Prezident amudaryolik urush faxriysini shaxsan tabrikladi (+foto)

9-may kuni Toshkent shahridagi Botanika bogʻida Xotira va qadrlash kuni hamda Ikkinchi jahon urushida qozonilgan gʻalabaning 73 yilligiga bagʻishlangan bayram tadbiri boʻlib oʻtdi. Unda Oʻzbekiston Pespublikasi Prezidenti Shavkat Mirziyoyev ishtirok etdi. Bu haqda OʻzA xabar bermoqda.

Tadbirga Qoraqalpogʻiston Pespublikasi va viloyatlardan urush va mehnat faxriylari taklif etildi.

Davlatimiz rahbari bu yerga yigʻilganlarni, butun xalqimizni 9-may – Xotira va qadrlash kuni, Ikkinchi jahon urushidagi gʻalabaning 73 yilligi munosabati bilan tabrikladi.

OʻzA saytida eʼlon qilingan fotosuratlarning birida Prezidentimiz Sh.Mirziyoyevning amudaryolik urush faxriysi Sobir ota Nurillayevni tabriklayotgan payti aks ettirilgan.

Sobir Nurullayev 1942-yilning sentyabr oyida koʻplab vatandoshlarimiz qatori Vatan himoyasiga otlangan. Endigina 18 yoshga toʻlgan yosh jangchi dastlab Omsk shahridagi tankchilar bilim yurtida taʼlim oldi. Bu yerda u tankni boshqarish, janglarda uning oʻqotar qurolidan foydalanish sirlarini puxta oʻrgandi. Bir oy ichidayoq haqiqiy tankchiga aylangan yosh jangchi oʻziga topshirilgan tank yordamida quroldosh doʻstlari bilan birgalikda dushmanga qaqshatqich zarbalar berdi. Shundan keyin u bir qancha vaqt piyodalar qoʻshinida pulemyotchi vazifasini ado etdi.

U urush tugagandan keyin 1947-yilgacha ozod qilingan mamlakatlar chegaralarini tiklashda xizmat qildi va oʻz yurtiga eson-omon qaytib keldi.

Sobir ota Nurullayev 1947-yildan 1967-yilgacha Mangʻit paxta tozalash zavodida, 1967-yildan 1996-yilgacha qurilish tashkilotlarida chilangar vazifasida mehnat qildi.

Sobir ota turmush oʻrtogʻi Mavluda momo bilan 2 oʻgʻil va 5 qizni tarbiyalab voyaga yetkazdi. Ayni kunda u farzandlari, nevara-chevaralari ardogʻida farovon hayot kechirayapti.