Haqiqatlar jaranggi

Ayollar majlisi boʻlyapti, eng faollar yigʻilgan. Minbarda nuroniy hoji ona gapiryapti. Shivir-shivirlar toʻxtadi, boshlar «toʻgʻri-toʻgʻri» ishorasini qilyapti, koʻzlar yonib ketdi:

– Nima uchun bugun ajrashishlar koʻp? Negaki, oilada erkakning oʻrni pasayib ketmoqda, keskin! Bu xavfsiraydigan holat! Ayollar, bugun biz faolmiz, tadbirkormiz. Bizga yoʻllar ochiq. Biz rahbarmiz! Oilalar tinch boʻlishi, ajrashishlarning kamayishi, jinoyatchilikning oldini olish kabi koʻplab masalalarga masʼulmiz. Xoʻsh, ayting-chi, nega ajrashishlar kun sayin koʻpaymoqda? Nega tirik yetimlar soni ortib boryapti? Eʼtibor beraylik, haftalab yoʻlda yurib savdo-sotiq qilishga majbur boʻlayotgan ona bolasiga qanday vaqt ajratadi? Chetda ishlayotgan ayollarni aytmay qoʻya qolaylik. Ularning farzandlari qurgan oilalar moʻrt boʻlishi tabiiy emasmi?! Bolani taʼminlash, deganda nega faqat moddiy taʼminotni tushunamiz? Ayollar epchil boʻlib borayotgani sari “uy bekasi”ga aylanib qolayotgan erkaklar koʻpaymoqda! Bu kelajagimiz uchun ulkan xavf, axir! Oilada erkakning gapi “yurmayapti”. Negaki, taʼminotni koʻpincha biz boʻyinlaymiz. Keyin, boshqaruvni ham oʻz qoʻlimizga olyapmiz-da. Xafa boʻlmanglar, opa-singillar, hatto shu yerda oʻtirganlarimizning orasida ham bu holatlar koʻp uchraydi.

Men oʻqituvchi boʻlib ishladim. Roʻzgʻorda har xil vaziyatlar uchraydi. Hayot bir tekis emas. Maktabda ishlab, tunda tikish tikardim. Patir-non yopib, Nukus shahriga sotib kelgan paytlarim ham boʻlgan. Men pul topganman, deb erimning yuziga biron martayam solgan emasman. Ayol oilada oʻz oʻrnini bilishi kerak. Oilada otaning roli kuchaymas ekan, u mustahkam boʻlmaydi! Ayol – ayolligi bilan moʻʼtabar. Mana bugun cholim, oilam ardogʻidaman, Mangʻitchasiga aytganda, boshida koʻtarib yuradi. Bir ayolga bundan ortiq nima kerak!?

Koʻzlar yonib tinglandi. Yuraklar yonib ketdi. Boshlar «toʻgʻri», ishorasini qilib charchamadi. Zalda haqiqatlar jarangladi!

Dildora XUDOYBERGANOVA,

tuman Xotin-qizlar qoʻmitasining xotin-qizlar

bilan ishlash va oilalarda maʼnaviy-axloqiy

qadriyatlarni mustahkamlash boʻyicha mutaxassisi.