Amudaryoda oʻzgalar parvarishiga muhtoj 115 nafar yolgʻiz keksalar va nogironlar davlat himoyasiga olingan

Konstitutsiyamizning 45-moddasida voyaga yetmaganlar, mehnatga layoqatsizlar va yolgʻiz keksalarning huquqlari davlat himoyasidadir, deb koʻrsatilgan.

Tumanimizda ham oʻzgalar parvarishiga muhtoj boʻlgan 115 nafar yolgʻiz keksalar va nogironlar himoyaga olingan. Ularga har tomonlama koʻmak berib kelinmoqda.

Yil boshidan shu kunga qadar 74 nafar yolgʻiz keksa va nogironlar 103 mln. 443 ming soʻmlik 15 xil turdagi bepul oziq-ovqat mahsulotlari bilan taʼminlandi. Ularning hammasi 3 mln. 954 ming soʻmlik gazeta va jurnallarga obuna qilindi.

Uy-joyi taʼmirga muhtoj boʻlgan 30 nafar yolgʻiz yashovchi keksalarning yashash joylari homiylar hisobidan taʼmirlanib, atroflari obodonlashtirildi. Ularning salomatliklari ham nazorat qilinib, barchasi dispanser koʻrigidan oʻtkazildi. Koʻrikdan oʻtkazish davomida 45 nafar yolgʻiz keksalarning davolanishga muhtojligi aniqlanib, 15 nafari ambulator sharoitida, 11 nafari statsionar sharoitida, 19 nafari uy sharoitida oʻz salomatligini tikladi. Yana 103 nafar yolgʻiz keksa va nogironlar 6 mln. 416 ming soʻmlik bepul dori-darmonlar bilan taʼminlandi. Umumxalq bayramlarida ragʻbatlantirilib, homiylar tomonidan 23 mln. 340 ming soʻmlik moddiy yordam koʻrsatildi.

Parvarishga muhtoj yolgʻiz keksa va nogironlarning boʻsh turgan yer maydonlaridan unumli foydalanish ishlari tashkillashtirildi. Yaʼni, biriktirilgan ijtimoiy xodimlar tomonidan tomorqalarga mevali daraxt koʻchatlari, sabzavotlar ekish va ularni parvarishlash orqali tomorqani oziq-ovqat va daromad manbaiga aylantirish boʻyicha tegishli chora-tadbirlar amalga oshirildi.

Bundan tashqari, muhtojligi aniqlangan 24 nafar fuqaroga katta yoshdagi nogironlar aravachasi, 13 nafar bolaga nogiron bolalar aravachasi, 7 nafar fuqaroga eshitish moslamasi, 28 nafar fuqaroga qoʻltiq tayoq, 79 nafar fuqaroga hassa tayoq, 13 nafar fuqaroga protez-ortopediya buyumlari berildi va jami 162 nafar nogiron va keksalar reabilitatsiya texnik vositalari bilan  taʼminlandilar.

Malakali mutaxassislar tomonidan 214 nafar 1941-45-yillardagi urush va mehnat faxriylari tibbiy koʻrikdan oʻtkazildi. Koʻrik natijasi boʻyicha 2017-yil davomida ulardan 13 nafari bepul sanatoriya-kurort yoʻllanmalari  bilan taʼminlanib, sanatoriylarda salomatliklarini tiklab keldilar. Shu bilan birga yana 158 nafar nogiron va keksalarga bepul sanatoriya-kurort yoʻllanmalari berildi.

Vatanimizda barcha fuqarolar kabi yolgʻiz yashovchi keksalar va nogironlar huquqlari ham qonun bilan kafolatlanadi. Bu esa mamlakatimizda qonun ustuvorligidan dalolat beradi.

Hamid NORBOYeV,

TTB ijtimoiy yordam koʻrsatish boʻlimi boshligʻi.

(Foto: OʻzA)