Amudaryoda 2017-yil davomida 9 nafar qidiruvdagi jinoyatchilar ushlandi

Mamlakatimizda oʻtgan bir yil mobaynida ichki ishlar organlari faoliyatini tubdan isloh qilish boʻyicha keng koʻlamli ishlar amalga oshirildi. Yil davomida ichki ishlar xodimlariga huquq-tartibot va jamoat xavfsizligini taʼminlash, fuqarolarning huquq va qonuniy manfaatlarini himoya qilish kabi vazifalarini oʻz vaqtida bajarishlari uchun keng imkoniyat va qulayliklar ham yaratib berildi.

Berilgan imkoniyatlardan samarali foydalanayotgan tuman ichki ishlar boʻlimi xodimlari tomonidan 2017-yil davomida tuman hududida tezkor xizmatni yaxshilash, siyosiy-ijtimoiy muhitni barqarorlashtirish, jinoyatchilikka qarshi kurashish, huquqbuzarliklarning oldini olish, fuqarolar xavfsizligini taʼminlash, diniy ekstremizm va uning turli koʻrinishlariga qarshi kurashish borasidagi vazifalarni vaqtida va sifatli bajarishga harakat qilindi. “Tozalash”, “Antiterror”, “Spitamen”, “Arsenal”, “Oriyat” kabi tadbirlar yordamida jinoyat va huquqbuzarliklarning oldini olishdagi ishlar samaradorligi oshirilmoqda.

Tumandagi jinoyat qidiruv yoʻnalishidagi jinoyatlarning oʻta ogʻir turlari 58,3 foizga, qasddan odam oʻldirish 66,6 foizga, tovlamachilik 75 foizga, muqaddam sudlanganlar tomonidan sodir etilgan jinoyatlar 48,1 foizga, mast holdagi shaxslar tomonidan sodir etilgan jinoyatlar 42,8 foizga, ayol-qizlar tomonidan sodir etilgan jinoyatlar 55,5 foizga kamayishiga erishildi. Olib borilgan tezkor qidiruv ishlari natijasida 2017-yilning oxiriga qadar qidiruv eʼlon qilingan 9 nafar qidiruvdagi jinoyatchilar ushlandi. Shuningdek, giyohvandlik va unga qarshi kurash boʻyicha olib borilgan ishlar natijasida bu boradagi jinoyatlar ham kamayishiga erishildi.

Tumandagi huquqbuzarlik va jinoyatchilikning oldini olish boʻyicha imkoniyat boricha harakat qilib, xalqqa xizmat koʻrsatish biz ichki ishlar xodimlari uchun burch hisoblanadi. El-yurtga xizmat qilish, jamiyat va jamoat xavfsizligini taʼminlashga doim masʼulmiz. Zero, Prezidentimiz Oliy Majlisga Murojaatnomasida taʼkidlaganlaridek, bizning vazifamiz va bizga xalqimiz, davlatimiz tomonidan qoʻyilgan “Yagona va eng qattiq talab – bu fuqarolarning qonuniy manfaatlariga xizmat qilish va ularning huquqlarini har qanday holatda qattiq himoya qilishdan iborat”.

Aziz QUPBONIYoZOV, tuman IIB boshligʻi oʻrinbosari, mayor.