HAR QARICh YeRDAN UNUMLI FOYDALANISh – FAROVONLIK GAROVI

Bugungi kunda yurtimizda koʻklamning qulay, iliq kunlaridan foydalanib, ertagi ekinlarni ekib, yuqori hosil olish uchun harakat tobora avj olmoqda. Chunki tomorqa yerlarda yetishtirilgan mahsulotlar eng avvalo, yangi uzib isteʼmol qilinishi, ekologik tozaligi bilan afzal. Qolaversa, butun oila aʼzolari hamjihatlikda yetishtirgan mahsulotning taʼmi oʻzgacha boʻladi, roʻzgʻorga baraka kiradi.

Yashirishning hojati yoʻq, bugungiday dorilomon kunlarda ham nochor yashayotgan, kam taʼminlangan oilalar yoʻq emas. Aholining ana shunday gʻamxoʻrlikka muhtoj qatlami uchun ham tomorqasini qoʻshimcha daromad manbaiga aylantirishi, chorva, parranda parvarishlashi orqali qoʻshimcha daromad topishiga erishish, albatta, kelgusida oʻz natijalarini beradi. Tomorqa barcha xonadonlar uchun ham roʻzgʻorga madadkordir.

Yaqinda shu maqsadda tuman Kengashi deputatlari, “Oq oltin” ovul fuqarolar yigʻini hamda jamoat tashkilotlari vakillari xonadonma-xonadon yurib, mazkur ovulda yerdan foydalanish ahvoli ustidan deputatlik va jamoatchilik nazoratini amalga oshirdik.

Tumanimizning “Oq oltin” ovuli aholisi azal-azaldan dehqonchilikda oʻziga xos tajriba va mahoratga ega. Ular birinchilardan boʻlib, koʻkpiyoz, sabzi, kartoshka, bodringlarni yetishtirib, bozorga chiqarishadi. Xonadonlar tomorqalarini koʻzdan kechirsangiz, hozir ertagi kartoshka, piyozlari koʻk solib turganini koʻrasiz.

Ovulning tajribali tomorqa egasi Yoʻldosh Samandarov oʻz hovlisida barpo etgan issiqxonasida pomidor, bodring, bulgʻor qalampiri kabi ekinlar koʻchatlarini yetishtirib, otiziga koʻchirib ham boʻldi. Erta ekilgan kartoshka bir tekis koʻkarib chiqqan.

Shuningdek, Egambergan Safarniyozov, Akram Yusupovlarning tomorqasida ham koʻzni quvontiradigan manzaralarni koʻrish mumkin. Pushtalarga koʻchirib oʻtqazilgan pomidor, bulgʻor qalampiri, bodring nihollari rivoji yaxshi.

Ovulning “Toza bosu” aholi punktidagi 300 dan ziyod xonadon istiqomat qiladigan shu nomdagi koʻcha boʻylab yurgan kishi 2007-2008-yillarda qurilgan 20 tacha xonadon yashaydigan qismida yerlarning oqarib, shoʻrlab yotganidan ajablanishi tayin. Koʻcha yaqinidan ulkan yop oqib oʻtganligi, avval mavjud boʻlgan zaxkash keyinchalik koʻmilib qolganligidan tomorqa yerlar haddan ziyod shoʻrlab ketgan.

– Yerimizga ketmon ursak, zax suv chiqadi. Biz ham oʻzimizga kerakli mahsulotlarni oʻz tomorqamizda yetishtirishni orzu qilamiz, – deyishadi mazkur hududda istiqomat qiluvchilar.

Nazorat guruhi aʼzolari ularga amaliy yordam berish yuzasidan chora-tadbirlar belgiladilar.

Shuningdek, ovulda faoliyat yuritayotgan “Nazokat-Shokir” fermer xoʻjaligida oʻtgan yili xoʻjalik ekin maydonlarining ayrim qismiga rejada belgilanmagan ekin – sholi ekilgani aniqlanib, xoʻjalik raisi Ikrom Davlatyorov kelgusida buningdek holatni takrorlamaslik yuzasidan ogohlantirildi.

maydonlarimizda, tomorqa yerlarda yetishtiriladigan hosil kelgusi farovon hayotimizni taʼminlaydi. Shu boisdan ham bu masalaga beparvo qarashga haqqimiz yoʻq.

Rim OʻROZBOYeV, Fuqarolarning oʻzini oʻzi boshqarish

organlari faoliyatini muvofiqlashtirish boʻyicha

tuman Kengashi raisining oʻrinbosari,

xalq deputatlari tuman Kengashi deputati.