IJODKOR BOLALAR MASKANI
Bugungi kunda maktabdan tashqari taʼlimning farzandlar tarbiyasidagi rolini koʻpchilik ota-onalar juda yaxshi tushunadilar. Maktabdan boʻsh vaqtlarida oʻz farzandining "Barkamol avlod” bolalar markazi toʻgaraklarida qatnashishiga shart-sharoit yaratib berayotgan ota-onalar soni ortib borayotganligi quvonarli holdir.
Qilichboylik Dilmurod aka oʻgʻli Diyorbekni markazimizga olib kelganida u hali juda yosh edi. Uslubchi Shokir Xudoyberganov Diyorbek bilan har kuni shugʻullandi. Unga nafaqat sanʼat sirlarini, balki har bir soʻzning toʻgʻri talaffuz qilinishi, musiqani tinglash va tushunishni oʻrgatdi. Bugungi kunda tumanimizda boʻlib oʻtayotgan "Mustaqillik”, "Navroʻz” va boshqa anʼanaviy bayramlarda eng faol ishtirokchiga aylangan Diyorbek Ortiqovning muvaffaqiyatlari markazning har bir xodimini quvontiradi.
"Yosh jurnalist va notiq” toʻgaragi aʼzosi Erkinoy esa tumanimizdagi oʻn birinchi sonli maktabda taʼlim oladi. Ota-onasi qizining sheʼriyatga boʻlgan ixlosini qoʻllab-quvvatlash uchun uni har kuni tuman markaziga olib kelishga hech qiynalishmaydi.
Kichkina yuragida Vatanga, ota-onaga, doʻstlariga muhabbati joʻsh urgan Erkinoyning qalami ancha oʻtkirlashib qoldi. Toʻgarak aʼzolari ustozi, Oʻzbekiston yozuvchilar uyushmasi aʼzosi Zulfiya Olloyorova rahbarligida Qoraqalpogʻiston Respublikasi yozuvchilar uyushmasining har oyda oʻtkaziladigan seminarlarida ishtirok etib tengdoshlari hamda ustozlaridan maslahatlar oladilar, uyushma tomonidan oʻtkazilgan mushoiralarda ishtirok etadilar.
Bekposhsha Abdullayeva "Boshlangʻich texnik modellashtirish” toʻgaragiga uch yildan beri qatnashadi. U Qoraqalpogʻiston Respublikasi "Barkamol avlod” bolalar markazida boʻlib oʻtgan koʻrik-tanlovlarda qatnashib, hamisha faxrli oʻrinlarni egallab kelmoqda. 2016-2017 oʻquv yilida Nukus shahrida boʻlib oʻtgan "Bolalar ijodiyoti” festivalida qatnashib, doʻppidoʻzlik boʻyicha Respublikada faxrli ikkinchi oʻrinni, "Elektron oʻyinchoqlar” yoʻnalishidagi koʻrik-tanlovda ishtirok etib, faxrli III oʻrinni egallashga muvaffaq boʻldi.
Toʻgarak rahbari Shahlo Eshimbetova har bir oʻquvchi bilan alohida, erinmasdan ish olib borganligi sababli shogirdlarini nafaqat boshlangʻich texnik modellashtirish, balki boshqa sohalarda ham ularning qiziqishlariga qarab shugʻullanishlariga yordam beradi. Shu sababli Qoraqalpogʻiston Respublikasi xalq taʼlimi Vazirligi tomonidan oʻtkazilgan koʻrik-tanlovlarda toʻgarak aʼzolari Ravshanbek Toʻrayev "Kosmik maketlashtirish va modellashtirish” yoʻnalishida faxrli III oʻrinni, Xurshid Rajabboyev "Radiotexnika” yoʻnalishi boʻyicha faxrli II oʻrinni egalladilar. Jamshid Bobojonov esa "Elektron oʻyinchoqlar” yoʻnalishida "Eng yosh ixtirochi” nomiga sazovor boʻldi.
Gulasal Allamberganova toʻqish toʻgaragiga rahbarlik qiladi. Ustozidan shu hunar sirlarini oʻrganib olgan qizlar qoʻli bilan yaratilgan sumkachalar, yubkalar, jaketlar koʻrgan koʻzni quvontiradi.
– Ixlosi baland qizlar toʻqishni juda tez oʻrganib olishadi. Oila aʼzolariga paypoqlar, jaketlar toʻqib bergan tengdoshlarini koʻrib, toʻgaragimizga qatnashishni istayotgan qizlar juda koʻp. Men ularga qiz bola nafaqat husni, balki odobi, hunari bilan yanada goʻzal koʻrinishlarini tushuntiraman, – deydi Gulasal Allamberganova.
Ingliz tili toʻgaragi oʻquvchilar bilan doim gavjum. Toʻgarak rahbari Mahfuza Ibragimova dars jarayonida mavzuga doir yangi metodlar, savol-javob, qiziqarli oʻyinlar oʻtkazib, oʻquvchilarning ingliz tiliga boʻlgan qiziqishlarini yanada oshiradi. U rahbarlik qilayotgan toʻgarak aʼzolari "Kelib ketma, bilib ket” shioriga amal qiladilar.
Amalga oshirilayotgan ishlarimiz, qoʻlga kiritilayotgan yutuqlarimizda muhtaram Prezidentimiz Shavkat Mirziyoyevning 2017-yil 18-yanvardagi 2731-sonli "2017-2021-yillarda Orolboʻyi mintaqasini rivojlantirish davlat dasturi toʻgʻrisida”gi qarorining ahamiyati ulkan. Mazkur qarorga koʻra, "Barkamol avlod” bolalar markazlaridagi mashgʻulotlar uchun ota-onalarning har oylik toʻlov miqdorlari Respublika boʻyicha belgilanganidan ikki baravar kam darajaga tushirilganligi juda katta imkoniyatlar eshigini ochib berdi.
Bugungi kunda markazimizda 48 ta toʻgarakda 1010 nafar oʻquvchilar kasb-hunar oʻrganmoqdalar. Ota-onalarning qoʻllab-quvvatlashlari, oʻquvchilarning markazimiz toʻgaraklari faoliyatiga qiziqishlari tobora ortib borayotganligi jamoamiz aʼzolarini oʻz kasbini sidqidildan bajarishga ruhlantiradi. Markazimizni haqiqiy ijodkor bolalar maskaniga aylantirish har birimizning ezgu niyatimizdir.
Munira Hayitboyeva,
"Barkamol avlod” bolalar markazi "Oʻlkashunoslik va ekologiya” yoʻnalishi uslubchisi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
