Muhammad Yusuf xotirasi mangu

Vatanni sevishni – shoirdan oʻrgan

Oʻzbek adabiyoti shunday chamanzorki, uning boʻstonida gul koʻp, chechak koʻp. Bu boʻstonda bir-biriga oʻxshamaydigan, bir-birini takrorlamaydigan dilbar shoirlar avlodi qayta-qayta boʻy choʻzaveradi.

Koʻngil mulkimizda nazm gulshani bor. Sheʼrdan bahra olmoqni istagan har bir muxlis uni taniydi. U oddiy inson. Oʻzi kabi oddiy, samimiy boʻlgan yaxshi insonlar uning dilini tushinadi va qadrlaydi. Uni sheʼriyat muxlislari biladi, xonanda-sozandalar taniydi, bastakorlar hurmat qiladi. Bu qalbi pok insonning samimiy sheʼrlari ohanrabo qoʻshiqlarga aylanib, har bir oʻzbek xonadoniga kirib borgan lirik shoir Muhammad Yusufdir.

Oʻzi oʻlsa oʻlar, soʻzi oʻlmaydi,

Hamisha barhayot nasl shoirlar.

Haqiqiy shoirning qabri boʻlmaydi.

Yurakka koʻmilar asl shoirlar.

Muhammad Yusufning ushbu bashoratomuz soʻzlari xuddi oʻzi va oʻziga oʻxshagan, yaʼni qalblarimizga koʻmilgan, manzil-makon topgan shoirlarga atalgan edi.

Haqiqatan ham haqiqiy shoirlarning qabri boʻlmaydi, ular yuraklarimizga koʻmiladi. Yuqoridagi sheʼrda aytilganidek, “yuragimizdan manzil-makon topgan” shoirlarimizdan biri edi Muhammad Yusuf.

Sheʼriyatimizda hech kim Vatanni Muhammad Yusufdek yonib kuylamagan, shoir hech qachon chiroyli, yoniq jumlalar tuzishga urinmaydi. Oʻz uslubiga sodiq qolib, kundalik lugʻat boyligidagi oddiy soʻzlardan oʻzini ham, oʻquvchilarni ham zoriqtirmay vatan muhabbati deya atalmish tuygʻuni ilohiy yuksaklikdan koʻngillarga singdira oladi.

Muhammad Yusufning “Ulugʻimsan Vatanim” sheʼri asosida yaratilgan qoʻshiqni eshitmagan, uni xonandaga joʻr boʻlib birga aytmagan yurtdoshimiz kam topiladi. Bastakor sheʼr matniga mazmun-mohiyatiga shunchalar mos, ohangdosh musiqa topganki, goʻyo shoir oldindan shu musiqani xirgoyi qilib ashʼor bitganday. Sheʼrdagi mazmun va ohang rivoji musiqada ikkinchi umrini boshlaydi, xonanda ovozi goh kuchayib, goh pasayib oʻzbekning tarixiy koʻtarilish va tanazzul bosqichlarini ifoda etadi.

Xalqning asl farzandlari hamisha eslanadi. Bu yil shoir tavalludining 64 yilligi yurtimiz miqyosida keng nishonlandi. Jumladan 17-sonli oʻrta maktabda ham katta tadbir oʻtkazildi. Ushbu tadbirda Muhammad Yusuf qalamiga mansub eng sara sheʼrlar ijro etildi va qoʻshiq qilib kuylandi. Muhammad Yusuf oʻzi sheʼr oʻqigan videorolik namoyishi oʻquvchilar qalbida shoirning haqiqiy qiyofasini gavdalantirdi. Tadbirni bir-biridan jozibador raqslar yanada maroqli qildi.

Xalq shoiri. Ushbu nomga, mavqega sazovor boʻlish, haqiqiy maʼnoda el dardi uning tashvish-u quvonchlariga sherik boʻlish, qalbdan his etish, sevish va uning uchun qaygʻurib yashash har kimga ham nasib etavermaydigan taqdir.

Albatta, bunday fidoyilikning mukofoti ham bor. Zero, xalq yashar ekan, u tan olgan shoirning chirogʻi oʻchmaydi.

Inobat Rajabova, 17-sonli maktabning

ona tili va adabiyoti fani oʻqituvchisi.