.Qodirov “Xoʻja bobo” qabristoni hududini aniqlab berish va qabristonga qorovulxona qurish, K.Xolboyev oʻgʻli va oʻziga fuqarolik pasporti olishga amaliy yordam berish haqida murojaat qildilar.

Sayyor qabulda fuqarolarning murojaatlari atroflicha oʻrganib chiqilib, choralar koʻrilishi va bu haqda fuqarolarga maʼlum qilinishi tushuntirildi.

Shuningdek, T.Yoʻldoshev, S.Boymurodovlarning murojaatlariga qonun doirasida tushuntirishlar berildi.

Oygul PAJABOVA.