IQTIDORLI BOLALAR MASKANIDA

Ayni kunda mamlakatimizda yoshlarimizga taʼlim-tarbiya berish bilan birgalikda kasb-hunar oʻrgatish, ularni oʻn barmogʻi hunarli insonlarga aylantirish, ertangi hayotga barkamol inson sifatida kirib borishlariga puxta zamin yaratish maqsadida bir qancha ishlar amalga oshirilayapti.

Tumanimizda faoliyat yuritayotgan “Barkamol avlod” bolalar markazida ham yoshlar iqtidorini shakllantirish, ularning turli hunarlarga va kasblarga boʻlgan qiziqishlarini oshirish borasida koʻlamli ishlar amalga oshirilayapti. Biz ayni kunda ushbu muassasada u yoki bu hunarga qiziqishlari kuchli boʻlgan yuzlab iqtidorli bolalarni uchratishimiz mumkin. Ularning yoniq koʻzlarida yangiliklarga, bunyodkorlikka boʻlgan ishtiyoqni koʻrib, koʻzimiz quvonadi, albatta.

Bugungi kunda mingdan ortiq bolani oʻz bagʻriga olgan ushbu maskanda 47 ta toʻgarak faoliyat koʻrsatayapti.

Toʻgaraklar ishi uch xil yoʻnalishda shakllantirilgan boʻlib, ular badiiy ijodiyot, texnik ijodiyot, oʻlkashunoslik va ekologiya yoʻnalishlaridan iborat.

Bu maskanda iqtidorli bolalarning isteʼdodlarini shakllantirishda muhim ahamiyatga ega boʻlayotgan bir necha toʻgaraklar faoliyati bilan tanishganimizda ularda olib borilayotgan mashgʻulotlar bizni haqiqatan ham qoyil qoldirdi.

Shokir Xudoyberganov rahbarligidagi “Shoʻx bolalar” toʻgaragida bugungi kunda 10 nafardan ortiq boʻlajak xonandalar musiqa va xonandalik sirlarini oʻrganishmoqda. “Shoʻx bolalar” jamoasi har yili tumanimizda oʻtkazilayotgan bayram tadbirlarida faol ishtirok etib kelishadi. Ular har bir bayram tadbiri uchun yangi qoʻshiqlar tayyorlashga harakat qilishadi. “Oʻzbekiston”, “Bizlar – barkamol avlod” va “Hunar oʻrgan” qoʻshiqlari ular tomonidan doimo sevib ijro etiladigan qoʻshiqlardan hisoblanadi.

Biz tashrif buyurgan yana bir toʻgarak – ingliz tili toʻgaragi ham oʻquvchilarning eng sevimli toʻgaraklaridan biri ekan. Bu yerda biz kichkina bolalarning ingliz tilini katta qiziqish, zoʻr ishtiyoq bilan oʻrganayotganlariga guvoh boʻldik. Mazkur toʻgarak aʼzolarining ingliz tilini zoʻr ixlos bilan oʻrganishlarining boisi, toʻgarak rahbari Mahfuza Ibragimovaning bolalarga bu tilni oʻrgatishda ilgʻor usullardan foydalangan holda mashgʻulot oʻtkazishi muhim omil boʻlayotgan ekan.

Biz toʻgarak ishtirokchilari tomonidan ingliz tilida ijro etilgan sheʼr va qoʻshiqlarni tinglab, ularning ustozi, yosh oʻqituvchi Mahfuza Ibragimovaning toʻgarak ishlarini tashkil etishdagi qobiliyatiga, gʻayratu shijoatiga qoyil qoldik.

Gulasal Allambergenova rahbarligidagi toʻquvchilik toʻgaragi ham namunali toʻgaraklardan hisoblanar ekan. Bu toʻgarak eshigini ochishimiz bilanoq, biz rang-barang iplar bilan toʻquv ishlarini amalga oshirayotgan qizlar davrasiga qoʻshildik. Toʻquv dastgohlarini mohirlik bilan harakatga keltirib, ixlos bilan ishlayotgan qizlarning biri-biridan chiroyli narsalarni toʻqishayotgani bizning havasimizni keltirdi.

– Men 31-sonli maktabning 10-sinf oʻquvchisi Gulnoza Jumaniyozova boʻlaman, – deya tanishtirdi oʻzini toʻgarak aʼzolaridan biri. – Men bu yerga toʻrt yildan buyon qatnab, toʻquvchilik sirlarini oʻrganayapman. Toʻquvchilik boʻyicha ancha tajribaga ega boʻldim. Hozir koʻpgina narsalarni oʻzim mustaqil ravishda toʻqiy olaman. Ustozim Gulasal opadan cheksiz minnatdorman.

Biz bu toʻgarak faoliyati bilan tanishib boʻlganimizdan keyin bolalar markazining “Boshlangʻich texnik modellashtirish” toʻgaragiga tashrif buyurdik. Toʻgarak faoliyati bilan tanishganimizda oʻquvchilar tomonidan yaratilgan samolyotlar, minoralar, raketalar, uylar, traktorlar va turli hayvonlar maketlarini koʻrib, ularning iqtidorlariga qoyil qoldik.

Ushbu toʻgarak aʼzosi Bekposhsha Abdullayeva “Kamalak yulduzlari” tanlovida birinchi oʻrinni, “Badiiy ijodiyot festivali”da doʻppidoʻzlik boʻyicha ikkinchi oʻrinni, “Texnik ijodiyot festivali”da uchinchi oʻrinni olishga muvaffaq boʻlgan. Shuningdek, toʻgarak aʼzolaridan Jamshid Bobojonov, Xurshid Rajabboyev va Javohir Xoʻjamurodovlar ham tanlovlarda turli nominatsiyalar boʻyicha gʻoliblikni qoʻlga kiritishgan.

Bu yerda shugʻullanayotgan yoshlarning oʻz kasbining ustalari, mehri daryo ustozlar rahbarligida oʻzlari tanlagan yoʻnalishlar boʻyicha oʻtkazilayotgan mashgʻulotlarda faol ishtirok etib, oʻz iqtidorlarini namoyon qilayotganlari bizni nihoyatda xursand qildi.

“Barkamol avlod” bolalar markazidan olam-olam taassurotlar bilan qaytar ekanmiz, u yerdagi har bir toʻgarakda ishtirok etayotgan yoshlarimizning bilim olishga, hunar oʻrganishga tashnaligi, orzulari va kamolot sari sidqidildan intilishlari bizda ularning ertangi kuniga, kelajagining porloq boʻlishiga katta ishonch uygʻotdi.

Sevara IBROHIMOVA, gazetaning jamoatchi muxbiri.