DUNYoDAGI ENG BAXTLI YoShLARMIZ

Har kim bilim olish huquqiga ega. Bepul umumiy taʼlim davlat tomonidan kafolatlanadi. Maktab ishlari davlat nazoratidadir.

Oʻzbekiston Respublikasi Konstitutsiyasining  41-moddasi.

Men umumtaʼlim maktabining 9-sinfini tugatish arafasida edim. Nafaqat men, balki ota-onam ham maktabni tugatganimdan soʻng qayerda, qaysi kasb-hunar kollejida tahsilni davom ettirishim haqida tinmay bosh qotirardik. Shunday kunlarning birida  muhtaram Prezidentimiz 11 yillik taʼlim tizimini qayta tiklash fikrini ilgari surdilar. Yurtboshimizning bu fikrini nafaqat mening ota-onam, balki barcha yurtdoshlarimiz  mamnuniyat bilan kutib oldilar. Chunki biz yashaydigan “Choqcha” mahallasi “Choykoʻl” ovulining Turkmaniston Respublikasi bilan chegara hududida joylashgan, mabodo, biron kasb-hunar kollejiga oʻqishga joylashsam, kamida 10-15 chaqirim masofaga qatnashimga toʻgʻri kelar, oʻqish uchun sarflashim mumkin boʻlgan qimmatli vaqtimning asosiy qismi yoʻl yurish bilan oʻtib ketardi.

Hozirgi kunda nafaqat men, balki barcha sinfdoshlarim oʻzimiz uchun qadrdon boʻlgan 22-sonli umumtaʼlim maktabining 10-sinfida tahsil olmoqdamiz.

Mamlakatimizda biz yoshlarning oʻz qobiliyat va iqtidorlarimizni namoyon etishimiz uchun barcha qonuniy asoslar yaratib berilgan. Baʼzan internet tarmoqlarida, televideniye orqali namoyish etilayotgan ayrim xorij davlatlaridagi tengdoshlarimiz hayoti haqidagi maʼlumotlarga koʻzim tushib, biz Oʻzbekiston yoshlari naqadar  baxtli ekanligimizni his etaman. Bizning bepul bilim  olish huquqimiz Konstitutsiyamizda mustahkam kafolatlab qoʻyilganligi, shaxsan Prezidentimizning  oʻzlari har bir bolaning,  yoshlarning baxt-saodati, kelajagi uchun qaygʻurib, gʻamxoʻrlik qilayotganining oʻzi qalbimizga iftixor bagʻishlaydi.

Men Konstitutsiyaviy huquqimdan toʻla foydalangan holda, oʻzim xohlagan ilm maskanida, 10-sinfda tahsil olmoqdaman. Ikkita sheʼriy toʻplamim  nashrdan chiqdi. Maktabimizda oʻz iqtidorimni namoyon etishim uchun barcha sharoitlar muhayyo. Biz yoshlar – dunyodagi eng baxtli insonlarmiz.

Umida YeRDOShEVA, 22-sonli maktabning  10-sinf oʻquvchisi.