IJODKORLAR MAKTABGA TAShRIF BUYuRDILAR

“Taraqqiyot koʻzgusi” gazetasi tahririyati va “Jayxun ilhomlari” nodavlat notijorat tashkiloti hamkorligida oʻtkazilayotgan “Ommaviy kitobxonlik oyligi” doirasida shu kungacha tumanimizning turli hududlarida “Sayyor kitob karvoni”, “Koʻchma kitob doʻkoni” kabi koʻplab tadbirlar, “Eng yaxshi sovgʻa - kitob”, “Kutubxonaga kitob sovgʻa qilaman” kabi aktsiyalar oʻtkazildi.

Oʻsib kelayotgan yosh avlod koʻnglida kitob mutolaasiga ishtiyoq uygʻotish, mutolaa madaniyatini targʻib etish va kitobxonlik ommaviyligiga erishish maqsadida tashkillashtirilgan oylik doirasida 16-may kuni yana bir tadbir - 40-sonli maktabda oʻquvchi yoshlarning ijodkorlar bilan uchrashuvi boʻlib oʻtdi.

Uchrashuvda Beruniy tumani “Xalq minbari” gazetasida muxbirlikdan muharrirlikkacha boʻlgan masʼuliyatli lavozimlarda ishlagan, "Qoraqalpogʻistonda xizmat koʻrsatgan jurnalist” faxriy unvoni sohibi, hozirgi kunda “Beruniy avlodlari” jamoat fondi raisi, “Faxriya” sheʼrlari toʻplami va “Beruniy avlodlari” nomli ijtimoiy-publitsistik asar muallifi Qurbonboy Shoniyozov, “Jayxun ilhomlari” NNT raisi Ahmad Nafasov, “Taraqqiyot koʻzgusi” gazetasi maxsus muxbirlari Ollambergan Jumaniyozov, Robiya Yoʻldosheva, Oygul Rajabovalar ishtirok etdilar.

Tadbirni maktab direktori Sanobar Xoʻjamurodova ochdi va Ahmad Nafasov boshqarib bordi.

Uchrashuv sheʼrxonlik, suhbat, savol-javoblar tarzida davom etdi. Shu oʻrinda bir narsani taʼkidlash joizki, tumanimiz taʼlim muassasalari ichida oʻz nufuziga ega mazkur maktabda kitobsevarlar, ijodkor oʻquvchilar koʻpchilikni tashkil etadi. Tabiiyki, ular uchun ijodkorlar bilan uchrashish, dildan suhbatlashish, ijod namunalarini tinglash va oʻzlarining mashqlarini mehmonlarning  eʼtiboriga havola etish esda qolarli va qiziqarli voqea boʻldi.

Tadbir soʻngida maktab direktorining maʼnaviy-maʼrifiy ishlar boʻyicha oʻrinbosari Sayyora Jumamurodova mehmonlarga tashrif uchun chuqur minnatdorchilik bildirdi.

Sevara Ismoilova, Amudaryo akademik litseyi oʻquvchisi.