Amudaryoda 8-mart – Xalqaro xotin-qizlar kuni keng nishonlandi
Bahorning tashrifi biri biridan goʻzal bayramlar bilan boshlandi va har bir koʻngilga joʻshqinlik baxsh etadi. 1-mart oʻzbek xalqining latofatli shoirasi, vafo va sadoqatning buyuk timsoli, baxt va bahor kuychisi, Oʻzbekiston Qahramoni, Oʻzbekiston xalq shoirasi Zulfiyaxonim tavalludi kuni bugun mamlakatimizda keng nishonlandi. Shoira sevgan va kuylagan goʻzal bahorning yana bir ajoyib ayyomi 8-mart – Xalqaro xotin-qizlar kuniga bagʻishlangan bayramona tadbirlar esa ayolga ehtirom, yuksak etibor va mehr tuygʻularini oʻzida mujassam etib, xalqimiz qalbiga olam-olam zavq bagʻishlab, har bir xonadonda, mehnat jamoalarida, oʻquv muassasalarida koʻtarinki ruhda oʻtkazilmoqda.
Joriy yilning 3-mart kuni Mangʻit shahridagi serhasham “Bek” toʻyxonasida tumanimizning faol xotin qizlari uchun fayzli dasturxon yozilib tantanali bayram kechasi tashkil etildi. Davlat va jamoat ishlarida, oʻqishda va ijodda tumanimiz hayotining barcha sohalarida faoliyat yuritayotgan faol ayol qizlar, pir-u badavlat, aziz va muhtarama onaxonlar ishtirok etgan bayram tadbirini tuman xotin-qizlar qoʻmitasi raisi, Qoraqalpogʻiston Pespublikasi Joʻqorgʻi Kengesi deputati Maryam Ahmedova ochdi va muhtarama onaxonlar, aziz ayol-qizlarni 8-mart Xalqaro xotin-qizlar kuni bilan samimiy muborakbod etdi.
Shundan soʻng, tuman hokimi Sultonboy Yoʻldoshev bayram tadbirida ishtirok etayotgan faol ayol-qizlarni yaqinlashib kelayotgan 8-mart xalqaro xotin qizlar kuni – bahorning ilk ayyomi bilan muborakbod etdi.
Hayotimiz koʻrki, oilalarimiz fayzi, qalbimiz quvonchi boʻlgan mehribonlarimiz qadrli onajonlar, aziz opa-singillar, –dedi u oʻz tabrik nutqida. – Sizlar bor ekansiz, hamisha hayotimiz fayzli, har bir ishimiz, barakali koʻngillarimiz xotirjam. Hamisha oilalarimiz, ona yurtimiz bahtiga sogʻ omon boʻlinglar.
Tuman hokimi S.Yoʻldoshev tumanimizning ijtimoiy-maʼnaviy, iqtisodiy va madaniy hayotidagi samarali faoliyati uchun bir guruh ayol-qizlarga tuman hokimligining tashakkurnomalari va fahriy yorliqlarini topshirdi.
Bayram tadbirida “Nuroniy” jamgʻarmasi tuman boʻlimi raisi Bekmon Allamberganov, fuqarolarning oʻzini-oʻzi boshqarish organlari faoliyatini muvofiqlashtirish boʻyicha tuman kengashi rahbari Ashirboy Qoʻshayev, taʼlim faxriysi Jongilbeka hoji
Bobojonovalar aziz va muhtarama ayol-qizlarni 8-mart - Xalqaro xotin qizlar ayyomi bilan samimiy tabrikladilar.
Fayzli dasturxon atrofida jam boʻlgan onaxonlar va opa-singillarga tuman hokimi tomonidan tayyorlangan bayram sovgʻalari tuhfa etilib, kontsert dasturi namoyish qilindi.
Tuman madaniyat boʻlimi tomonidan tayyorlangan kontsert dasturida 9-sonli bolalar musiqa va sanʼat maktabining oʻzbek xalq cholgʻu ansambili hamda anʼanaviy xonandalar ansambillari ijrosida mumtoz kuy va navolar, 4-sonli MTM tarbiyalanuvchilari talqinidagi shoʻx raqslar, onani, ayolni madh etuvchi sheʼr va qoʻshiqlar bayram tadbiriga oʻzgacha zavq bagʻishladi.
Hurmat va ehtirom yuksak eʼtibor va ragʻbatdan mamnun koʻngillar yuksaldi. Tumanimizning faol xotin-qizlari sharafiga tashkil etilgan bayram tadbirida opalar ezozlandi ulugʻ va muhtarama ayolga yuksak ehtirom koʻrsatildi. Tadbir barchaga xush kayfiyat baxsh etdi.
P.Yoʻldosheva
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
